紅豆綠茶一歲生日

jan 12, 17

豆豆, 茶茶, 今日一歲生日喇!

由bb 開始, 帶住你地打針, 餵藥, 你地食既用既都會上網research 一翻, 會為你地既便便而操心, 為著每一個新發現而興奮傻笑, 手機既記憶爆到一個點, 不知比哲爸投訴過多少次...多謝你倆令我重拾新手父母箇中既滋味

竣竣最傻豬, 話豆豆茶茶一歲生日就已經十八歲, 明明之前佢仲係哥哥黎, 甘快已經被豆豆茶茶爬佢頭, 猛話唔公平. 睇黎細佬真係好恨做哥哥呢~

今日哲爸出trip, 唔能夠同你地正日慶祝, 所以預早和你倆切蛋糕, 希望你地食得招積, 住得舒適, 歡迎繼續白食白住被我地一世包養~

一歲生日快樂!

大個仔大個女。紅豆綠茶去絕育喇！

aug 1, 16

紅豆綠茶日漸長大, 開始想: 何時為紅豆綠茶做絕育手術?

四個月大時見獸醫, 醫生建議足六個月, 夠2.5kg重就可以; 貓義工說最好等大到九個月才做, 身體器官各方面發展成熟d會更好. 貓女最早五個月就會發情懷孕, 而貓仔本身不會有特定時間發情, 但遇上發情中既貓女, 就會被其叫聲及獨特既氣味而自我引爆

男女一室, 日夜對住, 人都早熟, 難保貓唔會提前發情...

七月頭的時候發現綠茶開始有古怪, 雖然沒有腳仔踢踢, 半夜叫春的情況, 但間唔中有一兩下大聲既怪叫, 見佢蘿柚突突扒係度, 鐘意挨身挨勢. 一向高竇既綠茶反常到成日抱住人隻腳板黎聞, 同阿豆打架時, 一被咬就硬晒軑, 個樣發晒姣咁款, 我們懷疑茶茶發情了

喵星人睡的地方...

喵星人最善長於用牠們既萌相黎溶化貓奴帶其入室, 入屋後隨即侵佔家中各重要位置成為牠們的地盤. 愛睡既貓星人更是隨處可訓...

生果籃成了貓籃...

迎接貓主子。紅豆綠茶回家前之準備

雖然說哲爸之前有養過兩隻貓, 不過已經是十多年前, 換言之和我一樣也是新手一名. 養一隻貓每月既洗費隨自己經濟能力而定, 那基本上要準備什麼呢?

必需品:
裝貓網/格仔網
貓砂盤
貓砂
糧食
籠
外出袋/飛機籠

重要的事要說三次: 一定要裝貓網, 一定要裝貓網, 一定要裝貓網! ($12店有售, 有不同呎寸可以選購). 常說「貓有九命」, 實在是太高估貓咪的能力了, 「好奇害死貓」, 很多時貓貓看窗外看得入神就會失足跌落街, 為了避免飛貓事件, 一定要全屋既窗裝上貓網, 幼貓的話格仔網建議裝吋半x吋半

家裡早已裝上蚊網, 但不夠安全, 所以裝埋格仔網, 雙重保護, 以防萬一

遇見。紅豆綠茶

決定了領養貓貓的事後, 就在網上搜尋一些可領養的機構如愛協, 聯絡貓義工, 也去了不同的領養日. 在facebook加入了數個和貓有關的群組, 一般和貓義工/協會領貓的流程是這樣的:

從義工的post中見到邊隻合眼緣> pm義工> 裝窗網> 約家訪> 可以領貓
又或者親自和貓貓見面, 睇中左就填表格申請> 等通知> 裝窗網> 約家訪> 可以領貓

接觸過後, 發現領養不是想像中的簡單, 要過五關斬六將. 接觸不同的貓義工, 當中問了我們很多問題:

- 家中有無人有鼻敏感? 有? 怕你鼻敏感會棄貓, 要考慮...
- 住邊度? 公屋? 邊條村幾多樓? Y型屋村走廊一出就係lift/防火門同花槽, 怕走失, 又要考慮...
- 屋企有幾多位成員? 仔定女? 有無足夠時間陪到貓貓?
- 養一對優先, 要一隻? Sorry, 有好多申請者, 要先睇晒所有申請先再考慮你...等等如此問題

有可能來來回回很多次, 最後都係領養唔到, 因為不是先到先得, 從茫茫人海的申請者中揀最適合既領養人, 當中有義工自己揀人既喜好及一些富爭議性問題. 正所謂, 你揀貓時, 貓/義工也在揀你

紅豆。綠茶

年初二, 拜完年, 中間襯有空檔的時候, 哲爸帶了我們到他常去的寵物店, 那間寵物店就在公司附近, 閒時lunch經過會隔著玻璃窗看貓貓. 拍拖的時候我們也常常到寵物店看貓, 生了孩子後也有帶兩兄弟接觸貓, 以往都是看看而已, 但是今次不一樣

我們在外看著看著, 寵物店的職員突然說可以讓我們抱抱那隻小小的暹邏貓. 第一次抱貓bb, 感覺很震撼, 看著這隻可愛又粘人的貓bb, 那一剎好想抱回家

好想養, 好想養, 一直都想養貓, 我和哲爸早有共識, 待竣竣小一的時候就會養貓, 這個計畫哲哲和竣竣也是知道的. 雖然我們對那隻暹邏貓bb念念不忘, 但是我們想再認真的想一想, 是否要將計畫提早, 大家是否心意一致, 怕大家是一時衝動, 將來害苦了小動物