現在的哲哲和 一年前 比
古靈精怪許多了
呢一日仲學識比人訓話完後多多聲氣同伸脷做鬼臉!
哲哲今日出奇地好訓
原打算早少少上 joyce家可以傾傾佢同杜瀾辦喜事酒席既野
不過哲哲訓午覺訓到失晒預算
最終差唔多遲左兩個鐘先上到去
不過亦因為咁哲哲叉足電
唔洗擔心一陣眼訓扭計仔
上到 joyce屋企, 哲哲第一時間發現左兩隻龜龜, 一入門口就嘩嘩聲要衝入屋, 完全唔似平時既佢, 會痴實我望一陣先敢周圍行. 大膽既哲哲, 企上石階伸隻手入缸水度想摸龜龜, 但我地就好驚, 因為怕隻龜龜咬佢會好痛痛
越唔比就越要搞, 哲哲成晚心思思要爬上沙發睇龜龜. 你睇下, 唔夠高又要死抓住唔放, 個樣幾咁牛王仔!
食奶時候, 哲哲好唔客氣當正自己屋企, 自動波搬起個枕頭訓落地下等奶到
未見到肥貓真身, 唯有邊食奶邊拎隻假肥貓玩住先
自識識地野後, 哲哲第一次近距離接觸貓, 仲要係一隻好黑好大隻好無脾氣既肥貓! 結果哲哲當左肥貓係 wow wow (不過我地更正佢叫貓貓時哲哲都會叫貓既), 仲意圖扎行馬用個肚迫住肥貓唔比佢行. 哲哲, 好狗唔攔路喎
哲哲對肥貓不理不睬, 叫極唔應一叫就走的態度好不滿, 於是迫肥貓去牆角位仲以周星星形式去踢肥貓. 肥貓, 快 d閃呀!
無耐 selene都到左, 傾左陣我地就食西瓜消暑, joyce準備左支好得意既叉比哲哲, 不過哲哲見我地用牙簽食, 於是扮大人又要用牙簽自己拮黎食, 完全唔要我幫手
既然捉唔住肥貓, 哲哲就玩肥貓既玩意, 係咁拍個吊波, 個手勢...又幾似揮板打乒乓波喎~
呢個咁有功架又咁雄厚既背影, 就係杜瀾啦! 杜瀾一路煮, 屋內充斥著煮食的香味, 引死人啦~好在最後杜瀾唔洗返工可以落廚, 老實講, 知道杜瀾要返工時個肚有少少虛同失落, 哈哈
哲哲知道杜瀾煮緊好野, 成日心思思走入廚房找杜瀾係咁叫 "may" (即係美味/有野食咁解) 同搞搞震, 最感興趣的就是這盤正在浸沙既花甲. 既然哲哲咁想搞, 見浸好出晒沙就比哲哲摸下花甲, 咪見哲哲對住 d花甲咁斯文, 鏡頭背後係咁丟 d花甲落地, 我地幾怕丟爆左無得食
襯未開飯天又未黑, 影左合照先, 除左哲哲大個仔之外, 我地三位靚女一年比一年靚, 勁得!
同上年一樣, 點解鍚親哲哲個樣都咁乞人憎ga?
對哲哲黎講, 最折磨既事就係有得睇無得食/等食果種滋味, 正當 joyce一片一片咁切 d青瓜蕃茄, 一片一片咁鋪落個沙律碗時, 哲哲睇到流晒口水, 眼都唔眨係咁咆哮, 好肉緊!
左圖兩位靚女正在準備開餐, 右圖既我就準備緊個蕃茄凍湯
呢一個就係哲爸點名 encore上年既菜式: 烤茄子翠玉瓜青瓜蕃茄沙律! 真係要多得上年我地影左相又放左落個 blog度, 話說杜瀾煮過無數菜式, 邀客無數, 都唔記得左上年哲爸特別稱讚個沙律汁係咩, 好在睇返我個 blog就睇得返. 杜瀾萬歲! 我個 blog萬歲!
鮮蝦香草意粉, 呢個好 arm哲哲胃口, 哲哲不停咁 sir意粉, 係咁讚 "may"! (美味)
仲有 selene買黎既白酒
仲有之前所講既蕃茄凍湯, 辣辣地, 好好味. 配埋烚薯仔伴湯飲, 口感一流. 另外仲有我點既白酒煮花甲 (都係 encore返上年, 不過由蜆轉左做花甲, 好有咬勁!), 個湯底好好味, 就算個湯有少少白酒, 比左哲哲飲幾啖, 哲哲都唔怕苦, 無抗拒仲一飲再飲. (唔通哲哲係一個酒鬼?!)
開餐前既大合照, 杜瀾身水身汗落足心機煮餐好比我地享用, 辛苦晒!
咪睇鏡頭前哲哲坐定定肯望鏡頭, 等埋位影大合照時哲哲為食到發癲, 我就捉住哲哲隻手唔比佢搞煲蕃茄凍湯, joyce同 selene一人捉隻哲哲一隻腳, 免得佢踢來踢去之餘, 燙到煲白酒花甲. 緊係啦, 上年哲哲仲未食得大人飯, 依家大個仔知道有好野食點會唔猴急? 猶記得上年開奶比哲哲熱水熱得滯仲要係咁用水喉水沖凍比哲哲, 話咁快哲哲可以同我地同檯食飯了
成晚哲哲見到肥貓就虐待佢, 一係就用超高頻既尖叫聲嚇走肥貓. 難得哲哲主動溫柔鍚鍚肥貓, 不過肥貓明顯好驚哲哲, 比杜瀾夾到實一實先無得走, 勉強就範. 再睇睇杜瀾個表情, 好有父愛 feel, 幾咁慈愛~
飯後又傾又講多陣就同 selene返歸
希望下次再拜訪杜瀾同 joyce時兩位已經拉埋天窗
唔係再傾結婚酒席
而係傾陀仔生仔經囉, 呵呵~
沒有留言:
張貼留言