jul 28
揀門買門真係一件好頭痛既事
六月的時候, 和哲爸快看一圈, 已知揀門一事肯定難以選擇, 盡量抽時間和哲爸到旺角建材街一帶睇定有咩心水. 月頭的時候師傅w叫我地係時候訂定門, 準備裝房門同大門框, 不過睇左前後四五次都好難抉擇. 結果拖左師傅兩星期先落實到買邊道門
時間少, 只得假日可以出去睇料, 又要帶住兩隻馬餾, 睇多陣都叫悶, 一係在人地鋪頭搞搞震, 話得呢個時又要捉住另一個, 根本就睇唔到D咩野. 有次仲趕到襯哲學校綵排未放學前帶住細佬撲出去再趕返去接放學, 去到鋪頭睇唔夠半個鐘就要走人, 真係大汗疊細汗
款式方面, 哲爸喜歡大宅門那種古舊式, 雖然我都鐘意, 不過用在三百呎(不是三千呎耶)的家好像格格不入, 希望找到一些像新式住宅/apartment的款式
房門比較喜歡白, 奶奶卻不是太喜歡淺色/白色, 覺得小朋友容易撞花, 而且唔襟睇, 過幾年就會黃. 反反覆覆想了很久, 還是決定揀灰白色, 一來自己喜歡淺色, 二來大廳沒有陽光, 如果用白色既房門可以將空間擴大, 望上去也較明亮
旺角咁多間木業都有睇過, 最後縮窄範圍:
三x - 門款式又多又靚, 顏色同木紋都有好多選擇, 但價錢真的比較貴, 大門(實心門)同其他木業差唔多價都係二千到尾, 部份大門過三千, 五吋木框就最貴, 要$1800一個; 房門(空心門)千多元左右, 4"框$1100, 送貨$400次, 網上評價大門實淨質量好, 去過幾次旺角同灣仔鋪, 服務唔錯
泰x - 一入鋪頭真係超級多人, 款式比較大路, 價錢也較親民, 很多太太孖住老公一齊落單, 不過沒有睇中特別的款式
浩x - 呢一間款式都唔錯, 不過木紋同顏色選擇稍遜, 房門沒有我喜歡的灰白/白色, 那種白是真的太白, 那種木紋也不是我喜歡; 不過大門方面就一眼看中, 鎖定非它不買, 價錢也不貴, 和其他木業相約
這道椰殼大門一眼就愛上了, 可能看太多平平無奇的大門, 突然看到這個眼前一亮, 就決定是它, 價錢也不貴啊, $2950另加5"框$940, 封口線$279, 一次性送價收$250. 門有兩隻色揀, 紋理是我喜歡的水曲柳, 只是擔心咁花巧日後會唔襟睇, 又或者d椰殼用耐了積塵唔好睇也難以清潔
這幾隻房門, 不過不失, 說很喜歡又不是, 最喜歡是和x的, 但分開買會蝕兩次運費, 而且價錢也比浩x貴, 區區普通房門無防盜性都咁貴, 哲爸實鬧死我
順帶一提, 浩x有電子鎖買, 跟大門房門一張單, 全單有八折, 電子鎖九折, 很抵耶, 所以也買埋了samsung的電子鎖~
和x - 呢間稍為有research一下應該不會陌生, 價錢幾乎是最貴! 但款式各顏色絕對是我的心水, 大門平均都要過三千, 房門也比其他木業貴多幾百
房門大門其實都幾好, 不過我唔鐘意有字, 白色實心門又太貴(房門無必要用上實心木), 薰衣草色又唔太襯屋企個tone
睇左好多間, 和x呢道灰白水曲柳房門我真係好好好好鐘意, 唔會太白, 帶點灰色, 紋理和浩x揀既大門一樣都係水曲柳, 不過價錢都好好好好貴. 房門$1470, 5"環保框+封口線$1110, 因為廁所要做趟門, 所以另加木殼$550, 廁所門框$200, 運費$320送上樓
考慮左好耐, 最後決定大出血分開兩間買, 大門同浩x買, 房門廁所門就同和x買, 不過我無後悔, 因為出來既效果真係好靚, 親戚朋友個個見到都讚個大門特別, 又讚個房門同全屋色tone好襯好舒服, 大廳個空間感增大了, 所以物有所值, 要努力d打掃保持光鮮了
鐵閘無特別鐘意咩款, 揀左最平, 最簡單無花紋既款, 最緊要夠闊有位掛遮就得, 哈哈
終於落實晒, 需時三個星期訂造, 數數手指要八月中入伙都真係炆炆水, 希望趕得切喇~~~
沒有留言:
張貼留言