十年一會

十年人事幾翻新

在 facebook你 add我我 add你之下

湊夠半班同學仔決定十年一會

多年不見

5B同學們聚在一起翻看當年的班相

又笑說當年的趣事

沒有一絲生疏感

昔日的搞事份子或問題學生

如今也變得穩重了

當中的表表者更令人大跌眼鏡

最先成為老襯

昨晚又再次成為各人的笑柄及炮製笑料

(邊個? 唔講得, 免得比哲哲知道跟住學壞...哈哈)

希望下次的約會

不用等多十年吧...

由於哲哲扭睡, 我們急急拍下全體照就先走了. 原先還想排回當年影班相的位置 (哲哲做小校長, 哈哈), 可是場面太壯觀, 酒樓部長要我們速速排位就要拍, 免得阻礙其他食客

p.s. 也許各位舊同窗還在蜜運當中, 總覺得自己的樣子比起他們蒼老 (師奶)得多, 也許生了哲哲後, 經常不夠休息又不夠湯水營養, 加上沒有時間及金錢執執自己, 面對他們總有點不好意思的感覺...

秋冬清潤湯水: 雪梨蘋果煲豬展湯

最近哲哲病了胃口不太好

不吃奶不吃飯沒營養很難令身體好起來

要哲哲飲多點水喉嚨舒服點唯有煲湯水給哲哲飲

這兩天哲哲都在飲雪梨蘋果煲豬展湯

甜甜地, 煲軟左既果茸又可以食埋

不是什麼貴既藥材湯或需要很多事前功夫

簡單方便, 想推介比各位

雪梨蘋果煲豬展湯 (3-4人飲用)

材料:

蘋果 4個 (街市通常都有 $10份/4-5個蘋果, 買淺粉紅色的就可以了, 不必買貴或華盛頓蘋果)

雪梨 2個 (同上, 街市有一份份買)

豬展 $25

無花果 3-4粒

果皮 2片

做法:

1./ 先浸軟果皮, 浸軟後用刀背去除內裡的潺

2./ 豬展洗淨, 煲滾熱水落豬展出一出水, 用意是出 d血水同入面既污穢物. 滾 3-4分鐘就可, 之後用凍水再沖一沖待用

3./ 將蘋果雪梨洗淨切大件去芯但不用去皮

4./ 無花果洗淨一開二 (一開二煲上來會出味 d)

5./ 一大煲清水, 果皮隨凍水落, 水滾後將所有材料放到煲中, 大火煲 15分鐘出味, 之後轉中慢火煲 1.5個鐘, 落鹽, 即成 

心得:

1./ 雪梨味帶酸, 個人認為雪梨和蘋果的比例是 1:2最美味, 否則會影響成煲湯個味道

2./ 煲湯飲唔晒要備去所有蘋果雪梨不要留過夜, 否則第二日翻煲的話會越煲越酸

3./ 煲湯既時間同味道隨個人口味, 想濃一點可以煲至 1.5-2個鐘, 清一點煲 1-1.5個鐘都可以了

生完最大變化...

不是身家減少

不是身材走樣

不是耐性多了

而是愛上了可樂!

點解生完我既荷爾蒙基因會變成可樂怪?

以前只有去飲時才飲幾啖

現在一天不喝就心癮難耐

唔飲過可樂都要飲維他奶檸檬茶利賓納葡萄適之類先安樂

點算?!

價值 $1,670的魚骨

絕對無睇錯

唔係鯊魚骨

只係普通一條魚骨價值 $1,670!

昨日上了真姨家吃午飯

真姨知道哲哲鐘意食麵於是炒了烏冬又煲了魚粥比哲哲

魚粥拆晒骨

一路哲哲都食得好開心

食到最後一啖哲哲突然有異

邊哭邊用手掩實個鼻同右耳

搓到隻耳仔紅晒都仲要搓

媽媽既直覺話我知哲哲有點不妥但又唔知咩事

明明之前過目好每一啖都無魚骨先比哲哲食

起初真姨以為哲哲扭眼訓所以咁

但日日夜夜對住哲哲既我點會唔知扭眼訓係點樣?

越諗越唔對路

雖然最後果啖粥已經變水仲稀到透明

不過哲哲太心急我未有機會望真就吞左落口

會唔會就係最尾果啖出事? 

