(隔左咁耐, 激情過後咩都唔記得晒, 不過點都要略略補返篇 blog...)
多謝 koko, 多謝迪迪尼!
要不是 koko我們怎可能上星期日一行十四人免費遊迪迪尼?
鐵腳七班應 lin兄主意, 穿上七色的親子裝結伴到迪士尼, 遊人應該看得出我們的顏色派對吧~(粉白綠黃藍紫紅)
未入場就先興奮, 先來一張跳起之作
再來女子組. 不過我已經笑到無力抱起哲哲, 睇下白雪跳得幾有美感
男子組王子同白雪一樣好有動感, 直頭好似拍緊廣告咁~
收到飛就正式入場囉, 入場前在美麗的音樂噴水池拍照留念
入場後先租 bb車
$60 + $40按金租成日唔洗自己帶車
抵玩啦
途經歷奇森林噴水柱, 見大霧哲哲不單沒有害怕, 還笑到卡卡聲, 反是我們有點怕霧水入鏡
穿過森林, 正式我們第一個奇妙(排隊)旅程
我們坐船走入猩猩叢林探險
沿途看到有大象鱷魚哲哲都跟不上
反而去到有水花濺過來, 又或者最後一場熱熱的大火
卻引得哲哲連場 "噢"的一聲
探險船過後去醫肚
兩年前到過迪士尼
記得食物選擇不多價錢也貴
不過味道卻是好的
入得場, 就預左消費
貴一點但開心又有何所謂呢?
(多謝米太婆的藍莓, 哲哲又要食又要怕羞唔比人望住佢個為食樣~)
食飽之後去左玩 winne the pooh, 雖然不是 winnie the pooh迷, 不過之前玩過覺得入面佈景好靚, 又適合小朋友入去玩, 好想帶哲哲去睇下, 可惜排左半個鐘, 臨入場時哲哲睡著了
襯哲哲小休
唯有回到餐廳讓哲哲睡醒再玩過
可能天氣太熱太曬
哲哲睡了 45分鐘就醒了
醒過後電兔回復精力, 當然要帶哲哲坐我最喜歡的迴旋木馬, 起初哲哲不耐煩, 等這麼久都無料到, 之後音樂一起就開始轉, 明白過來才初現微笑呢
不死心哲哲睇唔到 winnie the pooh, 於是折返再玩一次, 這次幸運地等也不用等可即時上車, 雖然場內漆黑一片, 但色彩豐富的佈景引得哲哲很高興, 聲多多又伸手去摸, 好可愛呢
再匯合鐵腳七班時, 竟發現一張熟悉的臉, 原來係阿 boop呀, 好久不見呢!
玩到熱辣辣, 最好既節目就係玩水水降下溫, 見到哲哲同個姐姐兩小無猜咁玩水, 突然覺得呢條片好似廣告咁, 睇到我感動得黎又幾溫馨
呢隻正一係市儈米奇! 何解? 見之前同米奇合照時米奇既 post都係普普通通, 點知一知道我地係 vip就打個靚轉, 拉開後面塊紅幕, 對住我地擺多多唔同表情唔同既 pose. 又話說我同哲爸都不喜歡米奇老死, 誰知哲哲一見到米奇就欲罷不能狂摸米奇個鼻鼻, 仲不停咁鍚鍚tim! 衰仔, 阿爸阿媽成日叫你鍚我地都唔肯, 一見到米奇就係咁挨個頭落去係咁鍚, 大細超!
難得哲哲咁鐘意米奇又出奇地望鏡頭影相
唔破財都唔得啦
買左兩張相, 承惠$200大洋~
小朋友玩夠就到大人玩
來到巴斯光年星際歷險打怪獸
哲哲都無執輸, 都有同我合作揸住支槍射壞人
不過分數認真低, 蝦兵蟹將咁上下囉
最後我地去左小小世界
入面有好多唔同國家既小朋友穿著一身當地的服飾
用當地語言唱世界真細小
哲哲睇得好開心, 不停手指指周圍望
玩到呢個時候
原先打算食埋晚飯就睇煙花
可惜最後因為落雨而睇唔到...好似唔夠完滿咁
不過個天都算對我地好好
落足成個星期雨
果日就好好天, 只係放煙火先落算係咁啦
美心餐晚飯真係幾好食又坐得舒服
而哲哲食飽飽之後, 倦透, 再訓...zzz
呢一日真係由開門玩到關門
不過之後因為全日係咁抱哲哲係咁行
搞到之後幾日都周身酸痛好似比人打完一身
今次真係玩得好開心
見到哲哲成日好驚奇咁周圍望, 係咁 "噢噢"聲
好似問緊: 點解會咁既? 果度又點解會咁既?
又雖然入到場正式玩時無咩影相 (影得少之餘仲要大部份係入場前影的)
不過證明我地真係由頭玩到尾, 過足癮囉!
沒有留言:
張貼留言