【裝修】淘寶買燈。旺角買盒仔燈篇 (一)

aug 17 

之前同哲爸去過家合居同四方家居睇燈, 感覺大陸既燈係比香港平, 但質素真係無咩要求先得. 水晶燈既話, 近睇d水晶好膠好假, 而且又會花花地唔會咁晶瑩通透(始終係一分錢一分貨), 燈口唔平又斜, 如果買水晶or「參考款」就返大陸買抵d

深圳d鋪標出黎個價係好貴下,就咁聽你一定唔會買,但當你問佢地係咪實價時,佢就會講個平成差唔多六折既價錢比你,之後再講價佢地頂多再減多少少, 聽人講好抵好抵就聽得多, 但安全程度呢?

有朋友做裝修說, 雖然香港的燈都是大陸買, 但佢地會再加工, 良心既電工會做少少野加工, 換番d安全d既線, 大陸果d入面唔係純銅, 包住電線既膠唔係耐熱耐屈

諗落其實買完仲要自己抬返屋企, 上落火車又輪盡, 就算要買大陸貨, 應該會轉投淘寶/天貓

網上既評語都好壞參半, 就算身邊既朋友分享有些就毫無問題, 有些朋友就說用左陣好快有問題就要換, 買過盞新既其實同香港買又差唔遠, 不過價錢確實同香港真係差一截, 所以都值得試下淘寶, 唯有小心d盡量揀天貓人氣盛既店子(比淘寶有信譽保證), 花多少少時間去睇評語

【裝修】開turbo! 油牆、裝廚櫃 (day 63-67)

aug 19

短租約本來是aug 23交吉, 25號吉日搬, 但很明顯, 點催點迫, 神仙都變唔出間屋當天就可以入住. 未有地台床, 未有廳櫃, 未有浴屏沙發, 基本上仲係吉屋一間, 假天花未裝, 油都只係油左一層. 奶奶說唔想比多個月租錢, 叫我們邊住邊裝邊滅蟲, 又叫我們每日call爆師傅一定要趕工, 但真係唔想搬晒入去, 一屋都係雜物, 又有人住, d師傅點開工? 唔想師傅w趕頭趕命就粗製濫造, 享一時之快換來日後痛楚

所以, 唯有延期到下一個吉日, 師傅說多幾天時間一定趕得及, 那餘下幾天就讓傢私牆壁多吹幾天散散味, 我們時間鬆動點也好, 一於決定sep 1才搬 (唉, 即係又要比多四千蚊繼續住間爛屋, 呢幾日好熱, 開住個吹熱風既冷氣真係好辛苦, 電費又貴, 條氣超唔順!)

八月中的時候真係比較勞氣, 日日都要問實師傅w今日將會做d咩, 邊d邊d又幾時做. 好似睡房地台床同廳櫃, 每日都答唔實個送貨日期, 一時話過兩日, 過兩日後又話要過多兩日, 再問又話個廠未答實, 眼見時間一日一日咁過去, 真係好擔心延遲多一個星期都未必搞得掂

飯廳牆終於都油上色了, 第一眼望落真係好sharp, 興幸最後決定無油落沙發牆, 一入屋就見到咁大幅橙黃色既牆會有點刺眼, 現在油在飯廳牆, 感覺每次吃飯的時候都會很愉快開胃~

【裝修】廚櫃揀料。簽圖落實正式訂做

jul 20

今日再去名家廚落實設計圖, 順便揀埋料

設計上沒有大變動, 除左個暗桶稍為縮短一點(原因是想飯廳位再鬆動一點), 連帶廚櫃門在數字上再縮短多一點; 廚櫃底板縮高, 留待師傅w預裝兩支T5光管在兩側; 檯面如我所要求, 比一般標準高度稍為矮一點; 近洗衣機下排的櫃桶門鉸, 依名家廚建議轉了170度的門鉸, 原因是通道太窄, 90度開的門會擋住條路, 拎野都唔方便, 依家換個加大角度既鉸會方便d

