aug 29
終於到左哲哲最期待既legoland啦~
對哲哲黎講, 成個trip印象最深刻難忘, 一定有legoland份, 食好玩好玩到唔願走~
說起legoland通常最關心的兩件事, 一是門票, 二是由新加坡到位於馬來西亞新山的legoland應如何前往
我們直接在legoland的官網預購門票, 七日前預購可獲正價八折(三大一小共RM424); 再優惠一點可以帶同香港玩具反斗城的星卡+下載電子優惠劵, 即日到售票處買飛可獲七折. 本來是想用星卡七折優惠, 但擔心前一天是假日, 又撞著暑假, 搭成個鐘車來到馬來西亞過關才買不了飛入場就白行掃興, 相差幾十蚊還是早早預購買個安心
門票買好了, 接下來最頭痕的是如何去legoland
坐WTS travel或causeway link最平, 但花時間, 車程耐還要上落車等過關; 有老有嫩唔想咁麻煩, 而且想把握多d時間去玩, 我們決定舒舒服服包車去legoland. 包車問了好幾家, 七人車價錢是SG140-160不等, 有幾間要事先比deposit, 但因為價錢不合, 而且唔想被hold住d錢, 所以我們沒有預付
最後找到了一間是SG120(包來回兩程) , 應該是最平的了, 這間不用事先付deposit, 出發前一天發個sms確認多次日子時間及接送地點就可以. 雖然價錢最便宜, 司機很準時亦很有禮貌, 車廂乾淨無異味, 廣東話聽得明亦說得好, 溝通完全沒問題
等待過關中(包車的話不用落車啊~)
我們約了司機準時九點在住所樓下等, 邊在車廂食早餐, 加了SG10往較快的隧道通往legoland(因繁忙時段另一邊會塞車), 車程大約四十分鐘左右就到達legoland了!
時間尚早還未開門, 我們四周看看, 這個廣場的賣的東西價廉物美, 便利店賣水賣小食很便宜, 幾間餐廳的價錢很合理(加上最近馬拉紙水位跌, 真係比坡紙好洗得多)
夠鐘入場啦! 售票處如圖所見人不多, 不用怎麼排隊就買到飛了. 我們將print好的voucher給工作人員過機入場 (後來我們lunch出去食, 雖然在手背吸了水印, 但再入場還是要拎返將voucher過機的, 所以千祈唔好丟左去丫~)
一入場第一時間排隊揸轉車先!
時間尚早人不多, 等了一轉就到哲哲了. 哲哲不知幾鐘意玩, 一口氣玩了兩次, lunch後又玩了兩次, 臨走前又玩了兩次, 過足癮囉!
如哲哲所願, 幫哲哲做了一張駕駛執照(RM35), 幾得意丫~~
我合格啦! 隔離有個junior driving school比120cm以下的小朋友玩, 最衰細佬太細個唔玩得啦!
如果唔拉住哲哲走, 肯定可以玩driving玩足一日, 於是玩完一次之後即刻挾走哲哲到隔離既boating school. 今次可以大人細路一齊玩lu~
細佬著住救生衣傻更更個樣超好笑! 哲哲玩得好開心, 隻船兜一個圈就到岸, 貪玩既哲哲成日中途來回打圈, 為既就是揸耐dd XDDDD
今日同尋日singapore zoo一樣咁黑仔, 剛剛入場玩緊第二轉就行雷落大雨, 一落雨legoland所有戶外的機動遊戲都要暫停直至停雨為止. 等了好久都未見停雨又不想浪費時間, 於是走到另一邊的玩一個類似巴斯光年射擊既遊戲
shopping shopping! 落大雨無野做唯有shopping!
