第一次入院

第一次發燒, 無咳無鼻水無唔妥, 究竟是出牙仔還是玫瑰疹呢?

oct 8

眼瘡才剛剛退了, 這天lunch過後無事發燒起來. 起初見初一微燒不算太辛苦, 沒有餵退燒藥, 只是貼了退熱貼和多啜奶補充水份有助退熱. 然而初一完全睡不到, 也連身子熱, 稍為一訓就醒, 沒胃口吃奶, 只係想人抱住啜啜訓覺, 成日依依哦哦的呻吟聲好似好辛苦咁, 見情況無好轉, 於是走了看醫生

因為食左退燒藥都唔退燒(keep住39.4-9上落), 醫生懷疑出玫瑰疹, 叫我這幾天多留意一下. 假如兩天後還是燒就建議入院做更詳細既檢查, 如抽血, 驗尿等等

oct 10

燒還是沒退, 安全起見, 山長水遠走到st paul看門診.兒科醫生未到, 姑娘又說細佬高燒不宜再出外看其他醫生, 見細佬年紀小, 又見已這燒了兩天, 建議我們預先入院上房休息等醫生, 唯病房只餘下最貴的私家病房, 正在猶豫好不好轉其他私院的時候, 幸好等了一會兒科醫生來到了 (也許是流感高峰期又或是轉天氣, 很多小朋友呼吸系統有問題要留院, 床位很爆呢~)

醫生有幾個擔心, 一是小兒常見的尿道炎, 又或是玫瑰疹, 又或許是菌入血都可以持續發燒不退, 穩陣起見要細佬入院抽血做檢查

可憐的初一, 要抽血插尿袋抽鼻液種豆豆, 仲燒到面仔紅卜卜, 好心痛呢...

私家病房雖然貴, 但總算不用和別人share病房, 很寧靜, 可以讓初一和我休息片刻. 晚上轉回大房, 慘了, 一連兩晚齊齊無得訓. 廿四小時只訓到一個鐘, 弄了成晚唔肯, 直到早上七點幾才睡著. 過去幾日我的睡眠時間累積是六個多小時, 日頭初一固之然不會睡, 應該說他很想睡但睡不了, 總是要我抱住他啜啜才能夠睡, 可是我又不能抱他太久, 稍為移動轉身一下就即醒狂喊

到了晚上更不會睡, 明明抱住啜到睡著了, 準備彎身放下時就醒, 為怕吵醒隔離床, 唯有急急的又抱起, 結果整晚的在病房, 大堂的出出入入, 抱來抱去, 成個病房, 上下午更的姑娘嬸嬸都認得我和初一了, 有些姑娘很體諒我, 夜更的時候幫忙抱住哲哲訓, 讓我可以抖抖手臂腰骨

有床不訓, 硬要邊啜訓我張又窄又硬的沙發床, 一個人訓都嫌窄, 成晚打側無得郁真係辛苦到極

報告出了, 好消息不是尿道炎也不是菌入血, 醫生估計是玫瑰疹多, 然而一天未見疹出現, 一天燒還不會退, 也就不能出院回家. 點算好呢...過兩日親戚嫁女, 點去飲? 奶奶說反正宴席就在醫院隔離的酒店, 最壞情況叫我過去飲完再返醫院, 下...咁都得?! 爛身爛勢樣衰頭亂情況下去飲, 唔係幾好掛...

呢個細佬又唔合作, 出動到資深醫護幾位姑娘夾手夾腳的餵退燒藥, 辛辛苦苦的餵落肚無bu出黎, 不夠三分鐘就自動扣喉嘔返晒出黎, 食左等於無食, 又唔肯飲水, 試問又點會退到燒呢, 唉...

oct 12

終於退燒了, 可是玫瑰疹沒有出來

燒退了, 一次過訓返過去幾日既覺, 樣子也精神了不少 

醫生也說不出原因, 判斷是細佬感染了一些過濾性病毒, 引起發燒來抵抗, 在發燒期間身體正不停的對抗病菌, 期間我不停的餵媽媽奶, 醫生說或許是媽媽奶的抗體有助細佬抵抗打敗病毒而且自我復原起來

入院期間聽到不少人說:「餵人奶唔係少病d咩? 點解會發燒仲燒咁多日咁嚴重呀?」「都叫左你唔好餵人奶架啦, 搞到自己咁辛苦無得抖無人幫到你, 一早餵奶粉咪好囉」

餵人奶(仲要全埋身)既辛苦, 係! 係好辛苦! 無得假手於人, 倦到變人乾時仲要頂硬上, 人在醫院唔能夠兼顧到屋企上下, 幾日來訓得六個幾鐘個人又燥頭腦又唔清醒到後悔自己係咪真係做錯左. 但人奶神奇之處就係你在質疑佢同時, 幸好有媽媽奶的抗體保護細佬, 否則高燒咁耐, 真係唔敢想像今次細佬會嚴重到咩地步

醫生見細佬退燒讓我們出院, 剛好急得及過隔離見過面向親戚祝賀一下. 一向來細佬的身體都很健康, 我很相信這完全是媽媽奶的功勞, 很希望我能堅持下去, 更希望細佬可以健健康康, 不要讓很多親戚朋友擔心了

p.s. 入院三天幸好牛姨回港未有工返可以幫我在家照顧哲哲, 從前覺得牛姨廿幾歲仲成日要人擔心同服侍又唔夠可靠, 今次實在太感謝, 可以讓我安心在院照顧細佬之餘, 哲爸奶奶又不用請假照顧哲哲, 起初擔心一年沒見哲哲不肯跟, 幸好他們相處愉快, 牛姨也能幫我接送放學, 照顧哲哲的食宿安排, 果然是大個女, 長大了...