鼻敏感的故事

這天早上, 哲哲鼻敏感發作

「媽咪, 點解我成日鼻敏感架? 幾時先唔會鼻塞? 幾時先會好返? 點解爸爸傳染左比我咁耐都唔好返架!?」

這是哲哲有史以來, 第一次向我呻對鼻敏感的感受, 以往問他總說沒有問題

「哲哲, 呢d唔係叫傳染, 叫遺傳. 傳染係會好返的, 但遺傳是一世. 你鼻敏感可以食藥或者噴鼻舒服d, 但到你老左鼻敏感都一樣會存在, 唔會好返的」

「媽咪, 咩叫遺傳呀?」

「遺傳即係...例如爸爸媽咪隻眼係細既, 咁你同細佬隻眼都會係細, 我同爸爸都多頭髮, 所以你同細佬既頭髮亦會好多. 因為你地係我地既仔, 你身上既都遺傳左我同爸爸既特質」

「下, 但我唔想我隻眼咁細, 我想好似林諾熹隻眼咁大, 我覺得隻眼大好靚」

「點解呀? 哲哲, 我覺得你隻眼好靚bor, 唔一定眼大先叫靚, 眼細都可以好靚. 好似媽咪鐘意exo果個男仔隻眼都係細架, 要比d自信鐘意自己多d先得嘛」

(引申了另一個值得討論既課題「學習欣賞自己」, 日後再和哲哲詳談先得)

「咁係咪第日我同個眼大既女仔結婚, 我個仔就會眼大架啦?」

「咁又唔一定既, 遺傳係一件好神奇既事, 好似爸爸生得高, 我生得矮, 第日你同細佬唔知似邊個架, 可能似爸爸咁高, 又可能似我咁矮, 呢d要日後先知. 好似你遺傳左爸爸既鼻敏感, 如果你遺傳左我既體質咁你就唔會有鼻敏感喇. 」

「仲有, 遺傳又唔一定完全似晒是但一個. 你留心下細佬, 細佬隻眼同個嘴似爸爸, 但係個鼻就似我; 你有無留心mavis個樣? mavis個眼, 耳, 口, 鼻都全部似晒koko姨姨. 咁你呢? 你又覺得自己眼耳口鼻似邊個多d?」

「下! 咁咪幣? 如果似你咪好矮? 我會唔會十八歲都咁矮架?」

「呢層...所以咪就係叫你食多d飯, 做多d運動生高d囉!」

「如果第日真係咁矮, 咁我咪要搵一個同我一樣咁矮既女仔結婚先得?」

「咁又唔一定要搵返個矮既, 搵一個鐘意你, 你又鐘意佢, 佢對你好你又對佢好既女仔結婚就得喇. 結婚係一世架, 你都唔想你個老婆日日都鬧你對你唔好喇」

「但係咁高既女仔可能唔鐘意我唔同我結婚, 咁點算好呀?」

「假如你真係好鐘意佢, 咁你要不停咁對佢好, 等佢鐘意你, 如果佢都仲係唔鐘意你, 咁你就唔好再等啦, 揀一個都鐘意但無咁鐘意既去結婚啦」

「咁即係點呀?」

「例如你有份玩具好鐘意好想玩, 但唔夠錢, 如果你一直浪費時間去諗呢份玩具, 到鋪頭關門你最後咩都買唔到; 如果你知道唔夠錢後, 即刻決定買另一份無咁鐘意既, 至少都有份喜歡既玩具丫」

(嘩, 怎麼越扯越遠)

「哦...原來係咁, 即係想要果樣野要極都要唔到, 就揀都鐘意但無咁鐘意既野...」

「好啦好啦, 返到學校啦, 我地遲d再講啦」

這些人生既課題, 真係有排都講唔完呢~