【裝修】裝修第一擊。清拆全屋舊有間格 (day 2)

may 26

約左裝修師傅九點上黎, 交低大門鎖匙, 睇住班師傅在動土位動工, 開工大吉! 正式開波裝修啦!

開工前一天回舊居再看一次有沒有什麼遺漏(始終都搵唔返細佬整唔見左兩張主要既SD卡, 唉, 幾個月既相無了), 然後拍照留紀念~

這天完工後, 晚上到舊居看, 只是將大門左手邊放鋼琴的位置起了磚, 未見有太多的改變. 第二天再看的時候, 所有牆都拆光了, 兩位師傅手腳好快啊!

間開兩房中的木板拆了, 地磚也拆清光, 到處都是灰泥

大門的左手面, 廚房及廁所牆也拆了, 餘下的是大廈喉管和主力牆要保留

細佬開門見到這個樣子, 不停話「噢, 無左. 咩都爛晒, 門門爛晒, 地下爛晒」

因為要準備訂造主人房的地台, 所以約了師傅W上來度實呎

一度之下, 核對返一開始奶奶的朋友幫我們度呎畫出來既圖, 點解兩份圖個呎寸相差咁遠? 全屋扑清個呎數比之前細左好多! 和師傅W再三覆實, 最後確認原來的朋友度錯了. 我們還一直信晒份舊圖, 屋內所有既構思同傢伙擺設一時間打亂晒, 最大影響, 是主人房既闊度縮窄左1.5個階磚位, 而這個闊度我們原來是打算做衣櫃的, 依家放完張雙人床, 莫說放衣櫃, 連走動既空間都沒有, 今鋪真係主人房變工人房了...

幸好師傅W準時發實圖呎寸給我們, 而我們也未訂任何地磚或傢伙, 唯有和哲爸開緊急會議, 重新規畫空間既大小分配與安排