因為我們是開放式廚房, 左手邊的位置會有部雪櫃, 所以加了個側板, 至於側水擋就無加到, 距離鋅盤都有一段距離, 應該唔會倒到水去果邊

【裝修】買大門、房門、鐵閘

jul 28 

揀門買門真係一件好頭痛既事

六月的時候, 和哲爸快看一圈, 已知揀門一事肯定難以選擇, 盡量抽時間和哲爸到旺角建材街一帶睇定有咩心水. 月頭的時候師傅w叫我地係時候訂定門, 準備裝房門同大門框, 不過睇左前後四五次都好難抉擇. 結果拖左師傅兩星期先落實到買邊道門

時間少, 只得假日可以出去睇料, 又要帶住兩隻馬餾, 睇多陣都叫悶, 一係在人地鋪頭搞搞震, 話得呢個時又要捉住另一個, 根本就睇唔到D咩野. 有次仲趕到襯哲學校綵排未放學前帶住細佬撲出去再趕返去接放學, 去到鋪頭睇唔夠半個鐘就要走人, 真係大汗疊細汗

款式方面, 哲爸喜歡大宅門那種古舊式, 雖然我都鐘意, 不過用在三百呎(不是三千呎耶)的家好像格格不入, 希望找到一些像新式住宅/apartment的款式

房門比較喜歡白, 奶奶卻不是太喜歡淺色/白色, 覺得小朋友容易撞花, 而且唔襟睇, 過幾年就會黃. 反反覆覆想了很久, 還是決定揀灰白色, 一來自己喜歡淺色, 二來大廳沒有陽光, 如果用白色既房門可以將空間擴大, 望上去也較明亮

【裝修】裝冷氣, 批灰油牆 (day 46-52)

(終於有時間砌好張檯, 坐定定開電腦打篇blog. 家, 搬定了, 我們很幸運, 新居有驚無險完成度及滿意度值九十分, 只是還有點手尾未執完, 雜物也未完全安置好, 現在繼續龜速補文中~)

jul 27 (day 46)

踏入七月, 進度真係好慢好慢, 一方面覺得樓上單工程令師傅要調動人手上去, 另一方面都覺得師傅w放慢手腳, 由之前一日有兩三個人上黎, 到最近可能一個人, 更有時三日先有師傅黎tim, 可能同時接左其他工程掛, 總之我要八月交吉準時比到間屋我就由佢喇!

牆身開始批灰油底油, 個場仲係好爛好爛

【裝修】砵蘭街買料篇 (day 44)

(睇返轉頭, 踏入七月成個工程停滯晒, 果排每日都在忙同嬲緊樓上漏水件事, 完全無時間同精神跟進舊屋裝修事宜, 真係多得樓上唔少)  

jul 24

呢段時間間屋都無咩野睇, 依然係爛屋一間, 可幸的是樓上終於答應開門比我地師傅入去重鋪浴室地台, 下星期開始師傅要調動人手上去, 又要拖多個幾星期零進度了, 唉...

間屋無進展, 唯有update一下早個星期同師傅出旺角買料既情況

【裝修】樓蘭磚都鋪好了 (day 32)

jul 10

都忘了什麼原因, 等了差不多兩星期師傅才鋪地下既木紋磚. 好心急想睇下樓蘭磚鋪成點...

一入屋, 原來師傅正在鋪磚, 好奇睇下師傅點鋪先. 咦, 呢個好似mini robot咁, 幾得意bor

【裝修】 問題出現 (day 27)

jul 3

無論你事前做幾多research又或者計畫得幾好, 裝修果然總會發生突發的事情要處理. 先是樓上廁所同廚房地台漏水不肯維修(太長篇, 遲點出文再說), 再來是馬桶同分體冷氣的問題

先前都知道廁所會特別窄, 特別是座廁與淋浴間的空位超小. 本來打算為了房間大一點, 迫住將廁所縮細, 忍耐下就好. 當師傅間好淋浴的位置後, 實地看看果然是超窄! 考慮到廁所的使用率其實很高, 每天出出入入都要四五次, 一屋四人, 即是每天共廿多次, 超窄的廁所真的沒問題嗎?

