分工合作的意思是...?

天氣炎熱, 哲哲已經放暑假了, 為了節省電費, 早上的時候會到有冷氣的地方嘆免費冷氣. 某早和哲哲到商場涼冷氣, 哲哲說要到巴士店睇車車, 那就去看看吧

「媽咪, 不如我地分工合作囉?!」

「嗯? 點分工合作法? 你講黎聽下」

正在好奇睇車車和分工合作可以扯上怎麼樣的關係呢? 於是請哲哲解釋我聽他的想法...

「嗱! 即係咁, 我睇車, 你比錢」

(嘩卡卡卡, 笑死我, 原來哲哲所指的是這回事, 哲哲也真是老實不客氣, 而且還一知半解呢~)

「唔得喎, 架車太貴啦, 我地玩一陣好放低啦, 之前講好只睇唔買架嘛, 唔係樣樣野都要買架」

「唔...都係$48姐, 爸爸返工多d錢, 今晚我叫爸爸買先~」

又某日, 我們又經過那間巴士店, 哲哲再次發揮他的小宇宙去說服我而達到目的

「媽咪, 我真係好鐘意呢架車喲...你睇下出面既廣告, 呢架係新車黎架!」

(望真d, 又真係幾靚喎...細細架其實$48都ok既, 只係平時真的甚少打開銀包比錢買哲哲要求買的東西, 一時之間不知點好, 一定要有d位明正言順買先得!)

「係bor...又真係好特別bor...哲哲係咪好鐘意丫?」

「係丫, 我真係好鐘意呢架車, 我會唔整爛架車, 唔會爆車, 玩完又會收好, 我會好愛惜玩具架」

(嘻嘻, 唔洗我開聲都知道, 要得到想要既野緊係有條件, 算佢醒目, 識講得出平時要我提點佢既野...)

「咁好啦, 今次就破例買一架比哲哲. 嗱, 你要記得頭先自己應承我既野, 做唔到既我要沒收返架」

「媽咪, 我都係唔要呢架, 我想要另一架. 你睇下, 另一架大架好多, 架巴士仲係藍色, 好特別好有型架」

(個衰仔又幾醒目喎! 哄到我落疊即刻轉軑買架大車, 一睇, 本來果架係迷你小巴士$48, 依家睇中果架係正常size的巴士, $99架!)

「呢架太貴啦, 呢架車既價錢可以買到兩架迷你巴士, 我只係應承你買細咋喎」

「嗱, 一係咁, 我揀兩架細既, 我唔貪心, 唔要架大巴士喇」

(......咁都叫唔貪心, 識咁樣不停比suggestion我又無發脾氣死lur要架大, 咁識做, 今次比個機會順下你意, 等你知道唔發脾氣不停游說係有甜頭先 )

新屎坑, 哲哲非常喜歡新車, 仲學識左落嘴頭不停甜絲絲的隔幾個鐘就「多謝媽咪」一次, 真係無佢符~

可是新車落地不久已經爛左個轆, 而且不止一次, 才剛買就已經跌爆車頭玻璃, 不是車頂甩蓋, 就是甩轆; 不喜歡的車被打入冷宮才能完整無缺. 雖說因為喜歡才會經常拿上手玩, 但看到哲哲玩得這樣粗暴真的很替這些玩具心痛, 下次我一定要狠心一點進行扣分制, 只要破壞一次就扣一粒星, 扣滿就沒收最喜歡的車直至行為有改善先得!