大哥哥風範

當了哥哥的哲哲, 認為bb要聽晒佢話(正如佢要聽我地話一樣), 雖然初一未出世, 但已經想像到到時哲哲會擺起個哥哥款, 而哲哲和初一的對話, 很多時都顯其古靈精怪一面 

「哲哲, 第日bb出世, 你係哥哥黎架, 你要愛鍚佢, 你要做個好榜樣, 你做壞事, bb又跟你做壞事, 你做好事, bb又會跟你做好事, 你要同bb分享你既玩具, 有時仲要幫手照顧bb, 你做唔做到架?」

「做到~ 我會好鍚bb既, 我係大哥哥黎架啦, bb唔聽話我會話佢叫佢唔好!」

「bb可能好似你咁, 未必會成日咁聽話架喎, 咁你打算點呀?」

「我係大哥哥, 我講咩佢都要聽架啦, 佢唔聽我就唔鍚佢架囉」

「如果bb同你爭玩具爭野食呢? 咁點呀? 好似...bb想要白豆, 你比唔比?」「我比啡豆佢囉」

「如果bb想要巴士, 你比唔比?」「我比小巴佢囉」

「咁...如果bb想要媽咪, 你比唔比?」 「我比爸爸佢囉」

嘩卡卡卡, 說到底哲哲都是不肯割愛, 這樣和哲哲的妙問妙答也挺有樂趣

「bb乖, 你乖我就比車車你玩」

「你打算點比架車車bb玩呀?」

「我打開個肚, 塞架車入去比bb玩囉, 哈哈」

有次我食完車仔麵, 可能太油膩, 結果作嘔了. 哲哲緊張的問:「bb係咪唔鐘意食車仔麵呀?」又有次我吃完意粉, 轉個頭哲哲望住我個肚:「媽咪頭先你食左意粉, 依家係咪輪到bb食啦?」. 哲哲對初一和我的關心, 不僅如此, 每次看到電視播放媽媽奶粉的廣告, 都會說:「媽咪, 果d奶奶係比bb同你飲, 你快d買黎飲啦~」

現在哲哲每天都會不定時和初一傾計說笑, 有時在街會突然問我「我想依家鍚bb, 得唔得呀?」出街的時候, 又會處處想著初一:

「媽咪, 我想帶bb去白雪姨姨屋企/遊戲室/游水玩, 好無呀?」

「下? bb都未出世...而且bb仲好細, 佢都未識行, 又唔識跑, 玩唔到架bor...」

「咁我抱住佢玩囉, 我係哥哥黎架啦, 我好大力架, 我抱住佢一齊玩囉」

有次和哲哲說故事期間, 突然肚痛, 打擾了哲哲的雅致, 哲哲貼著我的肚皮和初一訓話:

「bb, 嗱, 你好乖乖啦, 我唔鐘意你曳架, 你好乖乖地o係入面訓覺啦」

(然之後自問自答吊高把聲)「知道啦, 我唔會啦」

「哲哲, 你話bb呀?」

「係呀, 因為佢唔乖, 雖然佢仲好細個, 不過佢聽到我講野架, 我係哥哥嘛, 我講咩佢都要聽架啦」

哲哲這個哥哥...果然不是一個簡單的角色, 看來初一既耳仔將來有排受了, 呵呵