哲哲六歲生日會 (當日篇)

jan 5

定好生日會日子, 確實了場地之後, 哲哲很期待很期待, 每天都說要抄定同學朋友仔既名字同會所地點好讓他們早點知道出席

當知道有些朋友和同學不能出席時, 哲哲有點氣惱:「搞錯呀, 我請佢地黎玩, 佢地又唔黎, 下次我唔請佢地喇. 我要記住晒佢地, 以後淨係請黎左既朋友先得」

(仔丫...朋友仔黎唔到都無辦法, 唔好唔開心啦, 佢地都唔想嘛)

生日會的前一晚...

「媽咪, 我好緊張呀, 聽日就生日會啦, 我好期待呀...唔知生日會做主角係點既呢?」

不擅表達情感的哲哲, 鮮有地說出自己的感受, 想不到哲哲會這麼期待. 雖然口裡說很緊張, 但看到他笑意盈盈, 是既驚且喜吧~

生日會的早上, 哲哲一早起床陪我們執生日會的物資. 去到會所, 已經有小朋友到來了, 我請哲哲陪同學仔玩, 既然是主角, 就要好好招呼客人. 最後也不忘和哲哲說: 不用緊張, 生日會最緊要盡情玩, 盡情笑, 其餘既就交比爸爸媽媽為你準備吧~ 

先說一說這次生日會的rundown:

2p.m.開始, set場, 小朋友自由活動

2:45p.m.開餐

3:30p.m.玩集體遊戲, 派發小禮物

4:15p.m.切蛋糕, 合照時間

4:30p.m. pinata

5p.m.完場, 移師到會所遊戲室繼續放電 

襯我們set場的時候, 為怕小朋友悶, 又不想他們太早上遊戲室玩, 所以準備了一些小氣球, 一個小帳蓬同埋一部夾糖機. 玩具反斗城買既小氣球好鬼渣, 吹時爆了幾個, 拍兩下又爆多幾個, 最後竟然一個無淨, 想留比小朋友拎返屋企玩都無...

嘩!!! 成班怪獸拆屋呀! 原本諗住個帳蓬可以比d細既小朋友玩, 點知連大朋友都黎拆檔, 走鬼丫~~

夾糖機真係小朋友party必備之物, 細細部幾十蚊, 可以令班小朋友乖乖咁坐定定夾糖, 平時無咩機會玩, 難得可以任夾唔嬲, 好受小朋友歡迎呢~

見d朋友仔都黎得七七八八, 開餐啦! 食物好豐富呢, 有意粉雞翼串燒pizza菠蘿腸仔小食拼盤同甜品, 話咁快就食晒lu~

食飽之後就開始遊戲了, 第一個遊戲玩收賣佬, 一開始熱下身先...

「我要小童八達通!」

「再黎要五隻右腳既鞋」「劉生, 你好似除錯腳喎...」

睇下班小朋友玩到幾肉緊, 哲爸頓時變得好受歡迎丫(錯覺XDDDD)

收賣佬遊戲一度鬧出「蝦碌」事件: 話說哲爸臨時爆肚要收集鐵閘/信箱鎖匙, 完了後因為條條鎖匙差唔多樣, 有朋友仔調亂了, 原來的那條不知所終, 一度玩到無屋企返, 幸好最後都搵返物主對調返, 好彩耶~~

「蝦碌」事件急急退場, 第二個遊戲係有口難言. 班小朋友好踴躍參與, 仲好好想像力, 扮果個發揮想像力落力演繹, 估果個更勁, 有d咁難估都估得中, 果然小朋友既思維先至係同一個channel, 哈哈

玩到最後一個遊戲啦! 最後的遊戲叫解碼遊戲. 一人派一張數字謎題, 要在場地隱藏的各處找回對應的英文字而組成的一個英文生字, 每一組的英文生字都是不同的, 如smart, helpful, kind等等這些我們對哲哲的期望與祝福. 這個遊戲大人小朋友跑足全場, 一路搵解碼, 一路對下有無抄錯英文字, 動下腦筋, 又可以學學生字, 個個都好投入咁四圍跑, 成個場好熱鬧!

