小語錄

隨著哲哲越來越大個, 懂的事越多, 搞笑抵死既童真傻話已經很少見, 然而最近發生了幾件小事, 都令我和哲爸捧腹大笑, 這些有趣的對話買少見少, 要好好記下呢~ 

早兩天, 在家中和哲哲看一些動物生態節目, 正當我和細佬沖完涼正在換衫時, 聽到哲哲說:

「媽咪, 你睇下, 條蛇食榴槤呀」

「榴槤?」

明明正在睇動物節目, 無神神點會有條蛇食榴槤架? 望向電視, 原來...

嘩卡卡卡, 原來是一隻刺蝟和條蛇對峙, 最後被蛇吞了, 哲哲從未見過刺蝟, 怪不得說是榴槤喇 XDDDDD (真可惜和哲爸掛住笑, 完全趕不切拍張照來紀錄呢, 嘩哈哈)

這天和哲哲到大埔海濱公園, 因為地點不熟悉, 哲爸叮囑哲哲要拖緊我們, 以免走失

「哲哲, 如果唔見左爸爸媽咪你會點呀?」

「我會企返係度等你地」

「都岩既, 但爸爸媽咪唔知你邊度唔見, 咁你點搵到我地呀?」

「咁丫, 我會搵管理員姨姨囉」

「咁搵到管理員姨姨之後, 你要講咩呀?」

「我會話:我媽咪係好矮, 我爸爸係好高既...」

嘩卡卡卡, 一輪爆笑之後, 哲爸再說:「嗱, 哲哲, 你咁講係錯架, 就咁話媽咪係好矮管理員姨姨搵唔到媽咪架, 你應該話媽咪係『矮』, 而唔係『好矮』, 好矮就搵極都搵唔到架喇XDDDDD」

(呢兩父子真可惡, 拎人地既身高黎笑, 我都唔係『好矮』咋嘛XDDDD)

回程的時候, 冷不防哲哲突然說:「媽咪, 呢個好似牛耳丫」

呵呵, 怎麼哲哲的腦袋想的都是食的呀?!