【奶媽日記】習慣打擊

jul 5, 12

又回健康院見姑娘, 重4.8kg, 高61cm, 成績依舊麻麻, 達唔到一個月重0.5kg既最低標準, 醫生擔心細佬身體有問題, 檢查時又聽到心有雜音, 寫了信轉介我們見專科跟進一下

和醫生說起細佬的問題, 最近總是啜五分鐘就不吃了, 擠出來用奶樽餵又不肯吃, 醫生認為唔係餵既方法或者奶既質素有問題, 估計係細佬胃口細, 天生無食既意欲, 每天追6-8條濕片追到個人好緊張, 加上之前四個鐘兩邊胸已經很谷了, 現在奶量是不是跌了? 訓醒也不再漏奶了, 八個鐘才感覺很谷很谷, 會不會是自己的奶不夠飽呢?

jul 6, 12

開始認人了, 不熟悉的會喊, 喜歡雙手交叉周身郁, 是在跳舞嗎?

發咩夢呢? 唔通變身要做超人?!

jul 14, 12

前一晚還在學轉身, 之前總是差半隻腳才成功. 這早和哲爸陪細佬玩時, 毫無先兆, 笑完一笑就乾淨利落轉到了!

反呀...反! 我要反身!

jul 15, 12

啜手指自己訓, 坐bb車搖幾下自己訓, 成日眼定定望床圍, 手仔靈活了, 開始喜歡抓腳指玩. 雙手可以抓物件, 有時會配合起來拎玩具玩, 嘴仔開始學講野, 成日「ar gu」聲係咁叫

學人百厭了, 成日腳撐撐到上床欄摔腳仔XDDDD

aug 3, 12

這天受到大打擊, 本來和細佬去仁安睇眼瘡, 點知比個兒科醫生勸我餵細奶食奶粉, 話細佬瘦, 見到我個身型咁瘦, 問我點樣全人奶比到細佬? 質疑我有無減肥, 質疑我細佬咁輕點解唔比奶粉等佢體重理想少少. 生眼瘡我已經心痛細佬, 心情已經很不快, 仲要聽埋醫生咁既bull shit, 我做人阿媽一定愛鍚自己仔女, 一定比最好既佢, 點解呢個醫生, 仲係大緊肚既女醫生唔識設身處地的體會下我既心情?

經我斷言拒絕之後, 醫生開了一樽維他命水要我餵細佬飲, 說我的奶不夠營養, 為他好, 就應該額外給他補充營養

真笑話, 從來只聽過母乳媽媽額外補充營養, 不曾聽過要額外給維他命水比bb. 咁細個胃仔有得揀, 都應該飲母乳而不是罐頭倒出來的東西吧...

聽聽埋埋唔少打擊既說話, 開始習慣了, 真係要借聾耳陳隻耳, 咩都聽唔到...