怪獸都市

(本文內容偏激, 如果你發現疑似講緊你你你抑或你, 請勿對號入座, 不喜勿插) 

一到開學的日子, 四處都有家長為子女報名面試n班, 近日雙重夾擊, 還要操心哲哲升小的事宜. 報名報名報名, 排隊排隊排隊的資訊四方八面地洗版:

訓街排通宵遞報名表, 限收四百份, 每份表mark上號碼次序來顯示你對該校既「誠意」;

傳聞某幼稚園分國際班和本地班, 選擇國際班每月比多一千蚊學費可優先享用新玩具及較大規模既課室資源, 玩夠用淨先輪到本地班, 即使月費八千仍大有人讀

歲半人仔面試三國語言仲要識講自己全名, 本應k1才學的東西認讀a-z 顏色分類揸筆書寫推前至歲半面試就要做到, 為既就是要挑選精英之中既精英;

報十間面試算少了, 報夠二三十間, 全港九新界儲齊一set application form還要是親身交表格才是常理;

識人好過識字, 有熟人搭路拍肩頭, 話之你走後門, 面試過程喊足全場, 申請表格眼尾都無望就叫你比留位費確認學位;

因為想增加入心儀小學的勝算, 現在受洗既受洗, 準備信主既信主, 為求兩三年內盡快成為主既兒女; 

種種荒唐, 究竟係有怪獸學校先定有怪獸家長先? 返學求知識, 現在反成了先求知識再上學, 這是什麼道理? 那我還要上學老師教什麼?

本來還在好奇這些名幼稚園有什麼過人之處, 了解過這種種變態教學理念及處事手法, 絕對可以講byebye了

某d家長幫子女報了一間返上午班的幼稚園, 因為比較催谷, 所以決定再報另一間較為活動既幼稚園作中和, 返兩間學校, 個多小時的放學時間在車內換校服食午飯再返學, 真的是中和嗎? 小朋友真的夠精神學習到, 會愉快嗎?

先別說細佬「贏在起跑線」這一話, 明顯已輸在起跑線的哲哲升小一事更令人鬱悶

本來一心的打算入讀某小學, 哲哲既底子有多少, 我們心裡都很清楚, 七十分的小孩揀八十分學校, 有進步空間之餘又不會太打壓學習既信心及能力, 可是總有人你一句我一句: 「你果間升中派位唔掂喎, 只有xxx和xxx才是一等一的好學校, 讀我母校啦, 好野黎架」「你讀呢類學校, 將來入唔到好既中學, 入唔到好既大學, 無份好工...」「唔襯細個谷勁d, 第日中學唔受谷架喇」「功課多d深d好, 等佢地無時間鬆懈無得出街學壞丫」

望子成龍, 為人父母有邊個唔想? 可是自己的孩子有多少斤兩, 做娘的很清楚, 不是勉強催谷入讀名校對孩子就是好; 再者我也不認為讀唔到名校會世界未日

某雜誌專欄說得好:「整個社會既文化都講求競爭力, 甚至投射在教育及對小朋友的期望上, 要求他們成為某類精英學生, 評估制度比較單一, 似乎要同一個模倒出來的才算合格. 孩子不是倒模出來, 每個小朋友都有自己既特質優點, 當孩子無法達到大人預期既期望, 會漸漸失去自信及自學能力, 潛質亦無從發揮」

依家既學校, 現今既家長, 似乎重視小朋友學術成績多於身心發展, 放長雙眼睇, 就算將來成績幾好, 高薪厚績, 但高分低能, 要不就精神焦慮, 都是這個社會做成的

慢的教育, 似乎和香港還有一段很遠既距離