may 23
不得不說, 女人真係強, 兩個女人仔, 帶住兩個細路, 一個接返放學, 一個留家繼續最後努力執屋pack箱, 由早到晚無停, 幾個鐘內將間屋還原得七七八八, 真係唔講得笑
約左今日下午搬屋, 因為上午還要帶哲返學彩排畢業禮, 唉, 屋企仲有好多濕星野未執, 時間一點一點的溜走, 開始有d擔心執唔切
本來約搬屋公司兩點半, 好等接完哲哲放學食完lunch先開波, 點知搬屋公司提早到來, 唯有奶奶先帶住細佬接哲哲, 我留守家中等候. 時間到, 仲未執好晒野, 搬屋公司的五位大漢已經殺氣騰騰咁分頭行事, 有位師傅見我仍努力入箱中, 問準我幫手摺箱將我d雜物pack好搬走. 三兩下省手, 屋企所有箱同大件傢私都移走了
奶奶一接完放學就趕去跟車帶路, 我帶住兩位劉生到新屋接應. 新舊屋只有一公園之隔, 要是搵幾個大男人幫手的話, 也可以拖車仔推過去, 不過這些辛苦錢還是請專業人仕幫手吧
新屋比現居細, 雖然吉屋一間, 一時間塞滿所有傢私, 想搵條路行都難
事前已經諗好晒d傢私點放, 想放高身書櫃在房門旁, 但有部冷氣會擋住出風位, 結果要逐少清箱後要自己移返去大門旁邊, 還有那些電視線寬頻線要就位...
未換校服就已經爬上張床, 好興奮咁樣~
細佬頻撲了, 稍為安置好張床裖即刻訓著...
哲哲見悶無野做又唔眼訓, 不停叫我地拆箱玩具佢玩住先, 不過根本就無地方玩, 過左陣哲哲主動地幫麻麻手整理廚房, 乖仔
不停開箱拆箱還原到十二點, 三十幾箱既野拆到得返三四箱, 終於可以休息了
本來想將bb床放埋入哲哲間房, 但因為奶奶今晚過夜, 唯有將餘下既箱移入房, 留待聽日繼續, 細佬暫時再做一晚廳長吧
至於大廳還算過得去, 短短五六個鐘有咁既進度已經好滿意了. 完了一天腰骨都散, 明天繼續努力!
(續)
沒有留言:
張貼留言