日與夜。兩個我: 上課鐘聲響起了。N1

一星期一堂的畫班已經上了兩個多月, 由起初放學會眼紅紅哭著說掛住媽媽, 到現在哲哲已經不再喊了, 取而代之是: 「我頭先返學有掛住媽咪丫. 媽咪, 你睇下, 幅畫係我畫架, 我畫得好靚架~~~」雖然不知道哲哲是否很愛畫畫, 不過閒時見到他會自己拿畫筆坐定定畫, 畫完會好雀躍說畫了什麼和什麼, 又會不時翻開畫冊自我鑑賞一翻

雖然人不在學校, 不過我好像挺了解哲哲學校的人和事. 好像有時哲哲失驚無神話: 「我係雲姐」然之後就見佢執野執到狂風掃落葉咁(好粗魯, 嘭嘭聲咁), 佢話: 「雲姐做野好快架」. 三秒之後, 哲哲又變左卿姐: : 「卿姐做野好慢架...」

有時和哲哲聊天時, 哲哲會說: 「xxx好粗魯既, 成日好大力撞我架車, 我都唔鐘意同佢玩既」「我地o係大肌肉度隔離唱歌, 老師唔洗用鋼琴彈架」「洗完手就自己揀個位坐低食飯, 我鐘意同xxx一齊坐, 不過食緊飯老師都唔比我地傾計既」「學校老師好多野做好忙碌架, 唔得閒拍拍我地訓覺」

九月學校有中秋節提燈會, 當時哲哲也說不出中秋節什麼什麼, 不過看到學校壁佈板上的照片, 哲哲應該過得很愉快吧~

2010年12月7日星期二

三個人

「媽咪, 呢個係『人』」

「嗯?」

「有哲哲, 爸爸同媽咪, 我地屋企有三個人」

2010年11月11日星期四

不吃早餐的原因

老師說最近哲哲早午茶點不怎麼吃, 叫我留意一下. 某天返學早上:

「媽咪, 我唔要返學食早餐」

「點解呀?」

「我唔食丫...」

「哲哲, 學校既嬸嬸煮得好辛苦, 你唔可以浪費食物同埋嬸嬸既心機架, 再者食多d野先會長高, 身體先會強壯, 跑步先會快, 跳得先會高. 你想唔想好似媽咪咁高, 唔洗抱抱都可以睇多d野? 好似媽咪咁跑得咁快? 」

(講完自己都唔係幾好意思, 因為我同個「高」字一點關係都沒有...)

2010年11月9日星期二

開學首兩個月

開學至今兩個多月, 經歷住院後逃避獨自上課的日子, 哲哲花了一星期時間再次適應過來安然踏入課室

九月初適應周完結, 久不久就會聽到哲哲唸住學校教過的歌「排排隊, 排排隊, 小朋友要排排隊」「一隻兩隻...手指公去左邊度呢?」

食飯方面, 老師都說哲哲很叻仔, 會自己吃, 吃得快而且會主動添食

午睡方面, 我曾擔心要我拍背及抱著白豆才能睡的哲哲, 兩樣都沒有時在校睡得如何, 結果是白擔心的, 老師說起初哲哲真的不太睡得好, 不過醒來沒有哭著扭要媽媽, 只是靜靜訓在床上周圍望

出名唔認得人又唔記得人名的哲哲竟然會主動說 xxx成日喊, 比老師叫佢收聲; 又或者 xxx唔無訓覺, 黎老師正在玩電腦 (咁細個就識報串講老師壞話?) 聽著哲哲說吳老師戴眼鏡, 梁老師好肥講野好大聲, 雲姐幫佢換片片...等等就覺得哲哲對所有老師同學都自有一套記住的方法

認得校長老師書記, 那同學仔呢? 放學的時候, 哲哲會好熱情同所有認識/不認識的同學說再見; 在街上見到穿同校校服的哥哥姐姐也會說是同班同學; 還記得有次放學經過大家樂門口撞到同學仔, 哲哲笑住問對方: 點解會見到你架? 做咩放學唔返屋企架? (人仔細細成個訓導主任管住晒, 叫哲哲做管家仔真的沒有錯~) 有天哲哲和我說:

「媽咪, 我鐘意馮臻」

「馮臻? 哦, 你指臻臻, 臻臻姓劉, 唔係姓馮架」

「唔係丫, 係馮臻, 馮臻呀~~」

「真係叫馮臻? 咁馮臻係男仔定女仔呀?」

「係女仔, 仲有, 我仲鐘意王詩霖, 岑寶兒...同埋鄭詠瑤呀~~」