jul 20
上文說到割完眼瘡不夠三天, 這天影完studio相後, 晚上初一熟睡了時看到右眼眼頭有點紅紅, 突然有種不安的感覺, 以為是扭哭完不久加上燈光暗, 自己看不清楚而已
直至一覺訓醒, 第一時間撲出去看看初一, 果然...果然像上次初起一樣, 眼皮帶點紅腫, 這次不敢輕率, 第一時間打電話比眼科醫生, 將覆診的日期提前到最快的日子
很不幸, 楊醫生再次說初一眼頭也塞了, 未必關上次眼尾的膿不散走到眼頭, 總之就算成因不明. 醫生說襯早不如勤點熱敷, 或者有效, 基於前兩次狂熱敷搽藥轉醫生的經驗, 真的很氣餒, 亦深深認為, 手術只是唯一的出路...雖說醫生話眼瘡生開有條路, 會不斷的翻發, 割完又割的情況很常見, 但想不到在手術後短短兩三天, 還在搽抗生素的情況下再次生眼瘡, 而這次眼睛含膿的情況惡化得很快, 半天已經腫得很厲害
再入院做手術都唔係辦法(主要係無錢...), 唯有打電話預約排街症. 多得麻麻狂打電話之下, 終於駁通了, 睇完街症醫生寫紙轉介到威爾斯眼科. 第一次去入紙排期, 見到寫住排到2013年的10月, 簡直是呆了...
幾天後約到期第一次見醫生, 醫生建議初一割眼瘡, 唯一不同的是, 政府醫院不會做全身麻醉, 只會硬生生的按實初一, 手起刀落的割穿放膿
幼稚園時我曾試過生眼瘡, 當時也是在診所被兩個姑娘按實不得動彈, 清清楚楚的看到醫生下刀, 那種痛到手心標冷汗的情景. 那時我知道危險, 幾痛都自然不敢亂動. 可是初一呢? 他只是個初生bb, 無情力姑娘又接不實的話, 割傷眼球點算?
聽醫生語氣, 態度輕佻, 說什麼「蝦bb唔識痛, 好快唔記得」「咁細個bb, 我就唔信幾個大人都襟唔實」這個醫生究竟有無同理心? bb唔識痛? bb點會唔識痛, 佢一樣知痛, 平時滴眼碌雞蛋, 次次都叫到呱呱痛, 只係初一唔識講個痛字而已...
小手術安排在兩天後做, 與此同時, 我們也約了浸會醫院的眼科中心-林子顥醫生, 之前我鼻竇炎睇佢覺得佢好細心, 今次睇細佬主要想聽多個專業意見
分析一輪, 林醫生認為威院的藥和浸會的沒有大不同, 而短時間又不可能再次全身麻醉, 返威院做, 似乎是唯一的方法, 不過林醫生說細佬粒瘡已經好大粒, 好成熟, 應該等唔切手術果日, 今晚或聽早就已經會穿
結果當晚細佬粒瘡在晚上突然自行穿了, 聽林醫生的意見, 用乾淨的棉花為細佬索走黃黃綠綠的膿, 仲有少少含膿的, 留給威院割好了
aug 2
準時兩點到威院眼科, 等了差不多兩小時, 終於叫到細佬的名字了. 幸好做手術的不是上次那位冷血求其醫生. 這次的醫生很明白我的憂慮, 說明他們會用毛氈包住細佬的手手腳腳, 再有幾位姑娘按實細佬, 落刀的大前題是要安全, 如果細佬爭扎得太厲害, 他們是不會強行的. 聽到醫生主動詳細的解釋, 我對醫生的信心即時大了很多, 抱了細佬入治療室後, 為怕聽到細佬的尖叫聲我會喊, 我選擇坐到最遠的地方...
細佬當然很驚慌, 關上門後就開始喊了, 突然一兩陣慘喊聲特別大, 就算坐得遠遠還是可以聽得清清楚楚, 眼淺既我自然忍唔住偷偷啜泣, 真的很心痛
手術門開了, 看到細佬一刻更是泣不成聲, 醫護都在安慰我們細佬喊媽媽也喊. 醫生說手術很順利, 在眼頭開了一小刀, 所有膿很順利的排清了. 回家如常的搽藥好好護理, 應該很快好
經過這次事件, 實在很感激身邊有一大班朋友的幫忙, 在我無助的時候, 個個都給我不同的安慰及意見, 知我忙碌又主動幫我找專科醫生預約及有關資料, 真的是無言的感激. 希望細佬乖乖, 唔好再輕易的翻發吧...
p.s. 題外話, 我以後都唔會再去仁安分科睇醫生, 太唔專業, 服務太差了! 覆診的時候楊醫生說要細佬吃抗生素, 然而卻不知道這樣小的bb該開多少份量. 之後要我自己再排當日的兒科. 可是八號風球快要來臨, 所有的兒科都full booking了. 自己趕收工就留下我和細佬付了診金卻無藥搽又不知所措. 問姑娘可不可以兒科醫生回來的時候第一個看先, 反正都是問問藥的份量就可以了. 姑娘又說這樣對其他人不公平, 一係要我另約時間, 一係要我在診所無了期的等有人遲到失約才有得攝時間睇!
最離譜的是, 等了個多小時之後, 終於可以攝位見見兒科醫生. 醫生說不認為細佬要吃抗生素, 反之卻說細佬體重輕, 吃母乳不夠營養, 要我硬買額外的營養水給細佬長期喝, 還質疑我咁瘦是否節食, 令細佬不夠奶不夠營養
當時已經夠心痛夠擔心細佬的病況, 無鼓勵說話之餘仲要落井下石, 最氣憤的是無神神硬要買埋d營養水及診金, 是日眼科連兒科診金藥錢盛惠千多元. 點解個眼科唔識開咩份量唔同個兒科醫生傾, 而要我再睇多一次兒科比多一次診金? 點解仲要我食埋d唔關眼事既營養水?
氣憤, 失望, 除了這四個字, 我再想不到其他形容了!!!
(續)
沒有留言:
張貼留言