sep 3
多啦A夢誕生前一百年祭, 在海港城設了個大型紀念展覽, 在fb看到朋友share的照片好吸引, 剛好最近J2正在播多啦A夢, 哲哲看得很開心, 聽到有一百隻多啦A夢就更想親身去看看, 於是這天放學後和哲哲尋找一百隻多啦A夢
無花無假, 哲哲竟然堅持到影齊一百隻多啦A夢, 要比d掌聲哲哲先得!
第一站: 先到美術館, 看未來法寶的概念展
哲哲話胖虎好乞人憎, 所以一見到佢就要攔住佢~
多謝triple, christine同sara, 我地先可以免一早排隊拎飛仔, 趕得及在最後一場入內參觀. 話明係未來法寶的概念展, 入面有好多愛好多啦A夢既朋友設計了一些法寶, 好多都好有趣, 不過哲哲個心明顯想趕出外看一百隻多啦A夢, 頻頻催著走...
第二站: 是大雄的結婚前夕
大雄和靜香終於結婚啦, 能夠看到膽小又窩囊的大雄, 經歷不少挫折, 發奮起來, 這一幕設置在碼頭外, 此刻在夕陽既輝影下, 能夠和心愛既靜香結婚, 對於一班粉絲來說, 好感動呢~ 而我們也排了一會, 哲哲好不耐煩問幾時先有得睇, 終於到我地時, 哲哲好奇的不停看著大雄, 又不停的摸下大雄的真身, 都顧不得鏡頭了
(當時雖然有得掃興哲哲不合作, 不過想起來, 哲哲這樣喜歡多啦A夢, 難得能夠見到真身, 在短短幾秒之間只能拍照, 又如何填人飽他的好奇心呢?)
第三站: 一百個手持一百件不同神奇法寶的1:1多啦A夢
終於到左哲哲最期待既場景啦! 事前哲哲話一定要影晒咁多隻多啦A夢, 就睇下哲哲係咪真係影得晒先!
呢一日唔算好多人, 專挑呢一日來看多啦A夢, 是因為剛好這天是多啦A夢一百歲生日, 一百隻當中換了一隻特別版 - 是黃色的多啦A夢呢~ (黃色才是多啦A夢原來的顏色)
嘩, 真係好多人! 人人都爭著和這隻特別版的多啦A夢影相, 我和哲哲由天光影到天黑, 支持不住太倦, 就到麥記吃個餐小休, 知道哲哲堅持要影晒一百隻多啦A夢之後, 哲爸放工也來陪我們一起癲!
巨大的時空門你見過未?
好喜歡呢張相, 哲哲的古怪舉動, 令小粉絲細佬笑到見牙唔見眼, 呢兩隻臭豬真係好可愛~
影到最後廿多隻多啦A夢, 其實哲哲已經好倦無晒笑容, 本來想走的, 哲哲卻又叫我幫佢繼續影, 最後總叫達成任務, 影晒一百隻多啦A夢
第四站: 懷念麻麻的真摰回憶
以為個場景咁up dup一定無咩特別, 睇完個經典場景簡介, 先知道大雄太掛住仙逝既麻麻, 坐時光機回到三歲時的年代, 麻麻慈祥既樣一如大雄記憶當中, 對麻麻來說, 最希望既當然係見到孫兒健康成長, 小學, 中學, 大學畢業, 拍拖結婚生子, 但這當然是不可能的夢想. 所以當小學生既大雄出現在麻麻眼前, 縱使是不可思議, 也令兩人感動不已
為人父母, 我也希望和大雄的麻麻一樣, 能夠看到哲哲和細佬長大有自己的家庭, 再看到自己的孫兒, 所以呢一幕真係令我好感觸
第五站: 多啦A夢臨別大雄的晚上
這個本來入黑前影了, 不過哲哲也是掛住眼也不眨的望住多啦A夢, 所以晚上再回來補影. 一直來看多啦A夢的卡通片都是斷斷續續, 以為沒有連貫性, 最後也不知道結局是如何
呢一幕完全係大雄同多啦A夢最珍貴既友情場景, 哲哲問多啦A夢同大雄咁好朋友, 點解要離開佢. 天下無不散之筵席, 在多啦A夢扶持之下大雄或許不能堅強獨立的成長, 為了大雄, 多啦A夢終於要走, 大雄不怕胖虎和他對打, 終於贏了, 用行動來證明給多啦A夢看, 即使將來出現困難, 也能獨自面對...令人感動的友情, 如果我係多啦A夢, 一定好唔捨得離開...
