自動波

自從升上小二後 我都無特別幫哲哲對功課, 要是手冊抄錯抄漏, 功課做錯, 都係佢自己負責, 托賴咁耐以黎除左有一兩次欠交之外, 都無咩大事發生

最近哲哲變得越來越自動波, 閒時會有唔同科既評估出現, 見分數唔錯, 即是所學的東西都識了, 於是無理簽名就是了. 後來又出現默書簿, 還有久唔久聽同學媽媽提的口頭報告, 屋企從來唔見有溫過練習過, 手冊亦無寫到, 返到黎只係需要簽個名就交得. 本來諗住, 哲哲搞得掂, 唔洗我操心也就算

臨近大考, 這情況變本加厲, 昨天有同學媽媽在群組問, 星期五的電腦試如何溫習




咩話? 星期五考電腦試? 從來無聽哲哲提過, 手冊又無寫, 於是急急腳問哲哲什麼來的, 要不要溫習. 摷完成個書包都係得兩三張摷蚊蚊既筆記同一張練習打英文字既紙. 正想問張紙係咩黎...

「哦, 呢張咪今次電腦應用試考既野囉。」
「咁你溫左未? 係咪今個星期五考?」
「考左架喇, 上個星期既事黎。星期五係考五碼同另一樣既電腦野。」
「下? 考左? 你有練習過咩?」
「有~ 我打機時練習埋架喇」(暈)
「咁究竟你仲有d 咩係要默丫, 要評估要考而又無話我知架?」
「err...下個禮拜一要數學評估, 同埋前幾日既英默...」

點解無寫手冊? 點解唔洗溫書既? 分明就係懶, 唔想溫, 於是唔寫手冊唔出聲就算喇. 睇埋本英默, 直頭唔合格添! 今次仲唔斷正, 無說話好講喇掛...

平時自己搞得掂可以理少樣絕對係一件好事, 做媽媽既一定會好安慰, 但連考試都唔出聲又唔溫習, 係咪真係對自己咁有信心先? 我又係咪可以放手由佢呢?