日與夜。兩個我

2014年6月5日星期四

【裝修】搬屋記 (上)

may 23

不得不說, 女人真係強, 兩個女人仔, 帶住兩個細路, 一個接返放學, 一個留家繼續最後努力執屋pack箱, 由早到晚無停, 幾個鐘內將間屋還原得七七八八, 真係唔講得笑

約左今日下午搬屋, 因為上午還要帶哲返學彩排畢業禮, 唉, 屋企仲有好多濕星野未執, 時間一點一點的溜走, 開始有d擔心執唔切

本來約搬屋公司兩點半, 好等接完哲哲放學食完lunch先開波, 點知搬屋公司提早到來, 唯有奶奶先帶住細佬接哲哲, 我留守家中等候. 時間到, 仲未執好晒野, 搬屋公司的五位大漢已經殺氣騰騰咁分頭行事, 有位師傅見我仍努力入箱中, 問準我幫手摺箱將我d雜物pack好搬走. 三兩下省手, 屋企所有箱同大件傢私都移走了

2014年6月3日星期二

自己屋企影靚相 (二)

早幾日應承幫朋友拍初生bb照, 在櫃桶找回毛毛氈冷帽仔, 諗起以前同細佬係屋企影過d造型照, 襯今日陽光唔錯, 心血來潮和細佬影返幾張先!

半歲時既細佬成個呆佬無黎表情, 依家識擺chok樣囉XDDD

2014年5月30日星期五

【裝修】進口磚? 大陸磚? 返深圳買? 定香港買?

apr 10

走過了很多鋪頭, 也看過了很多不同產地的地磚, 得出總結: 進口磚不論在色澤紋理同款式方面比大陸磚優勝, 價錢自然比大陸磚貴一截, 雖然某些鋪頭會有特價既進口磚, 價錢猶如大陸磚般吸引, 可是產地及牌子不出名, 質素分分鐘和大陸磚比好不了多少

基於有保證既進口磚太貴我們買不起, 特價的進口磚又不敢搏, 最後上網一輪research, 發覺中國十大名牌磚當中, 樓蘭同馬可波羅比較多人推介, 決定大膽試用大陸磚

鎖定目標買大陸磚後, 究竟返大陸買, 還是在香港買好呢? 網上的意見很兩極, 以下節錄部份支持香港買磚網友既說法:

人民幣匯率貴, 時間車錢夾埋平不了多少, 香港買價錢唔差得遠, 有咩問題香港容易follow, 可以返鋪磚換磚鋪磚都方便d
大陸d鋪放出黎display既磚又直又靚, 到你訂果陣可能比d唔平又曲既次等貨你, 加上運輸粗手粗腳, d磚唔係崩口就裂邊, 落到黎爛緊1/3唔係奇事, 唔夠又要上去補貨, 車錢時間同運輸錢都蝕晒. 如果有人介紹邊間買得過我就會買, 盲中中搵間無熟人介紹既就唔夠膽試
大陸地磚, 同一牌子都分幾個等級, 比你睇就優等, 落到黎就劣等. 價錢平貴同質素冇關. 個個都係博你唔識, 開高幾倍再減一半俾你, 都依然勁賺你, 然後再俾最差品質既你
間屋住十年廿年, 買好d穩陣少少, 少獲氣襟住都抵返晒. 貴幾千都o係香港買埋算了, 幾千o係條裝修大數里面都唔算得係乜野錢, 但慳左少少, 出了問題影響就好大了, 分分鍾成個工程拖住哂…
計錯所需要既磚既數量 (過多/過少), 補磚既批次又可能唔同色
買大陸磚無問題, 但最好香港買大陸磚. 因為大陸分好多grading, 除非識人有人refer邊間有信譽, 否則落左d次貨唔通成噸托返上去又要自己follow up?
運費條數無得計, 運輸開幾多錢連費任佢講, 唔通你唔比由得幾噸磚自己抬咩

2014年5月28日星期三

【裝修】搬屋公司邊間好?

may 7

搵到短租後, 求其在通勝擇個吉日決定找搬屋公司報價. 為怕星期六日搬屋人多full booking, 我們決定揀星期五, 一來少點人, 二來搬家後有星期六日兩天可以留家unpack

日子選定後, 點算了家中大約要搬走的大件傢私電器, 上網看到兩間信譽不錯多人推薦的搬屋公司:

寶信. 這間在facebook某煮食group有好幾位姐妹推介, 價錢稍貴, 但好手尾又無損毀. 寶信有一套報價程序, 先在官網填表格, 表格有詳細既資料要填, 填好後隔日就回覆了有關價錢. 依這次為例, 寶信回覆提供三十五個紙箱, 封箱膠紙同bubble紙, 幾件大型電器傢私連鋼琴(琴送回娘家, 當一個新的地點計), 不需抬樓梯, 價錢要$4180
立順. 同樣都是在facebook group內姐妹分享的, 同等條件, 電話報價$3600, 包四十個紙箱和封箱膠紙, 如需bubble紙另加$100/卷

和預算差不多, 本來打算約實立順就算. 突然醒起, 要搬屋, 點解唔搵搬屋達人既珍姐呢? 果然一問珍姐即刻有好介紹, 珍姐這幾年大大小小搬了無數次, 每次都找同一間搬屋公司, 一問之下價錢果然至抵, 有珍姐介紹直情放心晒