雖然哲哲不是極大既反應

不過我覺得事不簡單決定即時同哲哲去急症室

為怕去威爾斯多人等得耐

決定飛的去最近既仁安睇急症

一輪登記功夫之後

分流站既姑娘見哲哲時不時就掩口掩耳哭決定盡快給哲哲見醫生

醫生檢查後果然看到哲哲的喉嚨有根刺

不過位置很深

檢查時哲哲不停掙扎反抗

普通噴口部麻醉對哲哲來說不管用

醫生建議可以嘗試就咁從口中拔走

不過哲哲不停掙扎醫生看不清也落不了手

怕儀器會弄傷哲哲喉嚨會發炎

另一方法是即日安排入院做全身麻醉

訓左覺既哲哲自然不會掙扎

我想...全身麻醉對咁細既小朋友點都有點影響吧

不假思考決定請醫生先試試拔走

不行的話唔食全餐唔入院都唔得

又等了一會醫生姑娘帶到我們到診後室坐

哲哲一見咁多醫生姑娘又喊了

我坐著抱哲哲, 用手按實哲哲雙手, 交叉腳夾實哲哲對腳

一位姑娘按實哲哲雙肩

另一位姑娘掩住哲哲個鼻同撐大佢個口等佢抖唔到氣迫住張開口

頭兩次哲哲因為反胃嘔黃膽水所以醫生落唔到手

幸好醫生年輕眼明手快

一有機會襯哲哲張大口正要反胃時

伸支鉗仔拔走根刺

乾淨俐落

好險啊...(那時我手心出汗, 擔心哲哲真的要入院)

好在當時無聽真姨講食啖飯比哲哲食下提子仔分散佢注意力

或者會吞返出黎

否則一條斷了變兩條

打散左或者越插越入就仲難搞

望望醫生手中魚骨

足足 1cm長!

難為哲哲咁忍得痛無話激烈發脾氣

我這個媽媽真粗心大意

湊左哲哲兩個月未夠

大半年無病過既哲哲就病足一星期

仲要哲哲受魚骨之苦 (希望哲哲唔好怕左唔敢食魚啦...)

教哲哲識講幾多野識做 d咩又有咩用

花錢事少

要哲哲身體受無妄之災我點對得住信任我既哲哲同哲爸?

兩位大人

我知錯啦!!!

對唔住呀!!!

無得 claim保險, 亦唔會要哲爸找數, 我要好好記住呢個沉重而昂貴既教訓!

靚仔證件相一 take過!

遲遲沒有帶哲哲去影證件/學生相

一黎因為不敢帶哲哲出街剪個靚髮

自己操刀又剪到哲哲髮型怪怪唔見得人

其次哲哲坐唔定又唔望鏡頭

一個人帶佢影相好困難

到剪好頭髮哲哲病左精神唔好

尋日哲哲終於病癒, 哲爸又放假

於是第一時間帶哲哲去影 

為了第一次成功影張靚相

我地都做左點事前功夫

在哲哲訓醒最精神既時候 (大約 10-11:30a.m.)同佢落街食個靚早餐

食完早餐又同佢去新港城個鐘樓睇佢最愛既轉轉

一路上都投哲哲所好, 好順利~

去到海柏中銀銀行對面間相鋪 

入到去哲哲都無平時既唔自在

唔洗抱唔洗痴住我望好耐就已經可以自己坐上張櫈度

坐得直直等影相

(之前真係有點擔心佢一緊張谷紅隻眼, 就影相唔靚啦)

出奇地, 唔洗我禁住哲哲, 又唔洗哲爸在對面整古做怪

單靠攝影師整怪聲就引到哲哲坐定定影相

雖然有時都沒有望鏡頭

不過無話唔肯坐要起身走人真係萬幸

學師傅講, 同小朋友影證件相最緊要快手

最緊要信佢影得掂

父母在旁整古做怪反而分散左小朋友注意力仲影得唔好

(呢間老鋪既服務其實麻麻, 上上下下職員都好高傲無咩禮貌, 不過哲哲覺得自在又影得好, 做父母唯有受下氣)

話咁快就影左十零張比我地揀

有好多都係好選擇

不過時間太趕

好似影結婚相揀相咁不停比人 push

都無得慢慢細心欣賞下

有好多張都影得唔錯, 上圖其實都係 final 2心水, 雖然哲哲有笑但笑到見下排牙唔見上排, 好似怪怪咁, 而且我見慣哲哲既笑容, 覺得呢張相笑得不夠自然, 所以最後都無選擇到. 下圖哲哲好搞笑, 好似問緊: yo, what'ssss upppp??!! (其實好想影多幾張相, 不過得部大機又好似好誇張咁, 而且怕對方唔鐘意, 唔敢...)

