第一次戶外踩單車 @日出康城單車徑

oct 21

在森林~~和原野~~是多麼自由消遙...

秋天來了, 最適合到戶外踩單車. 呢一日我地同表叔表姑們齊齊到日出康城踩單車, 我等了戶外踩單車這個機會好久了!

將軍澳站吃過lunch, 在地鐵A出口的橫過寶盈花園就看到一家單車鋪, 獨市生意, d單車都好殘下, 假日全日$70, 段鐘計就$15/小時, 真係幾貴...

未出發, 先興奮! 咁快就同皓皓表叔鬥車? 唔好曬晒d力一陣無力踩喎~

我們一行十一人花了一段時間試好車, 終於都出發了. 由寶盈花園的右手邊一直行, 沿途有條正在維修的單車徑, 一直的向下踩, 看到「康城路」的路牌就沒錯了

這條單車徑在今年的六月初開, 雖然位於康城路, 但不是康城的住客都可以自由使用. 這天除了有一家大小來踩單車學單車, 也有途人拖狗隻散步, 又或者有老人家組團邊行行人徑邊看風景呢~

起初都有點擔心今天這個單車約會會踩不成, 哲哲本來就不喜歡踩單車(因為不懂踩), 平時又沒有單車可以練習, 幸好找到這架岩哲哲身型的單車, 哲哲又踩得幾順利, 不論上斜落斜都肯嘗試, 還好啦...

這裡就是日出康城嗎? 果然好寫意, 對住一片海及夕陽, 好令人羨慕的安樂居

呢條單車徑確實很適合小朋友/初學單車來踩, 一來道路平坦又夠闊, 上斜同落斜都係溫和既幅度, 小朋友唔會因為好倦唔夠腳力而踩唔到, 好多時都係一條長直路去到尾, 好似哲哲呢d左右腳不協調既小朋友, 踩得唔好隨時落車要人幫, 都唔洗擔心條車路好窄周邊好多車穿插有危險, 而且第一次踩上來比較有成功感

兩老表合照. 睇住自己兩個仔大, 時間固然過得快, 見到阿聰由以前矮矮細小學雞到依家長到差不多有哲爸高, 成個人成熟晒!

踩到中段, 坐低休息下, 補充體力先!

細佬你就好啦, 有皓皓表叔幫你撥扇, 又有玥玥表姑幫你搖車, 睇下你托起隻腳成個大爺咁, 差在哲哲未幫你揼埋骨咋 XDDDD

哲哲, 攬實爸爸之餘, 你要小心踩穩個腳柄, 唔係一甩腳個單車轆就會車到你既...(大驚!)

雖然我同細佬無得踩, 但龜速的推著bb車, 陣陣風吹埋黎又睇下風景, 細佬訓醒幾轉, 醒來見爸爸小休有得試坐下架單車, 都好開心架~

奴婢陪太子出巡. 一袋二袋仲要推住架bb車追車隊, 人肉摩打腳兩粒幾鐘, 得閒時又要影埋相, 見到哲哲踩得唔順又要幫推一把, 某人之前仲話我推bb車既話會大幅落後, 叫我揹住細佬黎踩單車喎, 你話喇, 做阿媽係咪真係唔容易先...

周圍既環境真係令人好舒服, 咁光鮮潔淨既環境設施, 真係好想約埋哲哲d朋友仔再黎多一次. 條單車徑其實得好短, 我地蟻速咁踩, 來回都係用左兩小時, 一點都唔辛苦, 所以單車租兩個鐘就好足夠了

呢一日哲哲真係好抵讚! 第一次踩單車就要挑戰咁長途既路程, 上斜落斜都無扭計唔敢踩, 事後仲話原來踩單車同踩滑板係一樣咁好玩tim! 睇黎, 我同哲爸真係要諗諗, 點樣買架單車比哲哲同佢踩多d先得啦~