脫牙記

nov 27

月頭的時候, 收到學童牙科檢查通告說哲要回診所覆診, 本來以為是在說下排門牙未甩的問題. 雖然早個星期那顆牙已經自行脫落, 但原來上排還有一顆乳齒經醫生檢查過也需要脫. 這天放學到達診所, 哲非常緊張...

「媽咪, 我唔要剝牙!」

「醫生話你要剝就要剝架啦, 隻牙頂住隻恆齒, 唔夠位生唔通佢打橫爆出黎咩?」

「但我真係好驚丫嘛, 剝牙係點架? 痛唔痛架?」

「唔...依我既記憶呢, 訓上張櫈, 打支麻醉針落d牙肉度, 再用個鉗仔一夾就甩架喇.」

「下? 打針? 用鉗?? 唔制, 我死都唔會入架啦!」


「媽咪細個就係打針既, 不過依家科技咁先進, d麻醉藥可能係噴一下, 又或者用d棉花拭一下落d牙肉度就無感覺架啦, 就好似上次你死都話唔做眼手術又話怕痛, 點知麻醉完你都話唔痛啦~」

(上次係全身麻醉緊係無感覺, 今次係局部麻醉, 其實真係兩回事. 不過為左安撫哲哲, 唯有咁講啦...)

話口未完, 醫生叫名哲哲要自己行入醫生房, 才擰轉背哲哲就用手肘拭眼淚了. 五分鐘後哲哲出來...

醫生說哲哲可能對麻醉藥有點敏感, 嘴唇有丁點兒腫了, 是正常反應但要觀察, 除此以外沒有大問題, 那顆乳齒也給了我們留來紀念.看到哲哲眼濕濕嘴腫腫的樣子, 我見猶憐, 同時亦覺得慘豬豬個樣好好笑, 忍唔住要影張相XDDD

「點呀哲哲, 頭先入面係點既情況?」

「頭先醫生噴d 野落隻牙度, 咩無感覺呀? 我感覺到個醫生搖左兩下先拔到我隻牙出黎, 都有d痛架!」

「哦, 係咩? 哈哈哈...等麻醉藥過左我地去食雪糕囉XDDD」

平時還真的沒有留意, 第二顆恆齒也出來了~