【裝修】田貝四路家合居揀磚記 (二)

feb 15

上回講到家合居既磚, 花多眼亂, 雖然行到肚餓, 但唔想浪費時間出出入入, 好! 繼續一排過掃埋其他鋪先

第四間叫舒適建材 (A2037-8鋪), 呢間人很多, 老闆娘忙於落單, 完全沒有時間招呼我們, 仲好, 咁我地可以慢慢睇, 慢慢影

同樣既廚房牆磚, 呢度賣rmb4, 30x30

睇左太多磚, 加上開始肚餓, 當初既新鮮熱血感無晒, 開始懶得尋寶逐塊揭, 只係睇show出黎版就算. 呢兩塊磚適合做廁所地磚, 啡啡黑黑, 就算有毛髮都無咁顯眼. 深啡rmb28, 淺啡rmb36, 同樣都是60x60

睇到悶悶地, 轉戰燈飾, 潔具同廚櫃: 燈飾真係非常非常之多款, 而且仲非常非常之平, 比起淘寶, 現場有實物睇, 唔洗靠估, 單看最頂一層頭幾間已經嘩嘩聲, 平均大約rmb3xx就有盞;

潔具因為哲爸有相熟, 所以會在香港買; 廚櫃方面, 始終尺吋方面有所偏差會很麻煩, 一想到要來回幾轉商討, 應該會在香港訂做

再來就是睇傢私. 幾家的款式都差不多, 睇到第五間叫立方傢私 (D1023鋪), 沒打算在大陸買, 不過有d款式都近乎我們既心水

呢幾張有點似之前睇過的franc franc, 我們都挺喜歡

呢張望落有d似電椅既感覺XDDD

幾張櫈價錢不詳, 事關個sales哥哥話會whatsapp個catalog同價錢比我地, 但我們一直無收到...

越睇越麻目, 快手兜埋個圈走人食飯算. 臨走前見到天樂建材行 (A1010), 呢間d磚好新潮, 用色大膽, 款式亦好浮誇, 岩晒另類品味一族

眾多磚之中, 我同哲爸都覺得呢款磚好復古好特別, 價錢方面亦相對較貴, 有四角花的要rmb60, 無花的rmb36, 兩隻size都50x50. 不過都係欣賞下好, 無咩機會用得上...

行左成日, 睇到開始無晒感覺, 又餓又倦已經無心機逐間睇, 決定出商場附近找吃的. 一路找只見到商店工廈, 卻沒看到食店, 難道這裡的人都不用吃嗎? 找了好久, 終於找到間吃特色的刀鍘麵...

除了碟蒜茸炒菜, 牛肉麵同刀鍘麵不是我杯茶, 味道偏濃, 重口味的東西真的吃不慣

一出門口就是地鐵站了, 去程時搭左的士, 回程決定試下搭地鐵

由田貝站返羅湖, 每人rmb3, 搭的士要rmb23, 平得多啊...

港燦又出場! 入閘唔係香港既套票黎, 而係呢d代幣, 入閘時過機拍一下, 出閘就入coins咁, 專登影低落黎比哲哲認識下

星期六的放工時間, 人流不算多, 而且人群都幾合作排隊. 去到田貝站要在老街要轉對面線落一層返羅湖

車程約需廿分鐘, 由過關到返到屋企, 只花了一個鐘多少少, 同屋企出小西灣時間相約

遊完一日家合居, 等我總結下今日所見:

• 鋪頭既 sales很友善, 有問有答, 可能對慣香港人, 都很清楚香港人揀建材既口味, 要是想影相既話大多不會拒絕, 不過唔似香港可以問到個心水版拎返屋企做參考, 佢地似乎唔興比版個客
• 今日一見, 發覺大陸磚唔係咁差, 只係香港鋪租貴入得少款所以無咩選擇好娘咁. 家合居既款式同價錢好吸引, 要是搵到一間有信譽可靠既鋪頭入貨, 確實節省不少金錢
• 建議上去前先在香港睇好款先上去搵, 因為家合居太多款show唔晒出黎, 時間精力有限, 睇多幾間就唔會有心機一間一間逐塊慢慢搵. 早點鎖定目標, 去到揀岩就可以格價殺價
• 袋定d餅仔小食同水, 因為行到興起分分鐘忘了時間, 肚餓時可以隨時吃幾塊餅頂肚
• 有關地磚既運費: 不足一噸當一噸重量計, hkd300送到樓下, 另加hkd300送上樓. 可以夾埋幾間鋪頭既野一次過運, 只要同鋪頭講聲, 佢地就會幫你搞. 運輸方面唔揀最平唔揀最貴就最穩陣, 太便宜既恐防巧立名目. 聽講依家既運輸公司競爭好大, 想搶多d生意, 運野時唔再粗手粗腳亂丟貨整爛野

灣仔旺角深圳家合居都睇過了, 樣版價錢也有初步idea, 係時候叫裝修師傅幫我計計全屋需要多少磚, 度一度個bugdet, 睇下大陸磚同進口磚點取捨. 買磚呢回事, 究竟係一分錢一分貨? 還是進口磚都有劣質貨, 買國內名牌磚好?

容後分解~

延伸閱讀: 【裝修】田貝四路家合居揀磚記 (一)