我要去打工 @bomcity

apr 1

數年前在圖書館看過一本書, 知道台灣有個baby boss可以讓小朋友打工感受箇中經驗, 已經計畫他日到台灣的時候一定要讓哲哲試下. 後來知道香港辦了bomcity, 性質類近, 「透過角色扮演, 將現實世界中的各行各業展現孩子眼前. 學習該角色專業的認知和體驗, 從而豐富對社會的認知, 培養孩子的價值觀及技能」. 見哲哲都五歲了, 應該會明白打工的意義, 於是和朋友仔一齊團購, 相約在這個天天都在下雨的復活假去打工了

預約了時間, 這天到了bomcity的門口, 大排長龍, 聽職員在電話裡頭說某些熱門職業名額有限, 先到先得, 估唔到早十零分鐘還是不夠, 香港人真的是什麼都要排, 連玩都要排...

登記好後, 職員給了我們一份小冊子, 一本打工手冊以及當日打工的當值時間. 有些職業如救護員很受歡迎而且名額少, 要好好計畫一下囉~

$292兩小時打工體驗可以參與三項不同職業, 價錢包一位小朋友加一位同行大人, 前一晚給哲哲略略說過有什麼職業, 思前想後, 度好當值表, 哲哲決定這天要試外科醫生, 油站服務員同救護員

外科醫生本來不是哲哲杯茶, 不過知道這天只有第一節有得玩外科醫生, 所以決定試一下

外科醫生的位置在最裡頭有白布擋住, 所以看不到內裡情況, 襯人群漸散, 靜靜雞拉開少少布簾...噢! 被發現了 XDDDDD

哲哲的第一份工, 賺到$5呢~

見等既過程太無聊, 周圍看看其他職業, 配藥員幾似樣wor...店鋪經理都好似幾好玩, 女孩子喜歡揀育嬰護士同美甲師, 聽講模特兒有個特大既T字台, 可以請爸爸媽媽在台下睇catwalk show tim!

油站服務員先前也不是在我們之列, 不過哲哲見到這個場咁吸引, 不停嚷著要玩, 結果外科醫生一完, 哲哲第一時間走去排隊, 幸運地外科醫生比較早完結, 所以成功地排到第一名~

鐘聲再次響起, 第二節開始了. 職員帶小朋友入房換上油站制服, 全部小朋友都要自己穿著, 無得扮大少要人幫呢~

換好衫, 職員帶到油站, 會教小朋友分辦哪個是柴油同電油, 要指示他們架車需要入哪一種汽油

(圖中那位小女孩個爸爸好鬼煩, 站在老遠都要不停叫個女擺pose比佢影相, 幾個家長都係咁, 搞到個職員遲遲完成唔到呢一part既打工體驗, 不時要叫d小朋友返黎打工唔好亂四圍走)

其實bomcity有大會攝影師為每一位小朋友拍照, 打工後可以買返d相, 三張優惠價$220, 好貴...

因為d家長同小朋友唔合作, 眼見哲哲最想玩既救護員, 亦係最受歡迎既職業之一名額快滿, 真係好谷氣, 到第三節鐘聲響起, 職員才省略某些打工程序快快下班, 又係除低制服衝去救護員排隊, 可惜...某d家長為左確保自己個小朋友可以得到救護員名額, 竟然代小朋友排隊

bomcity希望小朋友學懂時間管理, 盡量鼓勵小朋友親自排隊, 呢班家長襯小朋友在第二節打工時, 幫佢地排定隊好等佢地一下班就可以攝入有位玩. 因為咁, 哲哲自然失了救護員的工作機會

第三節鐘聲響起, 所有職業都開始了, 可是我們才剛下班, 其他的又給家長們預先排滿了, 真的不知道可以怎麼做, 幸好有職員知道我們的情況, 見救護員其實可以再加人, 主動的幫我們安排後補上去~

著好制服啦, 上車!

何解救護員這樣受歡迎? 去片!

https://youtu.be/SXrsigQay4M

去到另一邊的活動區, 原來今次個傷者係個bb丫

職員正在解說bb的情況, 教小朋友如何做心肺復甦法, 每個小朋友輪住用指頭按bb心口, 哲哲也做得似模似樣啊

急救完, 坐返架救護車走換好衫, 三節的打工體驗完結了. 每當完成一項職業會賺得$5, 所以這天哲哲賺到$15啦

拿著這$15走到花費區, 看了又看, 究竟哲哲會買晒$5/糖x3, 還是一塊旺旺仔$10+$5一粒糖呢? 要是女孩子的話, 應該會全花$15買下指甲油套餐了

開估!

貪吃既哲哲決定全數換晒糖, 三粒糖有排食!

數十個職業陸續有來, 朋友仔想玩的粵劇戲子今次沒有, 有點失望. 看看單張有些職業很有趣, 哲哲說下次再來的話, 想試藥劑師, 店鋪經理同主播, 好希望下次來可以和戰隊的成員一齊玩啊!

最後我想講...

• 雖然玩的排的是小朋友, 但家長們也有因排隊問題而有火藥味. 這天排兩節的職業都遇到家長們因排隊先後名額已滿或代排隊一事題而大鬧起來, 有兩位爸爸甚至想大打出手. 其實都係遊戲姐, 唔洗咁緊張...
• 每一次的打工時間都由不同的職員輪流帶領, 見朋友o第一節玩油站服務員好好玩的, 可是我們排第二節卻轉了另一位職員, 經驗不足, 很多時家長和小朋友離隊自顧自拍照, 嚴重影響流程及時間, 他也無能為力, 令哲哲最期待的環節 - 坐著架車遊一圈更因為overrun而取消, 哲哲好失望, 事後問他最好玩及最無聊的什麼. 本來最期待的油站服務員成了排第尾...
• 哲哲說bomcity打工好玩過飛虎雄心, 也是的, 比起飛虎雄心, 起碼家長們可以看到自己的小朋友在做什麼
• 有些職業好似很有趣, 如理財策劃顧問, 形式有點抽象, 太細個玩真係無咩意思, 小朋友亦一頭霧水, 還是留待年紀大一點有六七歲才玩吧 (可以上bomcity的官網看看該年齡的小朋友適合哪些職業)