apr 14
最近和細佬換片的時候, 發覺片片cool住個脾仔, 人也拉長了, 樣子看上去也沒有之前咁瘦咁醜樣, 面仔包左, 手腳肥左dd, 就連心口肉都厚了. 看到這些實質的變化, 更肯定自己的心機是沒有白費
早前成日谷奶半夜痛醒, 又或者訓訓下發現床單漏濕晒既情況都不見了, 身體慢慢適應了細佬所需既奶量而作出了調節
照顧上來, 也漸漸捉摸到細佬的脾性, 開始知道佢既喊聲有咩需要, 例如食奶中途會扭來扭去, 就可能是頂住道氣, 要掃掃風才繼續食; 有時喊得太久, 其實是想找奶頭啜啜, 找尋安全感. 喊聲方面也不同了, 之前像貓叫, 細細聲沙沙啞啞, 十二朝後惡左好多, 開始喊得好大聲, 有時仲喊到斷晒片啞聲tim!
細佬也真識貨, 最喜歡邊啜奶邊伏在我心口訓覺, 就算我著住衫, 都會伸隻手入去摸住咪咪, 一臉滿足的訓. 呢一刻就算幾倦幾辛苦想放低細佬落床訓亦唔捨得, 多謝細佬填補了我上胎無盡力餵人奶的失落, 多謝細佬帶給我這親密, 心連心的體會
apr 17
滿月了! 這幾天日間清醒的時間多了, 眼仔碌碌成日周圍望, 手手腳腳仲郁郁下會自己同自己玩. 食親奶最搞笑的環節就是總會邊食邊痾poo poo! 通常食前痾一次, 食緊又痾一次, 食完又會痾多次, 仲要係食食下奶無先兆既炮彈式poo poo, 有幾次半夜餵奶時, 突如其來既巨響嚇醒左正在訓覺的哲爸呢~
未滿月都已經很喜歡這樣比人棟直來抱, 稍為打橫就會即喊
回想起來, 倒也掛念坐月的日子, 每次餵奶總是拿著兩個枕頭, 一個墊腰骨, 一個放在大腿上讓細佬枕著啜, 腳也踏住一個矮櫈(新手奶媽就是很規矩的依著母乳姑娘所教的姿勢). 每一晚就是這樣的邊看「三國」邊餵夜奶, 那就可以慢慢的讓細佬迷迷糊糊的飲到訓著, 時間也就易點過
apr 24
日子有功, 細佬啜奶的技巧叻左, 我也不再需要每次托住咪咪及矯正細佬的嘴型, 就算甩嘴了, 也識自己搵岩啜返. 亦因為細佬啜得快左, 出奶也暢順, 我們合作得越來越好呢~
(有點變態的說)我越來越享受比細佬啜啜的感覺, 除了視覺及心靈上得到滿足同欣慰之外, 當石頭胸被啜到舒舒服服時, 細佬又有得益喝到奶, 感覺很爽; 當看到細佬鐘意用面在奶頭摔來摔去就覺得好得意(好似貓咪見到親近的人會用身子不停的在腳邊磨來磨去)
細佬常常扎醒, 睡不久, 陪月姨姨說用包被這樣扎會睡得好一點
apr 29
食飽奶會郁手郁腳自己玩, 開始也發單音逗人理他了, 玩到咁上下扭計時即示意要啜啜扭抱扭眼訓了. 頭部能夠左右自如郁動, 也明白了早晚之分
bebe dream的high chair椅套終於有貨了. 安了上去, 細佬似乎很喜歡, 以往晚上在bb床總是扭計不肯訓時, 一放落high chair竟可訓上兩三小時, 有時甚至skip了11:30p.m.那餐奶直訓到2a.m.才醒來
may 5
開始能夠沖完涼食奶一覺由11:30p.m.訓到4-5a.m.才醒來, 有時更6a.m.才吃, 人奶b來說, 算是很快就自動戒左夜奶, 因為人奶水份較重易消化, 會快一點肚餓, 雖然細佬這樣快戒了大家可以多點時間休息, 不過我卻谷住谷住有時會痛, 真是左右為難呢~
(有很多人以為最夜一餐食奶粉可以頂肚一點訓耐點, 其實奶粉不是夠飽頂肚, 而是難消化, 需要用更長更多的時間同能量去消化同吸收)
早上餵過第一餐, 通常就會放在我旁邊, 好讓隨時喊上來要吃就自助餐, 我也多點時間休息
沒有留言:
張貼留言