兄弟情

jan 8, 17

是晚和麻麻吃完生日飯, 回程路上...

「哲哲, 人既快樂好簡單, 能夠同屋企人食餐飯慶祝, 唔需要送生日禮物, 都已經好開心」

「咁又係既, 如果我有好多禮物但無人陪我慶祝生日, 我都會唔開心」

「係呀, 第時爸爸媽咪唔係度時, 得返你同細佬兩個, 你地要相親相愛. 你要記住, 你地一世都係兄弟黎, 呢個世界除左屋企人之外, 無人會無條件咁去愛你對你好, 所以你要好好珍惜細佬, 唔係成日蝦佢打佢」

哲哲若有所思

「細佬呀, 你最鐘意邊個?」

「哥哥」

「哲哲, 咁你鐘唔鐘意細佬呀?」

「err...我都鐘意細佬既」

落藥成功!



細佬聽到哥哥表白後, 個心甜絲絲, 半得戚問:「咁你又成日打我既?」

「咁你有時真係曳, 成日同我爭我野玩, 嘈住我打機同溫書, 不過你依家又真係乖左好多既」

「哥哥, 我想同你拖手, 你可唔可以拖我丫?」

「好喇」

哲哲以行動來回應細佬既愛, 簡單一個小拖手, 蘊含著對細佬的認同, 看得我好感動

以前哲哲好討厭細佬, 經常話要趕走佢, 呢兩年竣竣開始識同哲哲玩, 會一齊打機, 睇youtube片, 傾minecraft, star wars, 平常又很忍讓哲哲, 所以哲哲都開始肯同竣竣玩

不經不覺間, 細佬已經成為哲哲生命中的一部份, 日常都可見哲哲的小關心. 知道細佬怕喪屍, 打機的時候知道有喪屍出現會識叫細佬入房唔好睇; 早排考試週放早, 回家的時候不見細佬, 會問細佬去左邊, 而不再是第一時間搵白豆

能夠學懂愛, 會更珍惜現在所擁有的, 希望愛的種子能夠在你倆心中茁壯成長