哲哲歲半的慶祝活動
在酷熱警告下去了海洋公園
一切都是即興的
原先只打算請日假和哲哲回健康院覆診
機緣巧合在淘寶認識了一位賣家
剛好有張免費飛入海洋公園
見就快過期自己又去唔到於是連貨一起送到香港給我
確定收到入場劵前一刻是昨天的下午
正所謂: 用得唔好晒! 仲要唔洗錢!
不過因為只得一張免費劵
去到 counter我申請了全年金卡會藉
計埋今次, 去多兩次就回本了!
落車無耐, 去到門口都已經熱到底都濕晒, 唔係因為唔洗錢同得返兩日限期, 真係想即刻走人第日先黎
第一站先到鱷魚館, 因為天氣太熱, 連鱷魚都懶得郁動, 看到的那條鱷魚浸在水中涼浸浸
鱷魚館隔鄰就是熊貓館, 不過入到去好難先見到熊貓, 亦因為熊貓長時間都在訓, 所以哲哲基本上都看不到會動的那隻就是熊貓 (我懷疑哲哲可能以為只是一堆黑白色的石頭)
見完熊貓, 哲哲走到精品店對這隻熊貓帽愛不釋手, 幸好哲哲只是三分鐘熱度, 玩夠就走
冰河世紀III近期咁 hit, 入到活龍活現怎能過門不入? 來到這條時空隧道, 站在橋中心, 兩側的轉轉會令你頭暈, 好似成個人都跟住一齊打圈轉, 不過哲哲就覺得好好笑, 笑到卡卡聲!
難得一張望鏡頭又識笑既合照! 多得鏡頭背後一個噴水的機關, 海洋公園的人員又很合作地等到背後的機關出聲噴水, 就在哲哲發笑的一刻, 咔唰, 拍照囉~
黎到海洋公園點可以唔搭纜車?! 不過哲哲同哲爸一樣, 死抓住我唔放, 咁第時無人陪我玩過山車囉?
海洋公園擴建中 (左上角), 未知第時變成點呢?
上到山頂, 第一時間要醫肚先! 唔想花費太多去餐館食 (但真係好熱, 餐館先有冷氣嘆), 於是去左食深海潛艇! 哲爸食緊海洋公園既深海潛艇, 材料豐富, 有車打芝士, 燒雞, 燒牛肉, 青瓜蕃茄洋蔥片等等, 即叫即製而且鋪得好有層次, $35另加 $10有 10安士杯裝可樂, 爽晒 kur晒! (全年會藉另有 9折)
當我地正在買餐時
哲哲突然無電坐坐下跌左落架 bb車度, 訓左...
(真係好突然, 買餐前一刻仲眼仔碌碌, 就o係我地買餐無人為意佢就即刻訓著, good boy!)
由於哲哲都睡了
還好, 我們可以鬆一鬆慢慢邊行邊食
可以食住嘆冷氣, 哲哲又可以訓得舒服 d唔洗咁熱
只要等哲哲訓夠就差唔多時候睇海洋劇場
去到海洋館
見到好多魔鬼魚同其他海洋生物
差不多走完整個館哲哲才醒來
緣慳一面
既然哲哲醒了
於是早點到海洋劇場霸定頭位睇 show
不過一入門口就聽到廣播 3:30p.m.場 show已經全場爆滿
full晒? 唔係掛...依家 3p.m.未到, 洗唔洗咁誇呀?
我同哲爸見到看台仲有靚位
不過明顯地是留給貴賓坐的
原來那是留給金銀卡全年會員的
只要入場前講明想睇邊一場同坐邊一個位置
海洋公園就會幫你 reserve個位
今次我們不知道, 下次再黎一定要預早 book定位先得!
既然睇唔到海洋劇場
於是去了看水母萬花筒
場館說明不準用閃光燈, 免得打擾及驚嚇小水母, 不過依然有很多人懶理照閃
睇完水母又去到太平洋海岸餵海獅
剛剛好趕得及排隊買份鮮魚親自餵海獅
$25份有 3條鮮魚, 機會要好好把握 (全年會藉有買一送一). 不過略嫌哲爸未能將鮮魚拋高, 所以海獅無機會 show quali撲上水吃魚魚, 只能游到魚的位置吃, 未知哲哲睇唔睇到海獅的全相呢?
見玩到差唔多
哲哲都有點倦
於是就下山到集古村 (即大樹灣入口, 今期的主題是史前水世界)
第一站是找化骨龍, 不過哲哲鐘意純玩沙多過找化骨龍=.=
原先想去石器水世界玩大水桶或肥皂泡泡
不過見到入面班大朋友玩到好狼
行近 d都會由頭濕到透果隻
所以都係迴避一下好了
來到最後一站是恐龍帝國. 原先都覺得睇假既恐龍, 又唔恐怖仲好無聊下, 不過入場前有張地圖, 比你去到各分站搜集一共六隻不同品種的恐龍水印, 算是加添了趣味性
玩到差唔多 5:30p.m.就搭穿梭巴士出正門搭車到奶奶家吃晚飯
諗返起都覺得自己貪小便宜
熱到成 35度高溫仲去乾煎
難為哲哲陪我兩老一齊受罪
幸好炎熱的天氣下我們沒有帶大相機 (dc仔半壞狀態, 帶大機又會拎死自己!)
臨時臨急問了彭 sir借了防水相機
不過到場無耐影幾張就無電
而且影出來的質素也麻麻
還是快點買返部 dc仔旁身先得
原本打算買即日入場飛 ($208)就算
不過見金卡 ($628)都好多優惠
而且去三轉就回本
於是即場 join了金卡
其實我自己覺得銀卡 ($478)會抵一點
反正所得的優惠相同
只是星期六中午後及星期日公眾假期不能入場又有什麼所謂?
入得場玩就緊係玩足全日
點會星期六中午後先入呢?
再者星期六日公眾假期咁多人又唔會黎既
哲爸大部份都是例放平日
銀卡對我們來說好似適合一點
不過哲爸話相差 $150就唔好煩
一於金卡啦~
海洋公園全年會藉其實比迪迪尼更合我心意
一來海洋公園教育性較重
二來附送的一本優惠冊入面的折扣優惠都幾實際合用
買門票又有 85折
免費全日泊車
飲飲食食玩遊戲買紀念品有優惠唔在話下
最吸引是生日月份可免費換領 4張門票 (仲唔抵返晒?!)
好期待好快又可以同哲哲一齊入去睇海洋劇場同威威見面呀~
沒有留言:
張貼留言