第六站: 如果電話亭
這個我不知道是什麼法寶, 背後有什麼故事也不知道, 但哲哲就是很興奮的拿起聽筒, 亂說一通~
時間不早了, 到處再拍拍一百年的特別字樣就走了
sep 11
上星期走馬看花睇晒一百隻多啦A夢, 哲哲一直都呻無時間認真咁慢慢睇隻多啦A夢. 呢日放學見哲哲和同學發生了點不快的事, 為左哄返哲哲開心, 於是即興的和哲哲再去一次
上次唔夠時間去個主題餐廳食多啦A夢餐, 今次就一開始襯人少少時即去排隊, 好彩唔算好多人, 前面兩三檯, 排左四十五分鐘就到我地. 個場其實係LCX入面其中一間餐廳撥來做主題餐廳, 做到月尾就完, 所以一定要襯月尾前來吃~
排隊一d都唔悶, 因為餐廳旁邊有道巨大既時空門 (唔洗同一百隻果度爭影相~), 仲有得同多啦A夢合照tim!
睇下個餐牌先, 唔...價錢是有點小貴, 不過難得精緻既主題餐, 真係點都要試, 最可惜我唔飲咖啡, 見到杯杯咖啡都有主角頭像好得意好想飲佢落肚呀, 哈哈
登登登櫈! 嘩, 個意粉餐好精緻, 見到真係唔捨得食落肚, 仲以為個餐味道一般, 食落其實又唔錯, 有驚喜. 隻靚靚餐碟前排有得發售, 不過賣晒lu~
哲哲見到個餐開心到不得了, 好識做咁比我任影唔嬲. 意粉係拿破崙意粉, 印有多啦A夢的麵包灑上紫菜碎, 下面是半件奇異果. 哲哲影完相仲不停望住塊記憶麵包, 問我食完係咪真係會識晒所有數字, 哈哈
個餐仲有個甜品, 係tiramisu來的, 好鬆軟香滑, 附送一件多啦A夢樣既曲奇, 咦? 又幾香牛油味wor!
食飽飽襯仲天光, 上次天黑影時都無咁靚, 一於影多次哲哲最鐘意果幾隻多啦A夢先!
眾多之中, 哲哲最喜歡這隻多啦A夢, 因為「算啦, 算啦」呢個法寶哲哲之前睇卡通片時已經覺得好搞笑, 能夠見到真身, 自不然覺得有趣
其實都識唔晒一百隻既法寶, 於是應哲哲要求, scan左某幾件法寶既QR code, 返去同哲哲睇返d相解釋返...
現在J2已經播完所有多啦A夢的卡通片 (轉了櫻桃小丸子), 哲哲還時不時要我拿回當日的照片給他回味, 問他為什麼這樣鐘意多啦A夢, 他說覺得多啦A夢同大雄好friend, 大雄好懶又成日比人蝦, 多啦A夢次次都有好得意既法寶幫佢, 覺得好搞笑
我想, 或許大雄和多啦A夢是哲哲和白豆的影子, 白豆就像大雄身邊的多啦A夢, 雖然現實中沒有法寶這回事, 但白豆總在哲哲的身邊, 開心與憂愁都總是陪伴著, 在哲哲的幻想世界中, 白豆是真有魔法的呢~
p.s. 雖然我的童年充滿叮噹的舊回憶, 不過創造叮噹的滕子不二雄認為叮噹要更名為多啦A夢, 為表尊重其意願, 這篇文將叮噹所有的角色名字都改為新的了^^
沒有留言:
張貼留言