畢業謝師聚餐

jun 30

是晚畢業謝師聚餐, 為怕照顧細佬玩得唔夠盡興, 這晚由奶奶睇住細佬, 我同哲哲二人出席. 基本上哲哲都係無心肝既人, 成晚淨係同女神玩...

「哲哲, 不如同下其他同學玩喇」

「識左新朋友緊係同新朋友玩啦, 仲點會同xxx玩喎, 都玩左三年囉, 好長時間架喇」

(竟然有咁既邏輯?!)

「咁老師呢? 唔影第日就唔記得邊個老師教過你架喇」

「班相咪影左囉...」

哲哲, 呢個係畢業謝師聚餐! 唔係同女神約會既地方呀~~~

無怪哲哲咁興奮, 影完呢張相, 回家的時候哲哲看著相機絲絲甜笑, 話呢張相大家都著到咁靚, 好似結婚咁. 計我話睇你個笑容就知你甜到漏, 幾少可有咁怕羞又掩不住興奮的模樣~

襯女神同同學玩的時候, 即刻捉住哲哲同要好的老師工友同學仔影相留念先!

四劍俠各散東西, 希望友誼永固喇

席上各位同學都好興奮, 四處孖住朋友仔跑的跑, 跳的跳, 開席的時候所有同學有首歌想送給老師, LL既兒歌真係好好聽, 見到班小朋友排排企, 聽住童音, 留心埋d歌詞, 其實好感觸, 話晒呢d歌聽左三年, 日後唔知哲哲仲記唔記得呢?

呢個哲哲走黎走去, 大合照時間差d漏左佢丫!

老師亦同同學製作左一條好生動鬼馬既短片送比家長, LL既老師們真係好有心, 真係好唔捨得呢間學校既上上下下, 上到小學, 學校同老師未必會咁有愛lu

飲杯!

成晚餐飯食得好飽, 因為哲哲成日走去搵女神, 得我一個可以好安心咁食飯...(好似酸溜溜咁?!)

痴漢上身! 哲哲專登同我調位, 就係要邊食飯都要睇住女神. 人人食緊飯時拎左我部相機企起身去影人地, 一時興奮一時著急的話「哎呀, xxx飲橙汁啦」「xxx食緊舊叉燒喇」「唉, 食到D汁滴左落張檯度, 咁輪盡架」真係頂你唔順...

兩小無猜的感覺, 你影我我影你

睇下哲哲鏡頭下既女神係點既樣? 影得又幾有水準bor, 男既追住個女神黎影, 望落就好似人地拍mv咁. 係咁狂錄d鬼影video, 搞到個相機無晒電無晒memory, 臨尾同唔到其他同學仔影相, 哼!

https://youtu.be/ZY7RCLz4YoM

算唔算表白? XDDD

時間過得好快, 晚宴要完結了, 小朋友盡興一晚, 哲哲能夠同女神玩左咁耐, 我亦好識做厚顏咁結識了女神的媽媽交換了電話, 日後雖然好難有機會會約到一齊玩, 不過都想哲哲知道媽媽在意他, 可以做的都會盡量去做

還有兩星期就結業了, 哲哲你要盡情玩, 玩盡每一天~