畢業禮之後, 哲哲常常問:「媽咪, 點先可以識到新朋友?」
「點解咁問呢?」
「成日都無人同我玩, 所以我要諗方法識多d新朋友囉」
又某日...
「媽咪丫, 你知唔知我今日上堂發夢呀? 我係度諗緊, 點先可以多d朋友同我玩丫」
「咁你諗到方法未丫?」
「我諗到架啦, d男仔又唔同我玩喇, 咁我唯有同女仔玩啦」
真正令哲哲展開識女仔既念頭, 在畢業禮彩排那段期間, 哲哲說搭校車到場地彩排的時候, 所有同學都唔願意同佢坐同佢傾計, 只有隔離班的一位女同學肯和他說話, 這位女同學的細心, 哲哲記住了
最近兩星期, 常常聽到哲哲有意無意之間提到這位女同學. 早幾天, 有晚哲哲和我訓在床頭上傾計, 說要一起制定一個作戰計畫, 決定明天要一早回校, 襯學校還未有太多同學的時候, 好好正式的和那位女同學做朋友 (其實他們一早就認識, 只是哲哲很固執「朋友」這個字眼及儀式)
「嗱, 你聽日同個女仔講: 你好, 我係高乙班既劉哲瑜. 你叫咩名呀? 讀咩班架?」
「佢一早就知道我讀咩班同咩名啦, 仲洗乜再講多次喎」
「咁呢個係開場白黎架嘛, 咁樣講先可以打開個話題」
「哦, 知道喇媽咪, 咁你快d再幫我諗下點開場白啦」
當晚很辛苦的哄哲哲早些上床休息, 第二早響鬧還未響, 哲哲就起床了, 還自動波的刷牙梳頭...
「媽咪, 其實個頭唔洗梳啦, 飛晒出黎咁樣特別d, 謝x桃先記得我架嘛」
「下, 緊係唔係啦, 女仔鐘意d男仔乾淨整齊, 你咁既樣實嚇親人地囉」
「哦, 咁好啦, 我去梳頭先!」
戀愛令人長進, 為左一個女仔, 平日不注意儀容既哲哲竟然會有咁既轉變, 真係神奇
回校路上, 哲哲不吃麵包也不說話, 越行越後...
「做咩事呀哲哲, 行得咁慢既?」
「無呀, 媽咪, 我無胃口, 食唔落呀」(下? 茶飯不思咁大件事?!)
「哦...唔洗緊張, 一陣媽咪陪你一齊作戰架嘛, 一定會成功既」
「我係度諗, 諗緊一陣點先唔會諗埋d無謂野, 點先唔會講d無聊野出黎」(果然好認真!)
「哦, 咁開場白不如就問佢讀邊間小學丫, 問下佢平時鐘意做d咩呀, 鐘意去邊度玩之類囉」
靜默片刻, 向前行幾步時, 哲哲突然停低腳步問:
「媽咪, 你覺得我今日靚唔靚仔? 夠唔夠整齊呀?」
(想必是記起剛才我說過女孩子喜歡乾淨整齊的男孩子了...)
「嗯, 哲哲好靚仔呀, 今日仲好整齊tim, 如果可以放鬆d多d笑容開心d就更好喇!」
返到學校, 哲哲示意我在電腦房門外等佢指示. 哲哲先到隔離班房門口, 有發現才示意我幫手開場白. 哲哲戰戰兢兢的向入看, 為娘也一起緊張起來, 因為不知道哪家女孩被哲哲看上, 哈哈
「媽咪, 就係果個啦」
哲哲示意我過去, 一望, 嘩, 好有氣質好文靜既女孩, 哲哲眼光真好. 當我想拉哲哲入去時, 哲哲有點怕羞不肯入, 呢個時候個女仔行出黎, 同哲哲對望. 個女仔好好奇望住哲哲, 哲哲竟然無反應成個人呆左, 嘩卡卡卡, 好搞笑丫個樣XDDDD
個女仔見哲哲無反應, 轉頭就走, 我示意哲哲上前打聲招呼, 可惜太遲了, 個女仔已經回班房, 不再出來...
任務失敗, 唔怪得咁愁啦...
哲哲果然好留心個女同學, 壁報板上有她的相片, 哲哲話想同佢影張相. 哲哲, 唔洗咁緊張喎~
放學後, 哲哲主動的說今天小息只可以在班房活動, 出唔到去其他地方, 不過依然得到一些小情報...
「媽咪, 今日個女仔做班長丫」
「你又話小息無得出班房, 你又點知個女仔今日做班長呢?」
「我去廁所時行過專登望入去嘛, 不過個女仔一望住我, 我就即刻擰轉頭扮無野囉」
(嘩卡卡卡, 想像到哲哲個樣係幾咁可愛, 直頭好似拍劇咁既情節~)
「哦, 咁你真係好留心個女仔bor. 咁個女仔其實有咩咁吸引你呢?」
「係架, 係我吸引個女仔, 唔係個女仔吸引我架, 佢好多朋友, 身邊成日都有好多人既」
(哲哲誤會左「吸引」個意思)
「我鐘意個女仔唔似其他女仔咁巴渣咁吵, 不過佢唔講野, 只係微微笑架咋」
(想必是想起之前比幾個不認識的小一二女生圍住黎挑釁的不快事)
「媽咪, 聽日要再早d返, 太遲返學校好多人, 就好難搵到個女仔, 好難有機會同佢做朋友架啦. 我地今晚要再開作戰計畫, 你要再幫我諗d開場白先!」
究竟, 哲哲能否成功同個女仔做到朋友呢? 等我諗諗計點先可以幫哲哲行出第一步先...
沒有留言:
張貼留言