小語錄

很久沒有紀錄哲哲的小語錄, 因為和哲哲談話, 感覺就不像和一個孩童說話, 習以為常就覺得沒什麼特別了, 這次有點心甜小事想記下

聖誕, 做冬, 除夕元旦, 一連幾個高興的節日, 以為食得豐豐富富, 大家會更開胃高興, 可是哲哲這幾天不停嚷著說, 好想好想吃粟米肉粒飯. 就連出外餐廳食飯都說要吃粟米肉粒飯. 問真d, 原來哲哲話好鐘意食我煮既粟米肉粒飯, 因為好耐無煮, 所以好想食.

珍饈百味, 三餸一湯, 在哲哲心目中算不上什麼, 倒不如一個簡簡單單既飯才最合口味. 聽到時個心甜到漏, 好喇, 一於聽日煮個粟米肉粒飯比哲哲食啦

「咦, 媽咪, 點解今日有d小朋友要返學既?」

「今日人人都放完聖誕假, 大人要返工, 有d小朋友要返學啦, 你睇下你幾幸福, 話想去宜家傢俬, 媽咪就即刻執野揹住細佬同你走出去」

「唔係喎, 媽咪, 好似你幸福d喎, 你日日都唔洗返工, 又唔洗返學, 我有時都要返學啦, 邊有你咁幸福, 可以日日o係屋企陪我地玩先!」

咦?! 岩喎

某日哲哲將擦膠個套整出左黎, 套唔返入去就發脾氣

我:「緊係啦, 唔係樣樣野整左出黎都塞得返入去架嘛」

哲哲:「係咪好似痾左舊屎咁, 塞唔返入個pat pat度呀?」

這個例子...創意貼切得黎有點dirty喎...

又某天在信箱取信, 哲哲幫手拿信時看到沒有自己的名字...

「咦, 媽咪, 點解郵差叔叔成日都唔寄信比我既?」

「呢d係寄比爸爸既帳同銀行信單黎, 要比錢架」

「要比錢架? 咁我要快d大個, 比錢郵差叔叔寄信比我先!」