食飯時間到! 襯未算最多人時出閘去返今早個廣場度搵食. 呢間餐廳既味道水準超正又抵食, 今餐食得好開心, 平靚正比新加坡高消費既食肆食得更爽呀~
海南雞飯肉嫩無骨, 岩晒d懶人同細佬食, 酸辣炸豆腐好脆口, 哲哲好喜歡食, 另一個豆腐(忘了什麼名堂)又滑又嫩, 連冬陰冬湯底既叻沙真係無得頂呀(呢餐RM59.1)~
食飽唔玩d甘激遊戲住, 呢d升高升低既迷你飛機場就最岩玩啦
好想玩呢個, 可惜哲哲112cm唔夠高玩...睇黎legoland都係適合120cm以上既小朋友
時間岩岩好, 即刻排隊趕入場睇4d lego show, 每場播放的內容都不一樣, 有特別喜歡既劇情就記得依住時間去排隊睇啦~
小兒科騎馬仔兜一圍, 但哲哲好喜歡XDDDD
輪到細佬下午茶啦! 園內有個babycare centre, 設備齊全, 可以比小朋友舒舒服服咁食奶食飯換片休息
襯細佬食飯仔, 哲哲同哲爸去左玩爬繩跳樓機~
一路拉上去, 哲哲就一味嗌好高呀唔好拉到咁高好鬼驚, 點知放手sir落黎時又笑得鬼咁開心, 難為哲爸同我出晒力咁向上拉, 倦屎人喇...
吊高完仲要被劏XDDD
另一個玩謝爸爸媽媽既體力勞動遊戲 - 救火訓練學校! 請去片~
雖然好倦, 但真係幾好玩, 唔係見時間唔多真係想玩多次~
之後又去了玩過山車! 一開始哲哲被我們呃了去玩成人版, 那個過山車真的嚇死人, 難為哲哲頂硬上無嬲死我地. 之後叫佢試下玩小朋友的版本, 比剛才九曲十三彎的成人版來說, 小朋友版太小兒科, 完全唔驚了. 細佬無得玩, 只有睇得份兒, 但在旁睇住我地都手指指不停怪叫~
雖然有好多遊戲細佬都無份玩, 但睇住我地玩, 又或者簡簡單單的lego人仔已經令細佬好開心了, 細佬真抵鍚>3<
來到duplo playtown細佬發達啦! 細bb可以去呢度玩, 好多七彩繽紛既lego積木, 滑梯, 小火車卡同迷宮, 好吸引~
玩左足足個半鐘, 放晒電玩到腳仔軟都無力玩囉~
時間不多了, 把握時間到觀景台飽覽legoland 360度全景. 看到一大片荒蕪之地嗎? 正在開發更大更多的lego樂園呢~
lego store賣既精品全部都好得意, 我同哲哲睇到兩眼發光, 最後象徵式買了個legoland人仔既匙扣(RM19.9), 回港才後悔其實那個lego字粒刻人名我也很想要丫...鳴鳴...
仲有半個鐘就關門了! 時間不多, 要趕快去睇miniland先得!
睇相已經覺得靚, 現場睇真係嘆為觀止, legoland迷既哲哲唔願走細心觀看每一小個組件, 像真度極高, 小人物既動作也很有趣
mini singapore留影~
基本上夠高玩既都玩晒了, 八個鐘既時間確實唔夠喉, legoland的酒店正在興建中, 希望落成以後, 待細佬大一點再來玩一次, 絕對值得再來
走前半個鐘call了司機六點接我地, 襯仲有時間在廣場買別的, 這間crepes(RM4.9)好味啊! 即製又香又脆又好味, 真心後悔點解買一份咁少呀?!
會合司機之後, 我們想到newtown food centre度吃晚飯, 於是就在車上小休一陣...
小貼士:
- legoland及美食街廣場食肆店鋪也接受新加坡紙, 不過找續時只會找回馬拉紙. 可以既話兌換定少量馬拉紙抵d (最近馬拉紙水位跌, 比坡紙見洗)
- 我們今次用的這個包車司機非常推介, 司機準時亦很有禮貌, 車廂乾淨無異味, 廣東話聽得明亦說得好, 溝通完全沒問題, 有興趣既朋友可以留言取聯絡方法 (留言既朋友們記得在留言版上留低你既電郵地址啊~)
沒有留言:
張貼留言