開學至今兩個多月, 經歷住院後逃避獨自上課的日子, 哲哲花了一星期時間再次適應過來安然踏入課室
九月初適應周完結, 久不久就會聽到哲哲唸住學校教過的歌「排排隊, 排排隊, 小朋友要排排隊」「一隻兩隻...手指公去左邊度呢?」
食飯方面, 老師都說哲哲很叻仔, 會自己吃, 吃得快而且會主動添食
午睡方面, 我曾擔心要我拍背及抱著白豆才能睡的哲哲, 兩樣都沒有時在校睡得如何, 結果是白擔心的, 老師說起初哲哲真的不太睡得好, 不過醒來沒有哭著扭要媽媽, 只是靜靜訓在床上周圍望
出名唔認得人又唔記得人名的哲哲竟然會主動說 xxx成日喊, 比老師叫佢收聲; 又或者 xxx唔無訓覺, 黎老師正在玩電腦 (咁細個就識報串講老師壞話?) 聽著哲哲說吳老師戴眼鏡, 梁老師好肥講野好大聲, 雲姐幫佢換片片...等等就覺得哲哲對所有老師同學都自有一套記住的方法
認得校長老師書記, 那同學仔呢? 放學的時候, 哲哲會好熱情同所有認識/不認識的同學說再見; 在街上見到穿同校校服的哥哥姐姐也會說是同班同學; 還記得有次放學經過大家樂門口撞到同學仔, 哲哲笑住問對方: 點解會見到你架? 做咩放學唔返屋企架? (人仔細細成個訓導主任管住晒, 叫哲哲做管家仔真的沒有錯~) 有天哲哲和我說:
「媽咪, 我鐘意馮臻」
「馮臻? 哦, 你指臻臻, 臻臻姓劉, 唔係姓馮架」
「唔係丫, 係馮臻, 馮臻呀~~」
「真係叫馮臻? 咁馮臻係男仔定女仔呀?」
「係女仔, 仲有, 我仲鐘意王詩霖, 岑寶兒...同埋鄭詠瑤呀~~」
哲哲說時樣子甜絲絲, 做娘的幾乎笑到暈低...問起哲哲為什麼鐘意馮臻同王詩霖, 哲哲說她們講野很細聲, 無扭計所以很喜歡她們 (個腦淨係記得女同學名? 咁細個已經喜歡女同學?, 不過都算哲哲有眼光, 識揀溫文有禮, 而我更八卦到回校叫哲哲介紹給我認識誰是王同學及馮同學, 呵呵, 都是個小美人來的~~)
十月份因為哲哲病了, 斷斷續續只上了兩星期課, 雖然如此, 這段期間哲哲學識了很多東西, 包括以往我沒有教的東西: 普通話及認字
有天和哲哲聊天時, 哲哲提起普通話這三個字, 當時就覺得奇怪怎麼哲哲會認識普通話, 那時我還不知道原來學校每星期有一堂普通話堂. 哲哲會扮起老師說: 嘴巴, 鼻子. 看著哲哲吐著不純正的國語口音我就覺得好好笑
我是一個懶媽媽, 只教了哲哲日常生活的東西, 學術方面真的一點也不會教. 有天哲哲主動要翻開認字簿, 竟然認得「月, 日, 人, 火」這四個字, 還懂得說: 月字係橫直勾; 日字就好似個雪櫃咁; 人字有兩隻腳...(真的要給老師拍爛手掌的掌聲才行!!!)
暫時來說哲哲都挺喜歡看認字簿, 現在更會在街上四處認學過的字 (其實來去都只是月日人火, 見到自己的瑜字也會分折來看成月字, 哈哈)
學校時間表. 午睡的時間特別長, 雖然有點呃錢, 不過哲哲每天都會睡上一至兩個半小時不等, 所以...還可以吧
沒有留言:
張貼留言