夏日青森遊: 白雪堡壘燒烤會

又有機會成為白雪廚房的座上客

今次夏日青森遊共有九個家庭

好熱鬧好旺場呀~~~

我和杏子最先去到白雪堡壘, 為免太多小朋友同時共餐不夠位子, 於是讓哲哲先吃白雪廚房出品既蕃茄牛肉通, 哲哲食到津津有味 

越來越多小朋友到達, 此時 anson都訓醒左, 但好搞笑要坐埋一邊對住個電腦靜思

 雖然白雪屋企好多玩具, 但小朋友總有隔離飯香既心態, 都唔知做咩鬼哲哲同 mavis竟然為左個波波爭持左好耐好耐, 最後 mavis怕左難纏既哲哲, 哲哲先掂到個波皮

 anson戴起小雲眼鏡, 好可愛

全屋小朋友各施其法各霸一個角落玩玩玩, 只因白雪屋企真係好多野玩...呢一日 jayson好精神, 邊似病呢? 有得玩, 藥到病除啦~~

屋內氣氛熱烈, 屋外有班猛男爸爸在炎炎 32度下負責燒野食比班靚媽, 所有食物均由凍肉先生夫人包辦, 好豐富, 我最欣賞個牛油雞翼, 超厚西冷同串燒牛柳雜椒. 辛苦晒~~~

開波前仲有個朱古力蛋糕食! 最近生日的是茄茄, 所以切餅儀式交由茄茄. 個蛋糕真係好好味, 好重朱古力味但又唔會太甜太膩, 睇下哲哲幾認真咁品嘗

mavis同 koko排排坐食得好溫馨; 唔知條腸係咪太吸引, 米爺走到埋去好順手咁吉起左, 放左入口, 成個過程好自然順暢. 米爺真係型, 食腸食到似食緊雪茄咁, 好有台型~

賣相同味道一樣好既 blueberry muffin! 由 lin兄同 jayson今早一齊焗, 個個小朋友食到餅碎都無粒! 飲埋盒檸檬茶, 唔怪得哲哲全日唔肯食奶啦 (photo by can)

飲飽食醉, 哲哲樣衰衰咁訓左落張沙發度嘆世界

呢一幕真係好 sweet, mavis唔知咩事喊得好厲害, 當其他小朋友圍在一起不知所措望住時, anson好窩心咁拎左張紙巾, 仲好溫柔咁幫 mavis抺眼淚 (隻衰哲仲行埋去手指指湊熱鬧加多把嘴, 正一口水佬)

 由開波時好曬, 到個天好黑, 再變返天晴, 我們決定把握時間即刻換衫出去嬉水, 襯個個小朋友仲龍精虎猛時, 緊係要影返張大合照啦. 如米爸所講, 有無咁神奇全世界望晒鏡頭?! 一張過, 收貨啦~