【奶媽生涯】真的要餵奶粉?

mar 25

餵人奶雖然好辛苦, 不過最開心莫過於見到bb對住自己笑 (雖然暫時仲係無意識咁笑), 不過有好幾次初一食奶時會「射喱眼」望住我, 食完又會陰陰嘴笑, 我就照單全收, 當正係對我既鼓勵喇!

不過一擔沙糖一啖屎, 當佢大個少少識野喇, 就開始會好心急咁扯住奶頭啜, 有時急起上黎, 放到入口一味喊而唔啜, 扭左扭右, 對一個新手奶媽黎講, 真係顧得到姿勢嘴型又顧唔到佢d手手腳腳亂咁fing個頭亂咁擰, 搞到食親奶都好似打仗咁

(左)見天氣不太凍又有陽光, 坐月期間第一次落街曬太陽, 順便和哲哲到樓下踢波, 我坐月時也辛苦了哲哲陪我坐月無街去. (右)哲哲有幫麻麻手幫手將薑醋的蛋剝殼, 還說好好玩呢~

mar 26

第一次出現放棄人奶餵奶粉的危機! 一直來為了令自己全人奶, 事前沒有join任何奶粉的媽媽會, 也沒有買奶粉看門口, 為的就是怕一時意志力薄弱

餵了一星期多, 體力同精神都還可以支持住, 這天初一卻不知為何, 不停的扭哭要啜奶, 陪月走了的時候更加是惡魔的化身, 晚上更是一個鐘的啜一次, 每次半個鐘還不夠, 啜到我什麼都做不了, 胸也變腐皮了, 索性坐著不動只抱住初一給他吃自助餐, 卻也於是無補

太倦, 心情不好的情況下, 叫哲爸漏夜落超市買了罐奶粉回來, 目的不是真的想放棄, 只是很倦很倦, 很想一餐半餐給奶粉, 讓我睡一睡, 回回氣, 造奶也要時間和休息的嘛

結果, 哲爸開了奶粉用樽餵, 第一次用樽加上第一次吃奶粉, 初一當然不肯吃還哭得很惡, 輪到我試的時候, 一抱埋身初一可能聞到胸口的奶香味, 轉頭就張開口向我奶頭嘴啜啜想吃的模樣, 此情此景, 我心軟了, 唯有解開衫鈕, 幾辛苦幾倦都想一直的餵下去

多得初一這樣識貨, 怎也不肯要奶粉, 我才可以繼續堅持

(左)這天臍帶剝落了, 要用利是封封起佢放入保險箱先! (右)哲哲正在錄初一的惡爺扭計喊聲, 話第日比佢睇返自己幾咁曳曳~

瘦瘦小小的初一, 最喜歡捲著身子睡, 抱起來輕輕的, 終於明白陀住初一時個肚咁細原來真係塞得落!

mar 29

上星期五(mar 23)第一次回健康院磅重check黃, 初一還未收晒水, 體重一直向下跌(2.63kg), 黃也未退(160), 醫生寫紙要我即日去威爾斯抽血check黃, 一個人帶著初一花了六小時才回到家, 威院醫生說黃的指數不算高, 可以不用留院照燈 (坐月中一個人四圍頻撲仲吹風,  搞到事後頭風痛)

呢一日再去健康院check黃, 看初一的體重, 心情感覺像派成績表, 反映著我和初一的努力

「2.79kg, 黃退返好多, 140, 重得都好理想, bb好叻仔食得唔錯. 繼續努力, 你餵得好好, keep住個半兩個鐘餵一次就可以快d排走d黃架啦」

聽到呢一句, 幾眼訓幾倦幾擔心都好, 所有既辛苦都是值得的, 亦令我對全人奶的餵哺更加有信心. 真的希望細細粒既初一可以追上懷孕時落後了的磅數