may 21
四月的時候錯失了和晴晴一起到深圳玩的機會, 原定這一天再次結伴上深圳, 可惜天公不造美下個大雨, 不想取消約會, 於是更改地點去了沙田文化博物館, 參選pixar和兒童探知館
入到探知館, 一眼望晒! 還擔心展館咁細, 出面又下著大雨, 會不會不消一個鐘行完就要走? 好在玩玩下原來都幾多野睇~
哲爸本來今天有事忙, 不過剛好中段時間可以偷時間陪我們一陣. 一入場哲哲狂風掃落葉每樣都摸幾下, 唯獨走到這個遊戲機停下來. 這個遊戲其實是要教我們保護海洋免受各式各樣的環境污染, 玩玩下都幾好玩, 最後連我都玩埋一份, 哲哲仲讚我玩得好叻添, 哈哈~
有現代遊戲機, 也有遠古的玩意. 這幾個古代用的碗, 每個花紋款式都不同; 又或者有幾塊有不同花紋的方塊磚, 用顏色筆同紙輕輕一掃可以掃出不同的圖案, 加點創意可以畫出不同的公仔
玩到咁上下, 晴晴表姨上完興趣班都黎到啦!
雖說晴晴是哲哲的表姨, 實情只是大哲哲九個月, 平時見面不算多, 加上哲哲不太懂得和小朋友一起玩, 以往晴晴表姨主動同哲哲玩但哲哲都會逃走/不理會. 難得今次只有兩小口的聚會, 沒有其他親友陪玩, 哲哲也長大了, 開始懂得配合晴晴表姨一齊玩, 溝通變得更直接
呢個海底半玻璃碗好得意! 起初哲哲唔敢入去, 見到個入口又細又窄, 經我身先士卒示範後, 哲哲就肯入去了. 仲見到魚仔在自己面前游黎游去, 好有趣! 晴晴表姨後來也跟住哲哲細佬入去, 好勇敢, 叻女丫!
(呢位咁低能既係邊位?)
好懷念丫!!! 細細個時我都有玩過幫紙公仔換衫, 竹籤這些玩意, 仲記得當年每晚飯後, 都會拎波子棋, 象棋之類的東西同爸爸妹妹決一高下, 平時放學落雨無得去公園, 都會去社區會堂打康樂棋. 如今見到呢d熟口熟面的東西好有親切感, 原來我也到了懷念n年代舊物的年紀了嗎....?
哲哲當然未見過也未識玩這些玩意, 不過說到跳舞哲哲也可以同晴晴一齊跳. 晴晴跳機械人版的nobody已經好叻, 今次挑戰蝦兵蟹將, 跟住一齊跳, 仲著埋龍蝦衫, 跳得好神似~
(唔知係哲哲肢體動作不協調還是什麼, 每次要模仿或者睇跳舞時總是眼定定望住而唔會跟住跳...係專心? 還是無信心? 還是無膽去試?)
呢部投影機都幾好玩. 用筆在膠片上畫圖案, 透過反射, 圖案在上頭的空碟出現. 哲哲未識畫, 只有亂畫一通, 晴晴大個女就識玩, 仲畫左個大眼仔公仔出黎, 話係哲哲細佬黎添 (嘻嘻, 畫到哲哲對眼咁大, 真係開心死哲爸囉 XDDD)
「店小二, 攞酒黎!」「係~~~」
兩老表換上農村衫, 在「農村生活」扮起村姑同店小二
「我地不如打邊爐囉?」「等我加d水落去先!」「d野未熟, 唔食得住架~」
鏡頭另一邊有個農村用的爐灶同煮镬, 晴晴同哲哲玩到好認真仲唔願走添~
我以前也有那盒一模一樣樣的飛行棋同象棋丫~~~
展館的盡頭, 陳列了一些很有紀念價值n年代的玩具. 有些我見過也玩過, 不過有些玩意真的很耐歷史, 耐到哲哲問點解d thomas火車係咁既樣...orz...
沙田文化博物館這段期間剛好做pixar展, 我們也一起往上層參觀
「媽咪, 呢個咩公仔黎架? 咁大個既?」
「err...我都唔知佢叫咩名喎...」
「好似jayson送比我隻錶咁樣丫, 媽咪, 我想依家即刻戴果隻錶錶!」
反斗車王的一幅大畫, 哲哲不出聲的看了很久, 仔細到每架車的模樣及神情也有留意到. 兩老表一輪熱身過後, 已經熟絡不少, 簡簡單單一幅佈景板也可以就地而坐玩起包剪揼上來, 呢一日仲見到哲哲成日痴住晴晴, 又肯拖住手仔一齊行, 真開心見到哲哲和晴晴可以玩得埋
中途哲爸有要事走開了, 晚上又回來和我們一起到意粉360吃晚飯, 飯後我們還有一起吃北海道牛乳甜品. 這天多得晴晴處處忍讓哲哲, 彼此才能和洽相處. 日後真的要多多約埋一齊玩, 好讓哲哲向乖巧的晴晴表姨多多學習~
沒有留言:
張貼留言