大個仔大個女。紅豆綠茶去絕育喇！

aug 1, 16

紅豆綠茶日漸長大, 開始想: 何時為紅豆綠茶做絕育手術?

四個月大時見獸醫, 醫生建議足六個月, 夠2.5kg重就可以; 貓義工說最好等大到九個月才做, 身體器官各方面發展成熟d會更好. 貓女最早五個月就會發情懷孕, 而貓仔本身不會有特定時間發情, 但遇上發情中既貓女, 就會被其叫聲及獨特既氣味而自我引爆

男女一室, 日夜對住, 人都早熟, 難保貓唔會提前發情...

七月頭的時候發現綠茶開始有古怪, 雖然沒有腳仔踢踢, 半夜叫春的情況, 但間唔中有一兩下大聲既怪叫, 見佢蘿柚突突扒係度, 鐘意挨身挨勢. 一向高竇既綠茶反常到成日抱住人隻腳板黎聞, 同阿豆打架時, 一被咬就硬晒軑, 個樣發晒姣咁款, 我們懷疑茶茶發情了

這個時候紅豆沒有綠茶般早熟, 見到綠茶怪模樣, 避得遠遠以為綠茶發神經, 也沒有多理牠. 隔了幾日, 綠茶變回正常, 有日又突然見到紅豆咬住綠茶頸皮, 騎上身有交配的動作, 綠茶即時惡女上身, 不肯就範, 擊退紅豆

幸好牠倆發情的時間不一樣...

為免搞出貓命, 待我們月尾去完旅行可以多點時間照顧牠們, 約實在牠們六個半月的時候去做絕育手術. 對紅豆來說, 六個半月做可能早了點, 貓義工也有說遲一點做對貓仔既尿道發育更好, 為免紅豆發情會四圍噴尿, 經常打鬥及離家出走等等這些不良既習慣, 防患於未然, 於是兩兄妹拍住上, 一齊禁食, 一齊做

問了屋企附近兩間獸醫, 一間太貴了, 硬性要為貓隻驗血連照X光, 兩隻夾埋要6k咁滯; 另一間較平, 兩隻夾埋2.3k, 而且可以用早前在愛協申請左既絕育coupon, 不過從沒看過, 聽朋友說口碑都唔太好...問了愛協流動絕育車, 我們這區沒有提供服務

經過一輪資料搜集, 最後決定去npv, 價錢公道, 男仔$300, 女仔$500, 另加針藥錢幾十蚊, 口碑亦唔錯, 就算call gogovan, 費用也比附近兩家診所平, 於是就約定了1/8一早做手術

手術前十小時斷食, 三小時斷水, 約左朝早九點做手術, 等紅豆綠茶唔洗餓太耐...結果一早起床兩兄妹喵唔停要我放飯放水, 陰公豬豬你地要再餓下先...

問朋友借多個貓袋, 一手一隻抱入袋, 入袋時仲矇盛盛, 出到門先知驚, 喵得好慘烈

上到車, 綠茶靜靜咁縮埋一邊四圍望, 然後眼都唔眨啤到我實一實, 咩事姐...想殺左我咁款, 見到佢既眼神, 真係心都寒埋

豆就不停大聲喵, 上車喵到落車, 去到診所見醫生聽心跳時, 個身震過貓王, 死抓實個貓袋唔肯出黎, 睇唔出平時大膽八卦既豆, 出門會咁騰雞

醫生做了簡單檢查, 講解了手術既過程同風險, 就要放低兩位小朋友, 傍晚先可以接回. 希望一陣手術順利, 平安回家

中午的時候, 天文台預告晚上將會掛八號或更高風球, 擔心走時橫風橫雨, 又要擔心一陣無車call返屋企. 於是急急同診所姑娘傾有無得早少少接走, 結果4:30p.m. 去到診所, 拿了藥就跳上車返屋企, 幸運地, 那時天氣未算壞, 只有毛毛雨粉

返到屋企, 兩隻喵好似唔認得大家咁, 步步為營, 互相接近大家聞一下, 但又驚青想打架咁款. 紅豆比較精神, 開始四圍喵想我放飯; 茶就比較靜一點, 也許麻醉未散. 醫生建議先餵點水, 沒有嘔吐就可以餵少許貓糧, 保持傷口乾爽, 同埋要戴頭套防止牠們搞到個傷口, 十四日後再帶綠茶返診所拆線

兩隻衰喵無晒精神, 無計...為左你地好, 一定要戴頭套

生無可戀咁款XDDD

茶茶個肚剃了一大片毛, 傷口不知道算不算大, 看上去沒有腫也沒有血水, 我想應該沒問題吧

至於阿豆呢...見到都蛋痛, 以前可愛既小蒜頭/小山竹, 以後都唔會再見到了, 嗚嗚T.T

晚上掛八號風波, 吹到門同窗都fee fee聲, 嚇到兩隻喵都唔敢訓, 警戒狀態望實個大門

陪了兩喵一陣, 牠們才能安心入睡, 茶茶真係嗲嗲豬, 要攬住我隻手先訓得著

觀察了幾天, 兩喵很精神, 無嘔無暈, 雖然戴左頭套行動不太自如, 但都可以跳上跳落四圍玩. 隻傻豆vv更因頭套失平衡, 想好似平時四腳企係盤邊卻向後跌, vv拋物線咁痾出黎, 笑死我地. 希望兩位小朋友傷口無發炎, 兩星期後返診所拆線, 還你們自由~~