(終於有時間砌好張檯, 坐定定開電腦打篇blog. 家, 搬定了, 我們很幸運, 新居有驚無險完成度及滿意度值九十分, 只是還有點手尾未執完, 雜物也未完全安置好, 現在繼續龜速補文中~)
jul 27 (day 46)
踏入七月, 進度真係好慢好慢, 一方面覺得樓上單工程令師傅要調動人手上去, 另一方面都覺得師傅w放慢手腳, 由之前一日有兩三個人上黎, 到最近可能一個人, 更有時三日先有師傅黎tim, 可能同時接左其他工程掛, 總之我要八月交吉準時比到間屋我就由佢喇!
牆身開始批灰油底油, 個場仲係好爛好爛
廁所有好多呢d一撻撻黑色油/膠, 要叫師傅盡快清走佢先
廁所因為想慳位d, 唔做推門做趟門, 見到師傅開始做個木框了
廚房鋪好花磚, 但鋪左磚變左有一級凸起唔平全幅牆身, 要叫廚櫃公司幫我做修口加塊側板先
去水喉師傅做好了, 希望做得夠貼牆同夠底, 廚櫃果度會fit位d
師傅話開始要裝冷氣機同封埋個冷氣機去水喉, 所以冷氣機都送來了. 話說之前一直都在考慮, 好唔好咁早就送冷氣機黎, 網上有分享話太早送黎, D師傅會成日開住用, 電費貴左不特止, 封口做得唔好, 仲會攝晒d灰石入出風位. 不過天氣咁熱, 將心比己, 間屋咁焗班師傅開工咁辛苦, 有冷氣應該會爽手d既...
jul 30 (day 49)
先update一下樓上既進度先, 今日開始試水, 師傅話穩陣起見要試多幾日, 咁講即係一個星期都完成唔到, 不過難得樓上肯比我地入屋整, 幾大都試真d, 無再漏水先好
(詳情日後另開一篇blog文再談)
今日終於見到另一個師傅喇! 呢位應該就係油漆師傅, 終於開始油油了, yeah!
大門上面條陣嚴重唔係水平狀態, 師傅話稍後會線一線灰鏟返平佢
兩間房油左dd底油, 冷氣機師傅已經裝左同用報紙封好了
師傅w正在整緊條冷氣機軟喉, 將條喉度位安入牆身
依家先睇得明, 原本條冷氣機喉係經廁所個天花咁出返去露台, 個位望落好似唔夠高, 希望唔會影響個假天花, 唔會頂到哲爸喇
之前因為個鋁窗太細個分體出唔到去, 師傅終於肯拆走同換左個大窗框
分體機都裝好了, 遲d要叫師傅幫我地裝塊板, 擋一擋落雨時無咁吵, 部機都唔洗比d雨落到咁應易壞
廁所趟門木框做好
開始預廚房假天花度位, 雖然仲有好雜物, 但都睇到條去水喉算幾貼
仲有半個月, 係咪真係可以如期入伙呢...?
aug 2 (day 52)
又update一下樓上情況先
試水幾日, 無再滲水, 師傅已經鋪好地磚, 裝返個馬桶就叫正式完工, 從此唔會再受樓上滲水爛天花既困擾了~
輪到自己屋啦, 見到師傅開始油我地之前揀定既牆身顏色, 睇清楚, 無買錯, 色號都岩. 曾經聽過有人分享, d師傅會用d渣油倒落呢d有牌既吉罐幫人油牆, 所以都係睇清楚佢真係開呢罐油先安心
修左口靚仔好多, 不過到時都要等埋套廚櫃黎, 現場砌先知呢d板高度岩唔岩
訂造地台, 衣櫃同廳櫃果度, 特格出左d問題, 唯有轉同師傅做埋, 今日出左去揀formica皮, 想同廚櫃一樣揀埋白色皮面, 不過間房陽光好足, 怕成日曬d板變黃唔襟睇, 揀灰色哲爸又話cold左d, 最後揀左淺啡木紋, 希望出黎既效果會好
要做決定要買既野都完成晒, 前後過程花左幾個月時間, 終於唔洗再諗再research再睇再做決定, 餘下就係不停催師傅趕工, 睇下師傅點樣將一樣一樣既小組件砌成一個安樂窩了
沒有留言:
張貼留言