feb 15
入屋第一件事就諗起要鋪地, 自自然然揀地磚成為我地很重要既頭號任務. 之前已經去過旺角灣仔睇磚, 對於我們既喜好大致上有了共識. 然而上網再多的資料搜集, 總會看到不同人對地磚有不同的見解:
- 大陸磚質素款式不及進口磚. 鬼唔知阿媽係女人, 進口磚貴咁多, 有技術可以將木紋磚既紋理顏色做得很自然, 款式亦多; 大陸磚只能依款抄襲模仿, 款式紋理自然不及進口
- 大陸磚都有名牌, 講class如果揀到AAA最優等, 質素不比進口磚差. 進口磚動輒幾百蚊塊, 大陸磚是十分一價錢, 絕對試得過
無可否認, 我和哲爸喜歡的都是進口磚, 朋友介紹相熟的店鋪專營大陸磚卻一款也看不入眼. 既然有人分享大陸磚都有平靚正, 或者在香港入貨既大陸磚, 鋪位所限只得少量陳列出來, 聽聞深圳的田貝四路家合居有好多建材, 地磚款式更是多到擺唔晒, 一於搵日安置好大小劉生, 同哲爸殺上去, 睇下大陸磚質素, 款式及價錢相差有多遠, 再作決定
十年無返深圳既我, 對深圳既印象仍停留在烏煙瘴氣d人周街踎. 哲爸話依家既深圳環境衛生比以前好得多, 咪咁港燦...
網友教路搭地鐵又快又方便, 不過初次到步, 穩陣都係搭的士算. 由羅湖火車站搭的士到家合居, 大約rmb23, 十分鐘路程就到
的士車到我地呢度落車, 唔係正門, 望落家合居好似好大, 朋友說入面幾好行, 建材集中, 行一日都行唔完
事實家合居真係幾好行, 比我想像中企理, 無咩煙味怪味, 想搵咩建材在directory可以找到, 只是廁所超可怕, 簡直要閉氣合眼加九秒九先可以甩難, 下次再來我決定一滴水都唔飲
好, 先由二樓開始!
第一間叫深圳大暉錦興建材行 (A2013鋪), 打正旗號賣中國名牌「樓蘭」磚
一開始看上呢隻淺啡色, 放牆身掛起時就覺得隻色唔錯, 不過一放落地又覺得太淺白, 有點冷冷的感覺
呢隻深少少色好似比較好睇, 木紋磚摸落手感唔錯. 價錢是rmb9, 15x60
第二間叫藝琅軒 (A2011鋪), 呢間花左唔少時間去尋寶, 因為有我最鐘意既花磚同復古磚, 而且睇眾多間木紋磚當中, 呢間既木紋, 色澤同手感都是我最滿意的, 價錢還很便宜!
肉眼睇加影相做紀錄真係好難分辦, 所以我早有準備, 帶左幾塊灣仔比較喜歡既磚既樣辦黎做比較, 一拼埋上去, 效果不比進口磚差. 呢隻木紋磚既牌子叫「金尚駿」, 聽都未聽過, 連上網search都搵唔到太多資料, 價錢是rmb7, 150x600
呢d復古磚加粒星都好特別, 不過欣賞下好喇, 屋企無花園可以鋪. 鋪大廳又怪, 鋪廚房咁細望落好小家. 復古磚rmb13, 粒星rmb5
超靚pattern既花磚, 在灣仔旺角真係好難搵到咁多咁靚, 用黎砌廚房條border或者廁所做特色牆都好靚, 價錢比香港的平, 這裡rmb23塊. 真係有得比我揀, 我都唔知點揀, 款款都咁鐘意!
如果呢間鋪頭d磚可靠既話, 真係完全可以在一間執晒全屋需要既磚, 一次過搞掂晒免煩!
第三間就係好多香港人都會幫襯既馬可波羅瓷磚 (A2035鋪), 去到已經有幾位香港人問價殺價買大理石
呢間既木紋磚無咩選擇, 睇極d款同色都唔岩心水, 反而廚房用既牆磚就搵到自己想要既顏色. 想營造鄉村風既廚房, 牆磚方面都係簡潔為主, 以上價錢是rmb7, 30x30
行到有d肚餓, 但唔想洩左道氣, 一於繼續睇埋呢層再作打算
(續)
延伸閱讀: 【裝修】田貝四路家合居揀磚記 (二)
沒有留言:
張貼留言