迫住洗手無問題, 打橫像隻蟹沖涼都還可以接受, 可是每次交水費/練功的時候, 座廁窄到雙腿膝頭都頂住, 諗起都覺得辛苦

【裝修】刨書搵料點裝修? (二)

may 2

裝修書其實邊會睇得完? 行開圖書館見到有又借幾本, 每次都棒著一大堆書回家, 這段時間睇了很多書取經, 以下幾本書想給需要裝修的朋友做參考

最成日睇最有用就係呢四本 (其實還有之前第一批「愛上鄉村風。家的味道」, 會經常參考家居用色同傢私配搭)

【裝修】鋁窗安好。陸續鋪磚中... (day 23)

jun 25

師傅睇過批磚, 話廁所批磚有幾塊有少少defect, 不過叫我地唔洗擔心, 話會等最後用黎鋪頭頭尾尾界磚用, 再唔係可以退返比大陸, 有咁醒目細心既師傅, 頓時覺得好安心丫~

師傅手腳亦好快, 眨下眼就將廚房同廁所磚鋪得七七八八, 不過師傅話唔夠磚, 過兩日鋪晒之後就可以覆實要補幾多塊磚. 得果十零塊既話, 慳返上樓費, 運輸放低磚叫師傅幫手車上樓就得lu

廚房隻不見光磚越望越順眼, 本來諗住都有廚櫃擋住, 鋪咩都無咩所謂, 點知簡簡單單又幾好睇wor

前一晚見到呢d十字夾夾, 好奇問師傅, 原來用黎固定塊磚. 萬一鋪好既磚如果有咩問題想拆返出黎, 最好可以即日通知師傅, 否則過左一日就拆唔返, 要扑爛塊磚就有可能影響埋其他磚了

【裝修】地磚到貨了 (day 19)

jun 19

近日太忙, 好久沒有更新一下裝修進度. 今日上黎, 開始搭棚整鋁窗, 全屋既電制燈制都做好晒. 大陸磚終於收到了, 不過收貨過程有點小事故

話說一早同樓蘭和馬可波羅說好前天所有磚要送到, 結果運輸前一天打電話來說其中一款磚未有, 要遲多一日才送到. 到了昨晚晚飯的時候, 運輸打來說了一大堆藉口, 說司機忘了去倉取貨, 又說要遲多一天. 這次哲爸發火了, 說師傅的人工每日一千一工, 怎也不能等, 一定要明天送到

和運輸互相拉鋸下, 運輸方面讓步為我們作出了這樣的安排: 明天先送馬可波羅的貨, 後天才送樓蘭. 本來是要收兩次運費及上樓費的, 不過他們理虧在先, 所以只收一轉錢. 這樣的安排我和哲爸都很滿意, 雖然整餐哲爸的生日飯吃得有點勞氣, 不過運輸還是挺合作講理由的, 大家說清楚事件就好辦事

當晚太心急, 裝修師傅收妥磚後, 我們即晚上去望望. 全屋磚計埋不足兩噸, 運費連上樓費是HKD500+500

【裝修】電器篇 (12/7更新)

大出血! 裝修後, 基本上所有電器都要重新買過(除左個乾衣機外), 家電方面我沒意見, 哲爸做了一輪research, 暫時有以下心水:

冷氣

大廳要裝分體式冷氣, 網上一致推薦大金(FTXS50F)襟用夠靜, 可以出冷熱風, 加上朋友做冷氣有平, 可以同佢攞貨

【裝修】廚櫃出設計圖了~

名家廚四月尾上門度呎, 一星期後就出圖了

【裝修】落實全屋電制插蘇位 (day 15)

jun 14

今日約左裝修師傅傾實全屋電制插蘇位, mark位前諗住早d上舊屋, 實地咁傾會清楚d, 點知幾位師傅已經準時開工

哲房門上的分體式冷氣位也做好了, 師傅正在做喉嗎?