最後選左呢張, 正正經經, 件衫又夠鮮色夠醒神, 都唔錯啦~

$65半打, $75一打

1小時有取包 cd相底

其實都算貴 (不過附近仲有間好出名仲貴, 成 $200/12張!)

但自己影唔掂唯有搏一搏出去影

好在哲哲出奇地合作, 叻仔

睇黎可以試下挑戰同哲哲去 studio影相啦!

與米爺同遊海洋公園

個幾星期前約好同米爺一齊去海洋公園

那時哲哲還未病

直到星期四晚還有猶豫應否應約

幸好問過了米太婆介唔介意哲哲未病好

所以...一切照舊, yeah!

也許太耐無帶 bb車出街

轉車中途哲爸竟遺漏了 bb車在前一架的巴士上

幸好發覺得快, 即時打了電話給九巴

該巴士去到總站發現我們的 bb車還在

否則又要考慮好不好花錢買過一架新了

哲爸, 你咁對我

明知哲哲一定要我抱唔比其他人抱

仲要去海洋公園即係玩我姐...

比原定約好既時間遲了入場 (米爺, 不好意思要你等~)

見到面就開始和米爺一家回本遊囉!

同米爺一樣, 去左幾次都見唔到熊貓, 一係就訓緊覺, 一係就唔知去左邊, 今日終於見到啦, 仲好精神咁比我地見到食榭葉同搔癢, 好精靈

同去迪迪尼一樣, 哲哲好似對呢類好大隻毛茸茸既公仔特別喜愛, 一見到面就抱實唔放, 對公仔仲 nice過對人, 真係吖...

今日好少人入場

我地咁遲黎到仲有得 book海洋同威威劇場

雖然唔知米爺睇過未

不過都照 book左先~

去到威威劇場睇魔法三人組

原先仲以為有得海獅表演

不過睇 d好原始, 生晒鏽既道具同會穿崩既魔術表演真係好搞笑

海洋列車剛正式啟用, 之前聽過 koko講其實無咩特別, 不過一場黎到, 見無咩人排隊, 又可以三分鐘上到山頂, 點都要試試. 哲哲, 雖然媽媽知道你一見到纜車在頭頂上經過好興奮, 不過我們回程時再搭吧

入到去有點似搭地鐵, 位少人多, 行車期間兩側圓窗無野睇, 只在車頂播放多媒體海洋影片, 營造穿越深海探險既效果. 可能期望太大, 對我來說無甚特別, 不過勝在冷氣夠, 大熱天時當過冷河又幾舒服

尋日剛好是哈囉喂的第一天, 中午就已經見到很多嘩鬼佈置, 更有些都幾大吉利是 (如山墳, 有埋真人相同名既神主位, 像真度高, 我真係唔敢企埋去影張相)

 呢日哲哲狀態好好, 無話成日要我抱, 好肯拖住我隻手一齊行, 可能見到米爺咁乖所以唔敢失禮. 米爺真係一個親善大使, 平易近人又成日笑, 感染埋哲哲肯比米爺拖住手一齊影相, 期間仲吸引埋另一個唔識既小朋友一齊手拖手影相 tim!

兩兄弟全日孖住上一齊追魚拍水母, 追來追去, 見到哲哲同米爺咁夾肯一齊玩真係好欣慰

 (上圖) 米爺: 媽咪, 我要細妹, 唔要哥哥呀~ 哲哲: 無眼睇囉, 你兩個傾掂數先, 我行先!

(下圖) 哲爸: 兩個就夠晒數. 哲媽: 發夢都未有咁早呀你!

