有時侯是需要一個共同敵人的

feb 4 

時間培養出感情, 日復日的朝夕相對, 不知不覺間在哲的心目中, 也預留了一席位給細佬. 這種發現就像肥皂劇裡那些歡喜冤家, 平時狗咬狗骨, 各不相讓, 某一天, 慣常的人在你身邊消失, 你才發現自己原來是著緊某人

呢一日去遊戲室放電, 平常細佬最喜歡黏著哲哲玩, 這日一反常態, 四圍同d哥哥姐姐玩, 完全無理過哲哲. 哲哲對於「同陌生小朋友玩」有自己的挑剔, 怎也不肯和其他小朋友玩, 自個兒打圈跑, 跑得耐悶了走來和我說:「媽咪, 點解細佬同其他小朋友玩唔同我玩既?」「佢係我既細佬黎架嘛, 點可以同其他小朋友玩架?」, 說完之後悶悶不樂索性坐低不玩了

(嘻嘻, 這樣算不算吃醋呢?)

過了一陣細佬回來了, 看到哥哥沒精打采的模樣, 於是嗲嗲哄返哲哲不停叫「哥哥, 哥哥」, 哲哲當堂開心翻晒!

要將兄弟情昇華致更高既階段, 呢個時侯需要一位敵人!

細佬本來正在玩一塊軟墊, 玩玩下卻比這兩位小女孩統統取走建城堡, 哲哲知道後第一時間為細佬站出來幫手「對悍」, 最後小女孩讓步, 平分了兩塊軟墊給哲哲他們, 事件得以解決

哲哲話呢間係雪糕店, 只係可以請細佬一個入黎食, 細佬也就傻傻的聽哥哥話, 不出去兩個呆在迫迫的軟墊中XDDD

兩兄弟平時打生打死, 一有事就一致對外, 同仇敵愾, 猶記得幾個月前哲哲還不太理會細佬, 就算比小朋友整到跌低都無反應, 有時更會連埋其他小朋友一齊整古細佬當公仔玩. 最近開始會帶埋細佬一齊玩, 有事更會「拖馬」預上細佬的份兒, 細佬也自然的配合, 一齊對抗外敵

見面時又會打, 不見時又會掛, 兩兄弟的相處就是這樣自然坦率, 期待發掘你們更多的兄弟情