oct 9
開學個多月, (看上去)哲哲算適應得不錯
開學第三日話想時光倒流變返k3生, 想同返班幼稚園同學一齊上堂一齊玩, 到第四日放學就見佢神色凝重, 一出校門就喊, 問佢發生咩事又唔肯講, 飯又食唔落, 連續幾天既茶點又唔多食話無胃口, 再問之下, 原來中文科主任話佢上堂唔留心話左幾句, 不過哲哲堅稱自己無遊雲, 唔知自己點解聽唔到主任既說話, 唔開心又驚既情況下哭了, 後來問清件事教了哲哲下次如何做就解決了
至今都有時聽到哲哲話比老師話, 不過應該練厚了面皮, 知道話過唔好再做就無放o係心度了
話晒小一生, 點都有d新奇事, 開學第二星期開始在學校午膳, 才第一天就有惹笑事件!
話說老師在班房向逐位同學派餐, 派到哲哲和思賢(同村同班好朋友)有點技術上錯誤, 不知道他們預訂的是什麼餐所以未有得派, 兩位小朋友誤以為「媽咪會帶飯黎所以學校無餐派」, 於是烏sir sir同老師講屋企人會帶飯, 結果老師又真的以為他們是自帶飯, 學校上下四處找又找不到他們飯盒, 最後才打電話給我問清楚, 足足搞了大半個鐘他們才有飯吃, 兩位劉生真係超搞笑XDDD
十月頭牛姨請了假在我們家住幾天, 為的就是想陪哲哲返放學, 牛姨好愛哲哲呢~
某天放學, 哲哲同我講有關班務既事...
「媽咪, 你知唔知, 思賢做左班長丫! 老師話佢寫d字靚所以比佢做班長囉.」
「係? 咁西利丫, 咁你呢?」
「你估下?」
「唔...行長? 擦黑板? 負責收功課?」
「唔係丫, 我負責掃地丫. 掃地咁辛苦, 好羨慕思賢丫, 淨係轉堂時行出黎負責話下d同學幾舒服」
(哲哲, 掃地好偉大架, 加油, 比心機做好呢份工丫XDDD)
哲哲在學校要適應新的人和事, 做媽媽一時間亦有好多東西轉變要適應, 例如要習慣每次洗好餐具要第一時間放入書包, 免得像上次開學幾天就忘了帶餐具, 哲哲吃飯時投訴無餐具用...orz
還有的是九月頭某天打完風, 雖然無執錯書包, 不過做媽媽就忘了那天學校早放, 結果要校務處打來提醒媽媽來接哲哲, 收到學校電話, 即時從睡夢中彈醒, 一手抽起還在睡的細佬上bb車就衝出街 (結果被哲哲埋怨在學校等極都唔見我, 明明早放可以早點回家玩XDD)
除此之外, 功課量比幼稚園多了, 現在放學變得對每天的功課很著緊, 一回家就要哲哲將家課手冊統統都給我先過目, 待哲哲小休後我就正式做書僮. 頭幾天試過讓哲哲做功課同時我在準備晚餐的餸菜, 後來發現哲哲很容易分心走了去玩, 未能夠完全放手讓哲哲自行做功課
現在先和哲哲做了較深的部份, 抄寫改正的讓哲哲自己做時, 我才準備餸菜, 亦因如此, 我要在哲哲放學前買好餸做好準備, 好讓哲哲回家一做完功課就煮得, 不用浪費寶貴既時間
開學第二星期尾就已經要背書, 默書及小測. 初時功課量還不算多, 每天只有五六樣, 抄寫的大約每科一兩份, 快手做完功課就要溫書. 暫時頭兩次的中英默成續不錯, 都有九十幾分, 哲哲自己都緊張分數, 似乎是努力過想拿一百分來得到滿足感
「哲哲, 依家返學點呀? 有無開始適應左d呀?」
「依家好d喇, 我開始習慣左返學咁耐都見唔到你, 無之前咁唔慣啦, 你同細佬呢?」
「我都仲有少少唔慣啦, 始終你陪左媽咪六年喇, 細佬都好掛住你, 成日問『哥哥呢?』」
「嗯, 我都知道你地實好掛住我架啦, 咁我大個喇嘛, 仲係好似以前幼稚園咩~」
「哲哲大個仔左好多, 真係好識諗bor. 係喇, 依家小學咁多功課又要成日默書, 咁你掛唔掛住以前讀幼稚園呀?」
「唔...雖然依家辛苦過以前, 但我都係鐘意小學多過幼稚園」(竟然?!)
「點解呢?」
「因為依家學校好大好多唔同地方可以去, 小息有零食食, 多左好多野玩」
「玩? 乜你班房有野玩架咩?」
「嘩卡卡卡, 緊係無野玩啦, 你估以前幼稚園班房咁多野玩咩, 我講學校有其實野玩丫」
聽落哲哲似乎挺適應小一校園生活, 不過九月還是適應蜜月期, 看到學校評估考試密集既校曆表, 應該好快就會「黎料」了...
沒有留言:
張貼留言