最近開始時不時聽到竣竣說蛋蛋痛, 特別是沖完涼及運動過後, 看真一下, 又真的是兩邊蛋蛋大小越來越不對稱, 右邊的比較腫脹, 安心起見, 上星期帶竣竣看兒科, 結論是竣竣得了hydrocele, 簡單來說, 就是體內有個缺口, 體液隨著這個缺口流到蛋蛋處, 就像水彈越積越大, 越來越不舒服
醫生說這個缺口本應兩歲前會埋口, 如果埋唔到口就往後都唔會埋, 看了兩個醫生都建議幫竣竣做手術. 思前想後怕日後蛋蛋積水越來越多會令竣竣不舒服, 決定這天入院到仁安做手術
幫我們做手術的是廖鑑榮醫生, 這早哲爸和竣竣6:30a.m. 就到了仁安, 手術準時8:30a.m.開始, 約做一小時, 風險是在肚度開一個口, 要小心不要切斷了輸精管, 抽走蛋蛋多餘的體液, 問題應該不大. 哲爸說竣竣很勇敢, 完全沒有害怕, 乖巧的換了手術袍, 看著竣竣吸麻醉藥後就睡了. 我送完哲哲上學後就趕到醫院接更, 來到的時候竣竣已經完成手術, 麻醉未醒
看著竣竣沉睡, 真的有點兒心痛. 這次是繼四個月大時在仁安全身麻醉割眼瘡後, 第二次又要全身麻醉
醫生說竣竣大約睡兩個小時就會甦醒, 醒來時還是呆呆的, 藥力未散, 結果又再昏睡過兩三小時
姑娘說手上的種豆要成功vv才可以拆走, 沒問題的話下午就可以出院了. 竣竣丫...希望你快點訓醒, 飲多點水可以vv出院吧, 媽媽叫定你想吃的火腿通粉等你啊
哲爸放工接埋哲哲上來接竣竣出院, 哲哲襯細佬訓緊覺, 揭開細佬件手術袍, 好緊張細佬隻隻蛋蛋點樣, 然後驚叫:「咦? 細佬隻蛋蛋仲係度既?」嘩卡卡卡, 細佬個傷口係個肚度, 唔係切蛋, 你估好似阿豆咁做絕育手術咩XDDD
哲哲真係好懂事好關心細佬, 識話做完手術唔可以同細佬玩得咁激烈; 之前又好擔心麻醉事故, 怕細佬麻醉完醒唔返/講唔到野/無左記憶等等, 害怕失去細佬以後無人陪佢. 所以檢查完細佬傷口之後, 就叫醒細佬, 想睇下細佬醒唔醒得返, 之後又不停問細佬問題, 睇下細佬有無失憶忘記佢地之間既事
姑娘幫竣竣拆豆時, 竣竣又驚又痛喊起上黎, 哲哲好緊張叫姑娘細力d, 又識安慰細佬唔洗怕, 叫竣竣頂住, 一陣出院同佢食雪糕. 看到呢一幕真係覺得哲哲成熟左, 好感動見到哲哲咁關心細佬
出院時, 竣竣麻醉藥開始散, 每走一步路, 每一個動作都叫痛, 第一天要不停食止痛藥, 整天都叫痛; 第二天時竣竣說可以忍得住不需止痛. 第三天走路開始不那麼痛了, 也可以出街散下步慢慢行. 醫生說暫時這個星期都不要上學, 避免同學/竣竣自己不小心撞到傷口爆線. 劇烈運動要一個月後才可以
傷口用防水膠布貼實, 一星期後拆走, 不知道傷口有多大, 哲哲這段時期都很遷就竣竣, 竣竣想拿什麼也幫他做, 就連出門彎唔到身也主動幫細佬著鞋, 哲哲說不想竣竣傷口有事, 短期內不能全身麻醉, 要是爆線的話要硬生生縫針, 會很痛的
下星期三會見醫生, 希望入面個缺口成功修補到, 不會再令竣竣不舒服吧
沒有留言:
張貼留言