第一次參加水運會

oct 2

小二這年, 哲哲經歷了人生第一次既比賽, 還要是他主動要求參加本來很討厭的游泳! 雖然最後沒有任何獎牌, 但超水準完成兩項項目, 在我們心目中已經是第一名了~ 

哲哲一向很討厭游泳, 討厭來自平衡感不佳浮不起的挫敗感, 討厭來自重覆又重覆的那些踢腿撥手, 討厭來自那笨笨的手腳不協調, 說起游水總是有萬般藉口不想上.

今年年初, 哲哲做了眼部手術, 為怕傷口爆線發炎, 泳班暫停了五個月, 直至今年暑期才繼續習泳. 這段空白期令哲哲的泳術生疏了. 暑假泳班才慢慢上軌道的他, 開學不久就決定參加比賽游一個直池(50米), 自由式還好, 連埋剛學懂的背泳一起游, 還真的擔心體力和能力的問題, 說不擔心也是假的. 既然哲哲對自己有信心, 認為自己一定可以奪標, 做娘的也定必大力支持. (回想起來也不知道哲哲哪來的自信, 明明每次泳班練習時從未試過游到整個直池 XDDD)


為左幫哲哲取名次, 我們一家在比賽前抽了三晚陪哲哲到游泳池練水, 話就話係練水, 實情哲哲游兩下就叫倦, 根本就是天氣熱想涼快玩水吧XDDD

兩星期後...比賽當天在家裡看網上直播, 看樣子哲哲好緊張啊!!

第一場賽事先游哲哲比較有信心既自由式, 一跳落水就已經落後, 不過姿勢比起之前好得多, 而且也順利完成50米.

最大的挑戰是背泳, 剛游完自由式接著就要準備背泳的賽事, 真的有點擔心哲哲夠唔夠氣同體力是否應付到. 泳池的中心是最深水的地方, 哲哲每游到這裡就要停下來扶池邊, 不知道哲哲會不會想著這事而害怕縮沙.

呢張相哲哲真係好型好pro, 正所謂唔打得都睇得, 好多謝同學仔媽媽現場直擊影得咁好

驚喜地哲哲游得非常之直, 完全無停下來, 非常順暢去水, 我同哲爸在家邊睇邊尖叫, 真係好興奮, 為哲哲感到自豪, 相比隔離線那位同學, 游幾下停下來步行幾下, 哲哲雖然游最尾但在我們心目中絕對不失禮!

「媽咪, 好唔抵丫可? 我游第四, 差dd就有獎牌架喇.」(隻傻豬以為自己果場游第四, 總名次就係排游第四)

哲哲有點失望, 說下年不想參加了.

「哲哲, 爸爸同媽咪好高興呀, 就算你無獎牌, 但係我地心目中你已經係第一名了, 你真係好叻!」

「吓? 我無獎喎, 你地係咪聽錯左丫, 無獎點會第一名呀? 無獎點會開心呀? 我游第尾, 實比d同學笑我, 有咩咁叻喎...」

「哲哲咁勇敢挑戰自己, 第一次參加比賽, 完成左個賽事, 已經係好了不起既事. 最重要係, 其他同學就算識游水都無勇氣參加比賽, 佢地可能驚輸, 可能怕比人笑, 但你有勇氣嘗試, 呢樣先係爸爸媽咪最欣賞你既地方.」

「黎啦, 哲哲, 我地下年再黎過. 睇下第一名游幾多秒, 我地有一年時間練習, 有個目標之後, 下年一定成功的!!」

「好! 我地下年一定要拎第一名!!!」

自此之後, 哲哲好像衝破了心理關口, 對游泳沒那麼抗拒, 最重要是, 上課的態度正面了，自信提高了，上堂的時候再也沒有看見游兩游就扶住池邊行到對岸就當游完, 今次既比賽真的是很好的經歷來呢~