【裝修】鋁窗安好。陸續鋪磚中... (day 23)

jun 25

師傅睇過批磚, 話廁所批磚有幾塊有少少defect, 不過叫我地唔洗擔心, 話會等最後用黎鋪頭頭尾尾界磚用, 再唔係可以退返比大陸, 有咁醒目細心既師傅, 頓時覺得好安心丫~

師傅手腳亦好快, 眨下眼就將廚房同廁所磚鋪得七七八八, 不過師傅話唔夠磚, 過兩日鋪晒之後就可以覆實要補幾多塊磚. 得果十零塊既話, 慳返上樓費, 運輸放低磚叫師傅幫手車上樓就得lu

廚房隻不見光磚越望越順眼, 本來諗住都有廚櫃擋住, 鋪咩都無咩所謂, 點知簡簡單單又幾好睇wor

前一晚見到呢d十字夾夾, 好奇問師傅, 原來用黎固定塊磚. 萬一鋪好既磚如果有咩問題想拆返出黎, 最好可以即日通知師傅, 否則過左一日就拆唔返, 要扑爛塊磚就有可能影響埋其他磚了

拖左師傅幾日既花磚圖, 尋日終於嘔到出黎比師傅了. 雖然話想隨心d亂鋪, 不過單靠師傅既美感好似冒險左少少, 所以都係等我畫好個花磚圖等佢砌. 畫呢個圖真係花左我好多時間, 話晒考慮左咁耐, 咁貴都要買返黎, 真係要諗清楚點樣鋪排先突顯到個花紋

因為要諗到爐頭又或者上牆既五金架有可能會擋住d花紋, 在有限度既估計下終於畫成了, 砌出來個效果唔錯, 希望廚櫃做好之後, 大部份既花紋都可以欣賞得到喇~

師傅亦好醒目咁, 當日砌到中途就whatsapp張相我望過有無問題, 仲提醒我個花去到尾會擋住晒唔係咁好睇, 咁上心既師傅, 讚! 

廁所都鋪得七七八八了, 水泥效果非常滿意, 紋理幾乎塊塊不同, 看上去很自然

不過呢...終於有樣野要彈下個師傅喇! 話說早幾日師傅仲話見到有幾塊磚有黑點, 會放到最後先拎黎用, 點知今日比我發現到佢用左幾塊有defect既磚用黎鋪牆身, 仲要係最當眼直望就見到個十字水平位tim! 點解呢堆磚唔用黎鋪馬桶後面果幅牆? 點解唔用黎鋪最高/最低既角落位? 叫佢拆又無理, 唔拆又眼怨, 雖然有點可惜, 不過唔係咩大錯, 唯有安慰自己唔講唔覺, 唔望唔覺...

師傅用英泥寶做防水

開始為地台做防水層嗎?

防水層至少要油六尺高(一定要高於用家既身高), 而且要油多幾層先起到作用. 除了淋浴間花灑果面牆, 出面沙發牆同小童房衣櫃幅牆都油了三層防水, 確保日後不會因為濕氣重而發霉

早兩天廚房還未裝窗框, 這天發現鋁窗裝好了

兩間房的窗也裝好了

窗邊也填滿了, 不知道做了防水未呢?

暫時班師傅都幾醒目, 做野又爽手, 反而是我地有時未定實d野會拖住進度, 師傅見我地唔搵佢佢就自己搵野做住先, 過多陣見我地未搵佢先會打黎搵我地, 咁既相處形式合作得相當舒服, 希望單工程一直順順利利完成就好了

p.s.
黑仔王, 早幾日短租果度個熱水爐壞左無熱水, 通知左業主但對方話唔係好大件事叫我地頂住先, 如果唔係要搭棚又會阻到我地 (計我話用左廿二年既熱水爐, 底板壞喉管硬化無得整, 換個新連搭棚要洗成萬蚊, 佢緊係叫我地忍得就忍啦...)依家每次沖涼唔知邊刻有熱水邊時又無, 好鬼刺激囉...