睇完水母館, 哲哲同米爺友誼升級, 哲哲 warm up晒, 主動同米爺 give me five同拖手仔, 米爺又唔似哲哲會派檸檬唔睬人, 兩個孖寶 five來 five去, 好溫馨~~

時間差唔多就入場睇海洋劇場, 唔該米太婆幫我地影左張好熱鬧既合照, 可想而知當時好多人等睇海豚同 "師奶人"既精彩演出

米爺全神貫注咁望實幾時開始做; 相反哲哲等開始時已經發眼訓瘟, 睇住表演之下仲中途訓著左 tim

完場之後米爺三兩下都訓了

怕纜車好多人

於是決定搭海洋列車返歸

和米爺一齊搭巴士後才分道揚鑣取回遺留了既 bb車

愉快一天就此結束

希望下次再有機會同米爺一齊探險啦~

emily & nei wedding banquet @taikoo maxim's

上星期日晚去了 emily同 nei既婚宴

先祝 emily同 nei白頭到老, 最緊要係連生貴子呀~

好開心 emily同 nei結束 7年愛情長跑

踏入人生既另一階段

緣來緣盡

見身邊好多朋友不是未有機會

就是繼續十多年的長跑不打算結婚

所以一旦聽到有喜事總會特別的替人歡喜

呢晚我同哲爸都好盡興

一黎見到班好友已經無顧慮咁雞啄唔斷 (唔洗煩要睇住哲哲, 呵呵)

最開心係見返平時較為少見既舊同學

完全好似以前讀書咁

全晚都無正經過, 係咁無厘頭講笑

我地果圍有兩個唔識既賓客都比我地引到笑不停口

可惜哲哲病了

果朝早 狀態又唔好

好多舊同學失望見唔到小基基一面

12年時間話長唔長話短唔短, 好在我地個個都仲 keep得咁上下~

太多賓客要同一對新人影相, 有幸比我地攝到位影到敬酒相. emily呢晚好 sharp, 選衫又選得好, 身型又夠高, 件件衫都著得勁好睇, 呢件敬酒衫係好鮮既紅色但佢 carry得好好, 只因夠白淨, 羨慕死人啦

因為未收到其他相, 手頭上只有這幾張相, 其實我想睇無厘頭果 d相囉, 好想快d收到其他相呀~~

晚宴完畢大家意猶未盡

一行八人再去天后食糖水繼續笑落去

間糖水鋪叫甜姨姨都幾好味, 價錢又唔貴

呢晚難得丟下哲哲和哲爸玩到咁夜

唔知下次到邊個會跑出再請飲呢?

希望下次可以帶埋哲哲一齊去就好了

玥玥兩歲生日派對 @麥當當

玥玥兩歲生日

如哥哥皓皓兩歲生日一樣到麥當當搞生日會 

在此先祝一句: 玥玥生日快樂, 祝身體健康要乖乖聽爸媽話喔~

好辛苦先拉到小主角玥玥同我影張相, 雖然哲哲同玥玥沒有望鏡頭, 但沒有走開, 算是影到了吧

切蛋糕時, 蛋糕係一個 hello kitty來的! 好可愛呀, 果然 hello kitty係女仔既恩物, 玥玥同另外個小女孩望到實一實 (其實哲哲成場都係咁望住個蛋糕, even切開左分緊蛋糕都仲望住)

珍姐一家合照, 不過皓皓好似嬲爆爆咁樣既? 事後聽哲爸講好似蘭姑姐整嬲皓皓, 真係無陰公呀 

咁開心既場面緊係要逐一影張相啦, 不過姑丈同珍姐人緣好夠面子, 太多親朋好友未能逐一拍照, 而且時間好似好緊迫咁, 未 warm up夠就完場了

其實呢一日哲哲狀態真的不好, 病了鼻水流得厲害, 吃了藥想訓覺又無得訓, 去到擠滿人又吵的地方對哲哲來說本來是大忌. 去到場不久就遇到很多熱情的親戚, 怎麼說好呢...哲哲的性格 (現在應該說是感覺統合的問題) 根本就不喜歡人摸佢掂佢, 還要是較為少見的人, 即使親如我和哲爸, 很多時哲哲都不喜歡我們搞他的, 偏偏這一天不同的親友總要逗弄著哲哲, 一次兩次, 雖然知道他們不是有心的, 也不知道哲哲的性格情況, 或許他們見到哲哲既反應會很無趣, 更可能覺得我唔識教個仔咩叫禮貌, 但哲哲不想, 我也不想這樣的, 弄得哲哲這一天歇斯底里爆喊到吹鼻水波波, 除我以外什麼人也不要, 連哲爸麻麻也沒有辦法, 唉...癲成咁死扯住我不放, 自然我都無啖好食, 旁人唔知以為我少帶哲哲見人怕生保又以為我縱佢, 啞子食黃蓮, 又氣又累的我都無晒心情也懶得回應

倒模工場 II

和哲哲剪完頭髮回程時拍了張照

望望手機中的哲哲個樣 咁熟口面 既?

