【裝修】砵蘭街買料篇 (day 44)

(睇返轉頭, 踏入七月成個工程停滯晒, 果排每日都在忙同嬲緊樓上漏水件事, 完全無時間同精神跟進舊屋裝修事宜, 真係多得樓上唔少)  

jul 24

呢段時間間屋都無咩野睇, 依然係爛屋一間, 可幸的是樓上終於答應開門比我地師傅入去重鋪浴室地台, 下星期開始師傅要調動人手上去, 又要拖多個幾星期零進度了, 唉...

間屋無進展, 唯有update一下早個星期同師傅出旺角買料既情況

師傅W帶我地先去睇潔具, 龍頭, 因為廁所窄, 所以馬桶, 面盤及浴屏都要慎選, 現在尚有時間, 可以再深考慮一點

大門分別去了三木, 浩華, 和富以及兩間更平既木業, 平果兩間真係可以好平, 但d款就真係有d嚇人, 十足係我婆年代既款色, 如果極tight既bugdet下真係可以考慮呢d木業. 三間之中, 最喜歡三木同和富, 不過價錢也是最貴, 款式顏色太多選擇, 一時間拿不下決定, 要再找一天自己出來看看才行

大門條陣揀左呢隻黑色, 其實唔係好鐘意令身反光同閃閃令既野, 不過得呢隻色比較深同平, 反正都唔會好覺眼, 無所謂喇

廁所地磚係淺灰色, 所以廁所地下條陣就揀左呢隻

本來還在想, 面盤檯面做麻石還是做corian, 不過廁所會裂會色水既情況應該很少, 想慳一點, 決定用麻石. 看了好幾款, 選定這隻花紋, 不像一般的一點點閃閃的檯面石, 淺淺地感覺舒服

廁所做趟門, 師傅建議我們用右手邊正方型的鎖, 向上向右look, 細細個美觀d易開d, 不過哲爸手指粗, 用落覺得唔係太就手, 最後決定用返傳統上下啪既門鎖

門把手真係花多眼亂, 有d喜歡既又略嫌貴左d, 有d又擔心太尖怕小朋友屋企有意外, 安全起見, 都係揀返d個樣鈍鈍地角位圓滑d既設計, 咁細佬同哲哲唔小心撞到時都無咁傷

掃口粉! 估唔到掃口粉都有咁多學問, 自問真係一個懶人, 都唔想多研究邊隻牌子好, 邊隻牌子唔易發霉, 信師傅幫我揀牌子, 旦求搵到隻色同塊磚近似就ok. 掃口粉本來師傅包埋既, 不過帶埋塊磚去到發覺貴野真係靚d, 廁所同廚房磚都可以用美國Laticrete掃口粉, 唯獨全廳木紋磚好似唔夾色, 唯有用返師傅野

事後才發現, 木紋磚個掃口粉揀錯色, 雖然沒能揀到很近似, 但近似深一點, 還是近似淺一點都是有分別的, 我們揀左近似淺一點的掃口粉, 現在掃出來帶紅, 感覺不是我本來所期望的顏色, 只怪自己對顏色不敏銳, 回想起來揀近似深一點會較適合, 防霉方面有信心保證, 而且哲爸有方法可以平...

同師傅吃過下午茶後, 最後一站去揀油漆千色版. 望住一格小小的色版要幻想全幅牆油出來既效果, 對我這種沒有聯想力既人來說, 單是一種色已經可以有數十種演變, 一時間要我下決定真係好為難, 最後都係返屋企問朋友借千色版慢慢屋企揀

睇裝修書參考其他家居配色既照片, 牆身顏色油係唔同既地方真係好影響個感覺, 雖然有好多色我都好喜歡, 不過屋企細唔可以玩太多色, 而且哲爸信風水, 顏色方面只可以用米白啡灰黃金等顏色

屋企已經唔夠光, 大廳用啡同灰就唔太適合, 本來想油象牙白色, 考慮到大廳沒自然光比較暗, 還是選大路一點的米白色 

全白又太悶, 於是就構思油一幅特色牆. 本來想在沙發牆油橙黃色, 一入屋就見到一大片黃, 會好搶眼好開心. 後來又考慮到平時影相大多在沙發位, 每次影相「黃甘甘」好似唔係幾自然. 飯廳牆細幅d無咁顯眼, 不過食飯時看到漂亮的橙黃色, 一家人進餐既氣氛也許會開懷愉快一點啊~

又係黃色! 哲哲既睡房一開始是想用綠色的, 綠色真係好難揀, 有d太青綠, 做特色牆會好sharp, 但油全屋睡房好似太青bb有點驚嚇(特別半夜的時候!), 鴨屎綠/青草綠油小童房又好似怪怪(純是自己喜歡), 其他顏色又唔用得, 諗左幾日都揀唔落手, 最後決定都係用返黃色. 這次揀左隻比較淺既鵝蛋黃, 希望出來既效果會不錯吧

主人房很想油啡色, 不過我們的房間窄之餘仲有地台同衣櫃包圍住, 感覺太焗促, 取捨之中揀左隻淺啡, 唔洗咁悶又係黃色或者米白色嘛~

好心急想睇下師傅油完出黎既效果會係點, 希望自己無揀錯顏色喇...