(龜速補文中...)
apr 2
坐月期間是建立奶量的好時機, 姑娘建議每兩小時埋身一次, 雖然如此, 但兩餐奶中間仍不時漏奶, 特別在初一喊的時候, 一喊就不停漏, 漏到所到之處地下都有條「奶路」
(點解聽到bb喊聲會漏奶? 之前睇過一篇文章話情緒影響, 媽媽聽到就會不自覺的漲奶為bb製造更多的奶, 所以話母乳係咪好神奇呢...天生為bb準備好了)
因為想初一吃多點後奶增磅, 所以如常的走到洗手間擠走一點透明的前奶. 咦...? 點解有條幼奶柱既? 平常睇網頁聽得多, 終於我也有第一條奶柱啦~~~
餵左兩個星期, 終於在左邊的看到奶柱, 雖然只得一條, 不過我覺得很興奮, 於是不停的擠呀擠, 越擠越有, 噴了幾次之後就無了
抱著阿Q精神既我, 盡量不去想初一吃了幾多落肚, 會不會不夠飽, 總之feed on demand, 一喊就餵, 亦無諗啜極都喊係咪自己唔夠奶, 因為我相信, 一對乳房天生就是為bb而設, 只要初一肯啜, 一定長啜長有; 吃奶粉的都一樣會喊, 不能因為bb喊就所有茅頭都指向奶媽度
一定要努力!
哲哲, 你是在懷念以前訓過這張床嗎?
apr 4
埋身餵確實很累亦有很多不明白的地方啊...
初一最近吃奶的問題多多, 鐘意邊食邊痾, 一餐奶換片成兩三次, 一天餵八至十二餐, 真係換片換窮我; 吃奶吃五分鐘就含著不啜也不放, 邊食邊訓, 整極都唔醒, 一放落床就喊不停, 特別一到傍晚的時候, 一定要黏著人不放, 全日不停埋食, 有時仲邊啜邊喊...究竟咩事呢? 真的是吃不飽嗎? 還是出奶出得不順?
太多太多問題, 於是打電話請教母乳育嬰協會熱線, 又不停的research下過來人的答問, 得出部份原因:
- 邊食邊痾是正常的, 因為初生bb直腸直肚, 而人奶又比較水, 所以bb容易便便, 不過亦有可能因為吃得太多前奶所以便便較多, 姑娘建議餵之前可以擠走部份前奶, 直至見到乳白色的後奶才餵 (前奶補充水份, 後奶飽肚增磅, 有姑娘認為前奶後奶一樣重要, 不應擠走前奶, 所以做法如何都是要看自己決定囉)
- 邊食邊訓的問題就一定要糾正, 否則餵足一個鐘其實bb也沒多少奶落肚, 無論如何一定要整醒bb
- 一到傍晚又喊又要食奶又要抱, 惡搞到點搞都解決唔到, 不是bb撞邪, 也不是有什麼不妥, 外國稱之為「fussy hour」. 遇上這個情況, 可以做的其實也不多, 都是咬緊牙關, 盡量令自己及bb心情保持輕鬆 (雖然真係無咩可能), 大部份bb會於三四個月時變回可愛的小乖乖
細佬個喊樣特別惡爺 (哲哲細時可愛得多), 每天五時陪月走後, 要獨自應付小魔怪變身直至哲爸回來, 這段時間真的好難捱, 每天都盼望哲爸快點回來接力吧. 說也奇怪, 任我如何抱如何安撫細佬都依然不停的喊, 哲爸回來一抱就安靜到扮若無其事, 搞到比哲爸窒我咁小兒科都搞唔掂. 細佬, 你是在蝦我嗎? 哼!
apr 6
好野! 連右邊都有奶柱, 左邊進帳到有兩條啦~
不過同時亦確定, 我已經成了人肉奶嘴了, 嗚嗚...呢個初一都是含著訓多過食, 食食下訓著, 整醒佢敷衍我啜兩下又訓過, 見佢訓著放落床又喊, 幸好...拍幾下都可以好快訓返, 不過真的很花時間, 一餐奶幾乎要吃四十五分鐘還不知道吃了多少
計計時間, 兩個鐘餵一次, 每次細佬邊食邊痾連換片, 前後共花四十五分鐘, 真的沒多少時間可以休息或者陪哲哲...究竟好不好泵出來餵呢? 可以睇到食幾多之餘, 又可以請陪月幫手餵, 我又可以掙取時間休息, 不過我又捨不得埋身那種親密感...
初一你真係識貨, 唔要奶嘴但要人肉奶嘴, 鬼叫姑娘話人肉奶嘴其好處是同樣有安撫作用加親密感之餘, 還可以邊啜邊有奶落肚增磅, 一舉兩得, 唯有辛苦媽媽我喇...
沒有留言:
張貼留言