即晚搵返張相出黎比較下先:

洗唔洗似樣成咁呀?

又話哲哲似我

原來點都係似哲爸

哲哲

似我點都好過似哲爸啦...靚 d嘛...

哲哲 salon剪髮記

踏入第二十個月大的哲哲

今早來了個新挑戰 - 出外剪頭髮

一路以來哲哲以多變另類髮型見稱

超級撒亞人, 狼人, 火雲邪神, 閃僕, 磨菇小姐, 李小龍...等等造型多不勝數

其實都唔想搞到哲哲個頭咁

無奈哲哲不喜歡人掂佢搞佢

唔拖到最後一刻我地都唔想出手

經白雪介紹幫佢同 anson剪開果位型男師傅剪得好而且好快手

由於哲爸信唔過出面既 salon師傅怕佢地無經驗剪傷哲哲

加上我地既手勢就真係...剪牛雜豬大腸咁款

所以決定約型男 eric幫哲哲剪頭髮

出發前影低哲哲剪髮前個樣, 仲好得戚好好笑容扮神探伽俐略

起初哲哲都無異樣

只是有點好奇 salon周圍環境

叫哲哲著袍時

哲哲慣牌唔鐘意有衫以外既野束縛住佢所以唔肯著

咁 eric唯有手起刀落快剪

剪到越來越多頭髮碎跌落哲哲個身同頸時開始驚同狂喊

繼而周身狂扭不停 fing頭

三個人同時制伏哲哲都搞唔掂

(eric剪, 我抱兼襟住哲哲個頭同下巴, 另一個 assistant襟實哲哲雙手同肩頭)

原先都剪得好好睇, 有 layer

不過好勉強剪完一邊之後發覺唔可以繼續落去

eric就提議剃頭

因為剪唔好之餘亦唔想哲哲喊得太厲害

去到最後我用晒所有力去制止哲哲彈來彈去, 好倦, 索性放哲哲落櫈, 也許哲哲又怕又喊到倦, 都無力再反抗, 只係不停叫 "媽媽, 媽媽", 手指指要我救佢, 真係陰公豬 (去到中段最激時其實都好想影張相, 不過真係無手, 招架唔住...)

剃頭前

哲哲喊得太厲害

突然嗆住道氣出唔到聲

之後就見佢反胃嘔左一堆黃膽水出黎

個口可能喊到收唔到聲又周圍扭

唔小心撞到我或咬損條脷

邊滲住血邊流眼淚鼻涕

見到哲哲咁樣真係好心痛好心痛

哲哲喊到上氣唔接下氣

eric終於剪完

之前買落盒餅餅哲哲一直揸住但喊到無放入口

到走時都唔肯留多陣順返條氣

唯有急急腳離開 salon

走到大街哲哲才安定下來讓我幫他抺抺面上的頭髮碎及飲啖水

短短數十分鐘

對我, 哲哲, eric, 甚至整間 salon既師傅同客人都好似一個世紀咁耐...唉...

剪到嘔, 剪到見血

換來的是一個清新型男造型

eric臨陣變卦幫哲哲剃短兩側, 但保留前額 d陰可以整鬆或 gel起. 髮型改變了的哲哲樣子也不同了, 不再狼人不再李小龍不再磨菇, 不得不佩服 eric對住咁惡搞既哲哲淡定之餘仲剪到哲爸讚不絕口. 依家出街睇怕哲哲唔會再比人叫做妹妹掛...

