五蚊不見了!

哲哲小學有小賣部, 放小息時常常看到同學買野食好開心, 早兩星期前向我表達了「想有零用錢」的想法

本來我認為, 小息有我提供每天不同的零食, 放學又不需要留校補課上興趣班, 實在沒有零用錢的需要

「我丫, 費是自己唔記得準備小食比個仔餓死佢, 塞佢幾蚊由佢自己買野食」

「都唔知準備咩小食好, 食黎食去都係果d, 比錢佢鐘意買咩食就買咩食喇」

想想其實哲哲的小食真係天天不同好多花臣, 哲哲自己也很滿意很期待, 都說每天打開食物盒, 同學們都搶住吃他的小食, 又說某某同學每天都吃同一種, 一定很悶. 既然哲哲開口想要, 於是先吩咐他查看一下, 小賣部賣的東西有什麼, 價錢又是多少, 再作決定

結果哲哲回報學校有魚蛋, 燒賣, 餅, 粟米杯和紙包飲品等簡單小食, 最貴的都是五蚊, 於是和哲哲訂立好, 逢星期五都給他五蚊, 他可以學校買食物, 也可以儲起這五蚊, 總之這就是他的零用錢, 他想怎樣做也行

上星期五第一次給他五蚊, 哲哲將這五蚊放在筆盒. 放學回家時, 好奇問了哲哲...

「哲哲, 點呀, 今日小息買野順利嗎? 五蚊買左咩野食呢?」

「唉, 媽咪, 個五蚊唔知去左邊」

「下? 唔見左? 你唔係放筆盒度咩? 點樣唔見架?」

「我都唔知丫, 上堂時出去交完回條比班主任, 返到位個筆盒就唔見左個五蚊喇」

「咁...會唔會筆盒鬆左, 個五蚊唔小心跌左落書包入面呢?」

同哲哲搵晒成個書包, 就是不見五蚊...

「唉, 黎緊呢個星期五比五蚊你仲會唔會整唔見架?」

「咁一係你唔好比零用錢我住啦, 我費時又唔見」

結果這五蚊就是在不知情的情況下不見了

隔了數天, 某日收到其中一位同學的媽媽msg, 他的兒子拿了哲哲果五蚊, 現在很不好意思要還給哲哲, 估計是同學看到哲哲檯上筆盒內的五蚊, 貪玩打算收埋, 然之後忘了就拿回家給媽媽發現

真相大白!

第一時間同哲哲講返呢件事, 哲哲長長的嘆氣

「唉, 原來係xxx, 最衰都係佢, 搞到我無左個五蚊仲要比媽咪話一餐!」

(sorry囉哲哲...又唔係真係鬧你, 都係哦兩句姐, 不過知道你無跌左整唔見, 但下次都要小心保管好, 財不可露眼嘛XDDD)

放學後, 問哲哲拿回了五蚊沒有, 哲哲給我看手上的零食...

即食栗子一包!

「栗子? 屋企咪有囉? 早知屋企拎包比你食啦, 洗咩買曬左果五蚊雞...係喇, 做咩買左返黎又唔食? 小息唔餓嗎?」

「媽咪, 我知道你鐘意食, 專登唔拆, 買返黎比你同細佬食架」

嗚嗚嗚...哲哲真係有我心, 抵鍚