遊戲玩完lu, 我們準備了小小心意給小朋友. 為怕哲哲和小朋友爭禮物, 先前已經讓哲哲揀了兩盒小lego留給自己及細佬, 所以當天哲哲好乖咁只係幫朋友仔「幫下眼」咁揀禮物. 見到d小朋友左睇右睇都未揀定, 有d就已經好快揀到心頭好, 真係覺得佢地好可愛呀!

登登登櫈! 叮噹生日蛋糕黎啦! 唔知哲哲第一眼見到叮噹既生日蛋糕有無好驚喜呢? 唱生日蛋糕時, 又有「蝦碌」事件發生: 唱完生日歌先發現, 原來我未點蠟燭, 哈哈, 唯有呃多一次生日歌啦~

(p.s. 非常感激杏子, 原來一班人唱生日歌個氣氛係咁美好, 一直都後悔沒有拍低整個過程, 幸好杏子在旁有拍到呢個precious moments, 好多謝你呀~~)

有咁多位朋友仔能夠陪哲哲渡過六歲既生日, 今個生日係最熱鬧既一個生日

整個生日會既高潮黎啦! 一人手握一條繩, 齊齊拉開, 睇下邊條繩可以打開個pinata. 預備: 1...2...3, 仲企係度? 執糖啦喂XDDDD

場面一度混亂, 幸好人人有糖食, 派完禮物又派糖, keep住好氣氛~~

party完結之後, 小朋友齊齊移師到遊戲室玩. 海典居既遊戲室又新淨又好玩, 成班小朋友玩到唔捨得走, 哲哲仲問幾時可以再黎呢度玩tim!

呼...總算順利完成個生日會了, 要問有哪些地方可以改善:

- 或許下次會再早一點通知朋友, 今次時間有點趕, 約不齊所有同學朋友仔呢

- 蛋糕試過立體的就算, 下次買回普通的, 可以將生日會既支出大大減低

- 最重要的一點, 是一定要找個專業的攝影師為我們留下美好既回憶. 今次因為我和哲爸要落手落腳做準備, 於是拜托了平時喜歡拍照的伯伯幫我們影相, 可是回家才發覺當天的相奇少, 鬆郁矇都算了, 主角是哲哲也沒多少張相. 歸究原因, 我們想是因為伯伯平常拍風景照多, 要他走來走去拍小朋友有難度吧

晚上, 哲哲急不及待逐一拆禮物. 看到一檯子的禮物, 多謝朋友們對哲哲的愛鍚, 這些禮物足夠哲哲玩兩年了. 第一次收到這麼多禮物的哲哲, 非常滿足

「哲哲, 第一次開生日會, 你今日玩得開唔開心呀? 鐘唔鐘意個蛋糕呀?」

「好開心呀媽咪, 我今日真係非常之興奮, 簡直開心到唔想訓tim, 我真係好多謝你搞個生日會比我丫」

「我都覺得今日好開心呀, 今年開左生日會, 下年未必開架啦, 搞一個生日會其實好花費, 果d錢足夠我地去迪士尼住一晚酒店了」

「下...雖然我好想住迪士尼酒店, 但開生日會有咁多人陪我一齊玩又有咁多禮物, 媽咪, 我想出年都開生日會, 不如七歲八歲九歲都開生日會啦」 

講了很多年的生日會, 終於在你六歲生日的時候做到了. 雖然只是個平實的小派對, 也未能請到所有朋友仔, 但我們最重要, 最重視的親朋好友都到齊給你祝福, 是不是很感恩呢?

你常說自己好像大雄, 又懶又唔識游水, 成日功課零蛋又不受歡迎, 你說很羨慕大雄有叮噹幫佢解決事情, 羨慕大雄有叮噹這個最值得信賴最要好的朋友. 爸爸媽媽希望你早日找到人生路上的叮噹, 能夠和你互相扶持做一輩子的好朋友

哲, 生日快樂, 祝你身體健康, 知足常樂