後記 (sep 10, 09):

幫剪短了頭髮的哲哲洗頭時簡單得多

用少好多洗頭水之餘

沖水又快又唔怕唔夠乾淨

不過似乎哲哲仍未慣自己的樣子

看到鏡中人時總是奇奇妙妙

別說哲哲

有時連我也未看慣這個樣子的哲哲~

和 joanna飯聚 @cwb清亭。燕萍

黎到數碼港當然要去 gp找一找好友 joanna

入面 d職員看著我由我剛結婚到個仔識行識走感到不可思議 (光陰似箭吧)

對上那次 joanna見哲哲都是上年6月的事

只怪 joanna生意太好太忙

很難夾時間見面吧

等 joanna收工後就到了 cwb吃越南菜  

很久沒有吃清亭

水準依然而且還見到那位做了好耐既哥哥仔

呢位哥哥仔由我同哲爸好多年前拍拖到依家仔都生埋都仲做緊

真係好好奇想問問佢係打工定係太子爺~

記得上年哲哲剛出牙又處於認人的階段, 見人就發脾氣同喊, 成晚餐飯都食得好辛苦, 連影張相都難過人 (睇返舊照哲哲好似好肥好大隻咁, 其實得個殼, 呃晒, 嘻嘻)

雖然依家都仲係唔多鐘意望鏡頭影相亦坐唔定, 不過我同哲爸都略略掌握到一招半式去呃哲哲望鏡頭~

呢晚哲哲心情大好, 很少尖叫發脾氣, 亦難得主動逗少見生面口既 joanna玩. 近期教緊哲哲 123後笑呢個動作, 不過哲哲既笑容太燦爛, 教極都仲係醜樣仔既笑容., 查實我懷疑由哲爸去教哲哲美麗的微笑係好錯, 因為哲爸笑上來根本就見唔到眼耳口鼻亦唔美麗...錯錯錯錯錯!!!!!

sunday market @cyberport

第二個連放星期六日既假期

節目繼續精彩

整個上午有人懶到出汗

被迫要改變出發時間

幸而哲哲好合作肯早點午睡

否則被某人浪費美好既假期我嬲死佢呀!

sunday market位於巴士總站天台, 場內氣氛熱鬧, 有一家大細也有情侶或一眾好友圍在一起談心, 外籍人士佔大比數, 感覺好像到了外國和周邊的家庭假日野餐般舒暢. 今日市集展出的 real animals係海龜及青蛙, 不過哲哲對所有事都很新奇, 沒有摸海龜. 市集地方其實不大, 不過有很多特色檔攤如有機食品, 服裝, 手工藝, 繪畫, 音樂, 不過統統都很貴呢~

脫去鞋子任由哲哲在草地奔跑, 當哲哲見到石級旁有很多外籍小朋友在玩水, 就心思思想落水, 其實我也帶多了一套衣服給哲哲替換, 不過哲爸說石級很窄而且很多尖石, 怕哲哲弄傷, 所以哲哲無得玩水只能在石路徘徊

其中一個角落有很多木玩具, 哲哲好正經咁逐件砌 (雖然唔夠高但都堅持坐定定專心玩) 旁邊有顏料供小朋友畫, 不過哲哲太專心玩這個木玩具, 完全無為意這個 drawing corner

哲哲專心一致引來這位外籍小朋友一起玩木玩具, 雖然語言不通, 不過哲哲和這位小朋友玩得很有默契. 當這位小朋友不懂得如何用工具去扭開木條時, 我正想叫哲爸幫幫她, 豈料這位小朋友有禮貌地回應我們說: 媽咪叫我要自己先嘗試, 因為我一定做得到. see?! 很欣賞外國家庭的教育, 教到小朋友從小就獨立堅強, 多可愛! 不像我國家長, 照顧周到, 唯恐照顧豆腐 bb做得不夠快服侍得不夠好

(左上圖) 最近哲哲學識 byebye, 這天見到個日籍小妹妹不停同佢講 byebye, 不過小妹妹唔識聽廣東話 bor, 哈哈 (左下圖) 留意這位小妹妹許久了, 畫了一幅又一幅畫, 完全沉醉於自己的畫筆世界裡 (右圖) 咁食奶法, 真係好。舒。服, 特別開胃呀!

