懷孕第九個月

仔都生埋了, 還是快手紀錄埋最後一個月的懷孕二三事吧 

第九個月 (feb 18 to mar 17)

自新年後, 每晚正式和哲爸分開訓, 自此一直都睡得不錯, 雖然半夜會起身vv, 但都好快訓得返, 精神也比之前幾個月好得多了

宮縮好密, 印象中比上胎來得更早更密, 早上還好, 一到晚上幾乎五分鐘就硬一次+腰痛, 半夜最多陰陰痛同腰赤, 害我半夜每次去vv時都緊張有無見紅, 那種感覺實在太像「初一要出世了」

個肚終於不再35吋了, 之前一直兩三個月磅數無特別增加, 肚圍亦沒有變大, 最後一個月突然發力, 或許是我比之前放鬆了心情, 吃得比之前更兇天自在, 每晚雪糕甜品宵夜總是少不了

不知是不是肚皮薄的關係, 感覺初一的手腳動上來好似就快爆出黎, 好痛好痛, 臨生前最後一個星期個肚變得好墜, 每走一步路都好似失禁快要尿出來, 所以沒有遠行, 不敢出街玩, 頂多約朋友吃飯/屋企聚會

和上胎一樣, 都無咩食清胎毒野, 拖到39w先第一次食腐竹蛋糖水, 其實由一開始懷孕都斷斷續續有飲涼茶食涼野, 或許身體適應了, 沒有什麼不舒服

奶奶也在最後一星期回來過夜, 方便半夜我作動上來多個人照應, 早上返學時由哲爸管送, 中午放學有時奶奶回來接放學, 趕不到就我慢慢的爬去接, 但很辛苦, 常常有想vv的感覺呢

最後一個月雖然身體很笨重又不太敢出街約朋友玩(怕出街穿水=.=), 不過哲哲都好乖, 在家會自己同自己玩, 比我多多休息, 又成日貼著肚皮唱學校校的詩歌比初一聽. 我和哲哲說細佬很快便會出世, 哲哲不捨得大肚子, 笑住同我講「媽咪, 我想天父賜多個bb比我地丫」(哲哲, 雖然媽咪都好想一直生, 不過已經無能力啦...)

體重: 106-109磅

肚圍: 35-38吋