【裝修】砌牆完成 (day 14)

jun 11

今日出席哲哲畢業禮無時間去舊屋望望, 早兩日明明仲未有野睇, 今晚上去原來已經砌好兩間房中間既牆, 而廁所牆都砌得七七八八了!

眼見磚與磚之間都填得幾密, 只係有少少窿, 即晚問師傅點解填唔滿係咪有咩原因, 師傅都有解釋同叮囑班兄弟補補返d英泥 

【裝修】落實全屋牆地磚 @田貝四路家合居

may 31 

多翻考慮, 最後決定餘下既磁磚在家合居的馬可波羅買, 網上既評論大多說馬可波羅既磚質素有保證, 而葉小姐給我們既感覺對磚很熟悉, 而且選擇多價錢平, 所以也不想考慮其他鋪頭/牌子了

廁所

喜歡這隻流水磚的花紋, 打算用作廁所的地/牆磚

【裝修】樓上廚廁漏水。準備砌牆 (day 9)

jun 6

幾日紅日後, 一早就收到裝修師傅電話, 廁所同廚房更花又滲水, 今日上返舊屋度睇下咩情況

師傅話呢個位滲水, 估計係樓上去水位積水後慢慢滲漏到我們單位

明顯睇到滲水滴到下面塊木板有水漬

【裝修】八卦岭馬可波羅。樓蘭陳列室揀磚記

apr 18

既然決定買樓蘭木紋磚, 為怕家合居賣次貨,我們上淘寶商城問清楚樓蘭的官方銷售點, 客服建議我們先到八卦岭的陳列室看, 那裡的款式最齊

一連四日復活假, 我們選擇第一天上深圳, 真係同踩地雷無誤. 出閘塞, 過e道塞, 過關也塞, 就連搭的士都大排長龍. 總共花了個多小時才甩身, 痛苦...

這次我們也是搭的士, 從羅湖火車站乘的士約需rmb27, 因為馬可波羅的旗艦店也在附近(在國安居斜對面啊), 我們先到馬可波羅看看

【裝修】裝修第一擊。清拆全屋舊有間格 (day 2)

may 26

約左裝修師傅九點上黎, 交低大門鎖匙, 睇住班師傅在動土位動工, 開工大吉! 正式開波裝修啦!

開工前一天回舊居再看一次有沒有什麼遺漏(始終都搵唔返細佬整唔見左兩張主要既SD卡, 唉, 幾個月既相無了), 然後拍照留紀念~

【裝修】搬屋記 (下)

搬屋後的第一晚, 可能冷氣機太舊(牌子還是national...), 開了幾個鐘還是很熱, 整晚睡不好. 哲哲同細佬反而訓得不錯, 哲哲沒有因為一個人一間房, 訓生保上格床而不慣, 反而好開心晚晚有冷氣嘆, 哈哈

而我和哲爸最開心的, 是晚上兩位劉生在房訓了, 可以好爽咁在廳食薯片睇master chef, 睇到夜一夜都吵唔到任何人~

又忙碌了一整天, 家中的物件還原得八八九九, 淨下來的不會用到就由它吧. 哲哲和細佬很快已經適應了這個家, 識得摷返bowling黎碌返場!

表面上睇好似間屋幾唔錯咁, 住左一晚後陸續發現好多問題...

廁所個洗水盤底漏水, 滴到下面個木櫃濕晒; 廁板無左螺絲上實, 成塊脫落跌出黎; 淋浴間壆位做太矮, 沖沖下涼d水去唔切會湧出不單止, 水流不是斜向去水位, 而是相反的流向大廳

大門既鐵閘鎖唔到, 木門鎖個彈簧老化了, 關門也lock唔實對門, 安全成疑, 屋內完全要靠防盜鏈lock門

還有廳房的幾部冷氣, 開極都唔涼; 廚房個抽油煙杯d油漬核突到嚇死人, 真係想問句, 係咪住左咁多年完全無洗過呢? 上一手唔通幾個月都唔煮飯咁忍得手? 見到黃共黑黑結成硬塊, 極度嘔心, 完全唔想煮飯...唔想動手去清理