 小休時哲哲在吃得意動物餅, 懶洋洋躺在草地上, 很舒服啊~~~

奇怪無人引哲哲但哲哲竟然望鏡頭? 因為我地較左 timer自拍, 閃燈一路的眨, 眨到哲哲好奇眼定定, 係就係有點呆, 不過總好過唔望鏡頭咁掃興吖~

山長水遠入到黎仲要比入場費

不過都是值得的

能夠感受到外國家庭假日悠閒的消遣模式

(親眼看到黑人的小朋友玩泥玩到周身濕晒, 個媽媽都當等閒事; 見到 d外籍小朋友除淨條片片在草地上爬來爬去曬太陽, 咁既情景在香港普通既公園根本唔會見到)

有機會一定要再來

p.s. 想了解這個 sunday market多一點可點選 這裡 (source: openair hk)

emily派帖飯聚 @九龍城金泰美食

今日行程緊密

上中下午三個時段均有節目

是晚 emily派帖飯聚

再去回 上次 吃過那間泰國菜館吃飯

今晚最難得連大忙人剛哥都黎埋

真係好齊人

開餐前影返張相先, 上次哲哲仲細, 只係可以食炒飯. 今次自己食得好淡定之餘, 仲可以食埋原隻燒雞翼同烤珍寶腸, 食到哲哲停唔到口, 成晚勁好笑容

哲哲食飽就一貫作風: 食飽鬆人, 懶理我呢個阿媽未食飽. 好在 emily出動到私伙 keroro電動風扇, 這類轉動型的玩意正合哲哲心意, 成晚哲哲係咁轉轉轉, 玩得好入神. 事後哲哲太肉緊, 又咬又磨鬼咁鐘意, emily不得不奉獻這支用上多年心愛 keroro風扇比哲哲~

遊圓方 @天台空中花園

和 anson話別後

我們回家小休 (因為今晚仲有活動, 要哲哲先訓一陣再出動) 

訓醒過後見時間尚早

於是去左想去好耐既圓方

我同哲爸都不是喜歡行商場 shopping既人

要我們行商場我們真係得個行字 (仲要係極速打個圈就走果隻)

要專登入去消磨數小時根本沒可能

見近近地今晚食飯既地點

於是當中間攝時間快遊嘆下冷氣

一去到圓方就殺上天台個空中花園

沒有想像中的大

不過看夕陽倒是一流

草地上有很多小朋友追逐 d波波, 哲哲不像我們計算草地有多大, 一於懶理玩得開心快活. 今天的驚喜是以往哲哲看到波波只會追, 但今天會試著企定望住波波既形態, 看準, 再用手指督落去~

在草地追波波都玩了差不多一小時還不願走, 好辛苦先引到哲哲去另一邊的遊樂場繼續玩. 不過哲哲心思思想玩波波, 成日自己走回頭路返去草地. 見哲哲都玩到倦倦地, 於是比豆漿哲哲解渴, 支豆漿好味到我同哲爸想飲啖哲哲都唔比呀~

見時間差不多

於是回到商場換片走人

商場名店林立

最有特色是店鋪及裝潢以中國五行金木水火土去區分

以水區為例

有幾條水柱在商場休憩位置

流動中的水由高空快速滑下

不走近完全不為意是真水來的 (可惜哲爸沒有拍照)

去到換片室

是唯一一間哲哲訓低唔會喊既換片室

想必是軟軟的床舖令哲哲躺得很舒服吧

換片室有濕紙巾及奶樽等物品供應 (有需要的話)

換片餵奶位子夠多, 空間夠大

不用擔心要排隊等很久

又或空間太窄空氣不流動很髒很臭

最體貼是男女均可進入 (不用擔心媽媽一個人搞不來沒有爸爸幫)

等換片期間怕悶嫌耐的話還有名車高級時裝雜誌供閱讀

個人認為最一流的是換片室很有格調

有別一般的死板診所 look或懶 cutie的格局

值得再來幫襯!

(好想影張左相, 可惜有人換緊片唔係幾好意思, 有 dc仔就可以靜靜雞影就好啦~)

與 anson短聚 @朗思國際幼稚園

今早白雪和 anson回學校遊玩

我們也跟在一起

讓哲哲跟 anson到學校玩之餘

順道看看 anson將就讀朗思的環境如何

雖然今天不是上學的日子, 不過學校依然開放給校生回來遊玩, 此舉不錯, 可讓新生早點熟識這個環境, 開學日時遇到老師同學們這些新面孔時, 少了陌生環境這個因素而驚慌. 我對這所學校的感覺, 是校園雖細但乾淨企理, 可能環境所限未能在校外有個露天操場, 始終有點局促, 幸而有猛烈既陽光, 這個室內的露天操場感覺還是不錯的. 希望遲點和哲哲報 n1時有機會再多了解這所學校